1 Pilato wakatola Jesu kova oonabha. 2 Balwi bakaluka chilemba chemiwha, bakachibiga pansholo uwe, akale bakombajika igubukubu lyensulubele, 3 bakabezha kwaali beti, "Ndauwe, She wabaJuda!" Boomakula.

4 Pilato wakabhuda akale, akati kwabali, "Ilingani, ndimuumbuza kwamuli kuti muzibe kuti andijawana chisoko chokuti ndiumpe untongo." 5 Sezwo Jesu wakabhuda akambala chilemba chemiwha negulukubu yensulubele, Pilato wakati kwabali, "Hoyu unhulume!"

6 Batebuji bakulwana nabalindi betempeli pabakombona, bakashomeja beti, "Unkahamile! Unkahamile!"

Pilato wakati kwabali, "Untoleni imwi muunkahamile, nokuti andibweni chisoko chokuumpa untongo."

7 Batungamili babaJuda bakonshandula, beti, "Tina nomulawo, akale nomulawo yoyo unokwelela kufa, nokuti wazwita Mwananhulumyana waMwali."

8 Pilato paakawha mawhi yaya, wakatya kasa, 9 akangwina akale mungumba akati kuna Jesu, "Unovakupi?"

Asi Jesu aajakashandula. 10 Nezwo Pilato wakati kwaali, "Autoda kulebeleka nami? Autoziba na kuti ndinemasimba lyokukusungunula, akale nesimba lyokukukahamila?"

11 Jesu wakonshandula eti, "Aungabe nesimba pezhulu pangu kuzhe kokuti walipiwa liva pezhulu, nezwo iye wandibuza kwauli ndiye unaluchinyo lukulwana kasakasa."

12 Kuva yoyo nshaji Pilato wakakweja kuunsungunula, asi batungamili babaJuda bakakongoloka beti, "Kana ungoonsungunula yoyu unhu autoba unkwaina waKesali, wose unozwita she, umulwisana naKesali."

13 Pilato paakawha mawhi yaya, wakabuza Jesu pazhe akagala pechigalo chiche chobutongi, pabugalo bwaluwhi Chilongamabwe muchiHebhelu baluti iGabhata. 14 Ngweno lyakabalili izhuba lyokulonganyila miliya yePasika, kwakaba kuli masikati makulwana. Wakati kubaJuda, "Ilingani She wenu!"

15 Bakashomeja beti, "Umbhise yopano, Ubhise yopano, unkahamile!

Pilato wakati kwabali, "Ndikahamile she wenu na?"

Batebuji bakulwana bakashandula beti, "Atina umwe she kuzhe kwaKesali."

16 Kova oompila kwabali kuti ekahamilwe.

Nezwo balwi bakontola Jesu. 17 Wakanyamula unchinjikwa uwe, benda kubugalo bunowhi bugalo bwebhepe lyonsholo, bunowhi, (muchiHebhelu iGologota.) 18 Kwakaleko bakonkahamila panchijikwa, nabamwe babili, Jesu eli pakati pabo. 19 Pilato neebo wakakwala idopoji akalibiga panchinjikwa, linoti, "Jesu wokuNazaleta, She wabaJuda." 20 Banji babaJuda bakalibala idopoji yeli, nokuti bugalo Jesu bwaakakahamililwa bwakabeli pelyo neguta igulwana, akale kwakabakakwalwa muchiHebhelu, muchiLatini, nomuchiGiliki. 21 Batebuji bakulwana babaJuda bakati kuna Pilato, "Usikwale kuti, ‘She wabaJuda,’ koga uti, ‘Yoyu unhulume wati, imi ndili she wabaJuda.’ "

22 Pilato wakabashandula eti, "Zwandakwala, ndakwala."

23 Balwi pabakapeja kuunkahamila Jesu, bakatola zwimbalo zwizwe bakata zwipindi zwina, chipindi kuna umwe noumwe wabalwi, akale neshashiko iye. Koga ishashiko yakabesina umpeto, yakabakalukwa kuvila pezhulu zwinda pasi ulincheka umwempela.

24 Nezwo bakati kunoumwe noumwe, "Tisiyijelule koga ngatiteni ifumbefumbe kuti tibone kuti inoba yani." Yezwi zwakatilwa kuzhajikija lukwalo lunoti,

"Bakajelulilana zwimbalo zwangu,

bakatila ifumbefumbe ishashiko yangu."

Yezwi ndizwo zwakatiwa nabalwi.

25 Pelyo nonchinjikwa waJesu, kwakaba kulimile amai baJesu, nonkulu wamai babe, Mariya unkaji waKilopasi, naMariya wokuMagadala. 26 Jesu paakabona amai babe, akale nondayijwa waakabeda elimile pelyo, wakati kuna amai babe, "Mai, ilinga yondiya mwananhulumyana uwo!"

27 Kova eti kundayijwa uwe, "Ilinga yaba ndi amai babo!" Akale kuva yoyo unshaji undayijwa wakabatola akanogala nabo kunsha uwe.

28 Mushule mwezwi, Jesu aziba kuti zwose zwapela, kuti ezhajikija lukwalo luchena wakati, "Ndafanenyota."

29 Ihali izhele iwaini inopanyuka yakabeli pakalepo, nokudalo bakabiga inganganga lizhele newaini linopanyuka pakakunyana kehayisopi bakakamilija kundomo uwe. 30 Jesu paakalabila iwaini inopanyuka wakati, "Zwapela."

Wakakotamisa unsholo uwe akafa.

31 Sezwo waluba unsi wokulonganyila, kutila kuti mitumbu isibe pamichinjikwa nesabata (nokuti isabata yeli lyakabakakosha), batungamili babaJuda bakakumbila kunaPilato kuti makumbo aabo bakakahamilwa panchinjikwa evunwe, akale betolwe. 32 Nokudalo balwi bakezha bakavuna makumbo owokutanga, akale nowoumwe wakaba akakaamilwa naye, 33 koga pabakaswika pana Jesu bakabona kuti ulofa kale, abajakavuna makumbo awe. 34 Koga umwe wabalwi wakombhaya mulubavu nefhumo, pakalepo kwakabhuda ilopa nevula. 35 Iye wakazwibona unano busumikiji, busumikiji bubwe ngobwe chokomende, akale iye unoziba kuti unoleba ichokomende kuti namwibo mudimbwe. 36 Yezwi zwinhu zwakatika kuti lukwalo luchena luzhajikijwe lunoti, "Apana ifupa lilye lichavunwa." 37 Akale lumwe lukwalo luchena lunoti, "Banoolinga kuna iye wabakabhaya."

38 Mushule mwezwi Josefa wokuGuta lyokuAlimatiya wakabeli undayijwa waJesu, koga zwilosisika, nokutya batungamili babaJuda, wakakumbila kuna Pilato kuti etola untumbu waJesu .Pilato wakomvumija. Nokudalo wakezha akatola untumbu uwe. 39 Nikodimasi iye wakabenda kunaJesu busiku, wakezhabo, ebuza zwishanganiswa zwobunde bwedati nuna bulemu bungaba makilogilamu makumi matatu. 40 Bakatola untumbu waJesu, bakomputila nemicheka nezwishanganiswa zwobunde zwinonhuwilila songalilo wokujika kwabaJuda. 41 Pabugalo paakakahamililwa pakabelina chilili, akale muchilili yechi mwakabeli negumbu ibhya musakabanhu mwalajikwabo unhu. 42 Nokudalo, nokuti lyakabeli izhuba lyabaJuda lyokulonganya, akale nokuti igumbu lyakabeli pelyo, bakabiga untumbu waJesu mwakalemo.