1 Pakutanga iye Whi wakabelipo, iye Whi wakabeli naMwali akale iye Whi wakabeli Mwali. 2 Iye wakabeli naMwali pakutanga. 3 Pezhulu pape Mwali wakabumba zwinhu zwose akale nomuna iye apana chakabumbwa chisakabumbwa nomunaiye. 4 Muna iye mwaluba bupenyu akale bupenyu ndibwo bwakabeli mwenje wabanhu. 5 Mwenje yondiya unongaima munhilima, akale inhilima aijanhu yauzunda.

6 Kwaluba nonhulume wakatumwa naMwali, izina lilye waluba Joni. 7 Wakezhila koosumukija akale nokupupula nezwomwenje yoyo, kuti bose bebe nokudimbwa nomunaiye. 8 Iye nokukwe aajakabeli mwenje, asi wakezha koopupula nezwomwenje. 9 Mwenje wechokomende unomunikila banhu bose, wakabezha munyika.

10 Wakabeli munyika, inyika yakabumbwa nomunaiye, koga aijakonziba. 11 Wakezha kubanhu bokunaibo, koga banhu bokunaibo abajakontambula. 12 Koga yabo bose bakontambula, yabo bakadimbwa muzina lilye, wakabapa masimba kuti bebe bana baMwali, 13 yabo basijakazwalwa nelopa, nokuda kwombili, kana nokuda konhu, asi nokuda kwaMwali.

14 Akale iye Whi wakaba unhu, akagala pakati pedu. Takabona lukujo lulwe, lukujo lomwananhulumyana umwempela unova kunaTate. Elizhele ishe nechokomende.

15 Joni wakapa kupupula nezwizwe, akashomejela eti, "Yoyu ndiye wandakati, ‘unoozha mushule mwangu unkulwana kwandili nokuti wakabelipo kale ndisanhu ndabaipo.’ "

16 Kuva kukuzhajwa kukwe, tose takatambula chipiwo pezhulu chipiwo. 17 Nokuti mulawo wakapiwa pezhulu paMozesi, nechipiwo nechokomende zwakezha nomuna Jesu Kristo. 18 Akuna unhu wanu akabona Mwali, koga mwananhulumyana umwempela, upo pamoyo waTate, ndiye wakata kuti Mwali ezibikane.

19 Yoku ndiko kupupula kwaJoni, baJuda pabakatumila kwaali batebuji naLevi, beva kuJelusalema koombhuza, "kuti ndiwi aani?"

20 Wakavuma, aajakalamba, koga wakavuma eti, "Anditobeli Kristo."

21 Koga bakombhuza, "ndiwi anhi? ndiwi Elija na?"

Akashandula eti, "Anditobami."

"Ndiwi umpolofeti na?"

Koga wakashandula eti, "Mane."

22 Bakati kwaali, "Ndiwi aani?" Tipenshandulo kutila yabo bakatituma. Iwi unozwiti ndiwi aani.

23 Joni wakabashandula namawhi ompolofeti Izaya eti,

"Ndimi iwhi lyoyo umukushomeja mugwegulu eti,

Lulamisa inzila yaTezi."

24 Yabo bakabatumwa nabaFalisi, 25 bakombhuza, bakati, "Ini biya ubhabhatiza, kana usi Kristo, Elija kana yoyo umpolofeti?" 26 Joni wakabashandula eti, "Imi ndinobhabhatiza nevula, koga pakati penhu kumile, umwe wamusinoziba. 27 Iye unozha mushule mwangu, kana unchili weshangu jije andijilokwelela kujisungunula." 28 Yezwi zwakatikana kuBhetani, museli mwolwizi Jolodani, yoko Joni kwaakaba ebhabhatiza.

29 Nezhuba linotobela wakabona Jesu ezha kwaali, akati, "Lingani imhwizana yaMwali inobhisa luchinyo lwenyika. 30 Yoyu ndiye, wandakati, unoozha mushule mwangu unkulwana kwandili, nokuti wakabelipo kale ndisanhu ndabaipo. 31 Nokwangu ndakaba ndisinounziba, koga ndizwo ndakezha ndibhabhatiza nevula, kuti etondejwe kubanhu bokwaIzilayeli." 32 Joni wakapupula, akati, "Ndakabona uMpepo ebhuluka senjiba eva kudenga, ekagala paali. 33 Imi nokwangu andijakaboonziba, koga iye wakandituma kuti ndoobhabhatiza nevula, wakati kunami, ‘Iye wauchabona uMpepo ebhuluka, egala paali ndiye womene unobhabhatiza noMpepo uNchena.’ 34 Akale ndakabona ndikapupula, kuti yoyu ndiye Mwananhulumyana waMwali."

35 Muchimuka akale, Joni wakabelimile nabalayijwa babe babili, 36 akale paakabona Jesu ekwenda wakati, "Lingani iMhwizana yaMwali!"

37 Balayijwa babili pakonwha eleba yezwi, bakatobela Jesu.

38 Jesu wakachebuka, akababona betobela akababhuza eti, "Ini zwamukumuda?"

Bakashandula beti, "Rabhi" (zwinoleba kuti undayiji), "ukumugala kupi?"

39 Wakati kwabali, "Izhani moobona." Bakezha bakabona kwaakabegala akale nezhuba yelyo bakagala naye, kwakabakwaba madeko.

40 Umwe wababili wakawha Joni elebeleka, kova ontobela, wakabeli Endulu wakabeli unkulu nonuna naSimoni Pita. 41 Chaakatanga kuta kuwana mwanakwaina uwe Simoni akati kwaali, "Tawana Mesiya," (zwinoleba kuti Kristo) 42 Wakonsenga, kunaJesu.

Jesu wakoondinga akati, "Ndiwi Simoni mwananhulumyana waJona? Unooshobwa kuwhi Kefasi," (kana zwatolekwa zwileba kuti Pita).

43 Muchimuka Jesu wakayeya kunda kuGalili akawana Filipu akati kwaali, "Nditobele." 44 Ngweno Filipu wakabeli wokuBhetisaida iguta linova Endulu naPita. 45 Filipu wakawana Nataniyeli akati kwaali, "tongwana iye wakakwalwa naMozesi mumulawo akale nowakakwalwa nabapolofeti, Jesu wokuNazaleta mwananhulumyana waJosefa."

46 Nataniyeli wakati kwaali, "pana chibuya na chingabhuda muNazaleta?"

Filipu wakashandula eti, "izha ubone."

47 Jesu paakabona Nataniyeli ezha kwaali wakati, "linga, uIzilayeli womene, muna iye amuna buchengeji."

48 Nataniyeli wakati kwaali, "ani unondiziba chini?"

Jesu wakoshandula, "Filipu esanhu akushoba, pawabeli mudako monti wonkuyu, ndabakubona kale."

49 Nataniyeli wakati, "Ndayiji, uMwananhulumyana waMwali, uli She weIzilayeli."

50 Jesu wakati kunaiye, "ukumudimbwa na nokuti ndati kunawi, ndakubona mudako lyonti wonkuyu? Unoobona zwinhu zwikulwana pana yezwi." 51 Akale wakati, "Ndolebesa, munoobona idenga lizhulika, akale ingilozi jaMwali jitanha nokubhuluka pezhulu pomwananhulumyana wonhu."