1 Jesu paakapinda munzila wakabona unhulume waluba ibhofu, kuvila pakuzwalwa kukwe. 2 Balayijwa babe bakombhuza kuti, "Ndayiji ndiani wakachinya, unhulume yoyu kana kuti bazwali babe, zwakatisa kuti ezwalwe elibhofu?"

3 Jesu wakashandula eti, "Akutoba kuti yoyu unhu wakachinya, kana kuti bazwali babe, asi kuti mishingo yaMwali itondejelwe mwaali. 4 Tinokwelela kuta mishingo yayoyo wakandituma, kuchili masikati nokuti kungoba busiku akutoba noochatubula kushinga. 5 Cheninge ndili munyika, ndili mwenje wenyika."

6 Aleba yezwi, wakafhila mate pasi, akakanya ivu namate akaguba idope pamesho ebhofu, 7 eti kwaali, "Inda unoshamba, mugandwa lyeSilomu" (zwinoleba kuti watumwa). Wakenda akanoshamba akabuya ebona. 8 Babakijani, naabo bakombona pakutanga echili unkumbili bakabhuza beti, "Aatoba iye na, unhulume yoyu walugala ekumbila?" 9 Bamwe bakati, "Ndiye," bamwe bakati, "Aatoba iye, asi unanga saiye," Iye wakalamba eti, "Ndimi iye." 10 Bakandila mbeli bombuza beti, "Biya mesho awo azhulika chini?"

11 Iye wakashandula akati, "Unhulume unowhi Jesu wakanya idope akandiguba kumesho kwangu akati kunami, Inda kuSilomu ushambe, nezwo ndenda ndikanoshamba ndikatanga kubona."

12 Bakati kwaali, "Uko kupi iye?"

Wakashandula eti, "Anditoziba."

13 Banhu bakabuza kubaFalisi unhulume wakabeli ibhofu. 14 Ngweno lyaluba izhuba lyesabata yopo Jesu paakakanya idope eta kuti ibhofu libone. 15 BaFalisi bakombhuza kabili, kuti wabona chini. Iye akabashandula eti, "Wabiga idope pamesho angu ndikashamba ngweno ndikumubona."

16 Bamwe babaFalisi bakati, "Yoyu unhu aatova kunaMwali, nezwo aatolemekeja isabata."

Koga bamwe bakabebhuza beti, "Biya unhu unchinyi angata chini zwishamiso zwinanga sezwi?" Kwakaba nokukakabajana pakati pabo.

17 Nezwo bakati kabili kubhofu yelyo, "Unotini naye sezwo azhula mesho awo?"

Wakati, "Umpolofeti."

18 Batungamili babaJuda abajakadimbwa kuti waluba ibhofu akale watanga kubona, kuswikila bashoba bazwali bonhulume yoyo wakabona 19 bakababhuza beti, "Mwananhulumyana wenu na yoyu, wamunoti wakazwalwa elibhofu? Biya kwatachini kuti ebone?"

20 Bazwali babe bakati, "Tinoziba kuti yoyu mwananhulumyana wedu akale wakazwalwa elibhofu, 21 koga ngweno atitoziba kuti wabona chini kana kuti ndiyani wonzhula mesho. Umbhuzeni, wakubuka unotubula kuzwilebelekela ega." 22 Bazwali babe bakaleba yezwi nokuti balutya batungamili babaJuda, nokuti batungamili babaJuda bakabavumilana kuti umwe waloti Jesu ndiye Kristo, walutatamilwa muSinagogi. 23 Nezwo bazwali babe bakati, "Wakubuka umbhuzeni."

24 Bakapamha bakonshoba kabili yoyu unhulume waluba ibhofu bakati kwaali, "Ipa lukujo kunaMwali, tinoziba kuti yoyu unhu unchinyi."

25 Wakashandula akati, "Kuti unchinyi anditozwiziba, chinhu chimwempela chandinoziba ndichokuti ndabeli ibhofu asi ngweno ndimubona."

26 Bakombhuza beti, "Watani kwauli? Waazhula chishoboni mesho awo?"

27 Wakabashandula akati, "Ndamubuja ntolo seni, asi amujawhilila, ini muda kuwha kabili? Mumuda kuba balayijwa babe namwibo na?"

28 Bakontuka beti, "Iwi uli undayijwa uwe, asi isu tili balayijwa baMozesi. 29 Tinoziba kuti Mwali walebeleka kunaMozesi, koga yoyu unhulume atitounziba kuti unova kupi."

30 Unhulume wakashandula akati, "Biya ini, yechi chishamiso! Amutoziba kwaakava koga wazhula mesho angu. 31 Tinoziba kuti Mwali aatowhilila bachinyi koga kana ani azwe eli unamati waMwali akale eta kuda kukwe, Mwali unounwha. 32 Kuvila inyika payakabumbwa, atijanu tawha, kuti kuna wakata kuti unhu wakazwalwa eli bhofu ebone. 33 Ngana yoyu unhu esakava kunaMwali, apana zwaalotubula kuta."

34 Bakonshandula beti, "Wakazwalwa muluchinyo nezwo ungatilayijani isu?" Bakava bakontatila musinagogi.

35 Jesu wakawha kuti bontatamilila pazhe, wakati ongwana, wakati kwaali, "Unodimbwa kuMwananhulumyana woNhu na?"

36 Wakashandula eti, "Ndibuje kuti ndiani shungwasha, kutila kuti ndidimbwe mwaali?"

37 Jesu wakati kwaali, "Waumbona, akale ndiye ukumulebeleka nawi."

38 Akati, "Tezi, ndinodimbwa," akonamata.

39 Jesu wakati, "Ndakezhila kutonga inyika yeyi kuti basinobona bebone, akale yabo banobona bebe mapofu."

40 Bamwe baFalisi bakabeli pelyo naye bakawha yezwi, bakati kwaali, "Nasu tili mapofu na?"

41 Jesu wakati kwabali, "Ngana mwakabeli mapofu, amujaloba nondandu, koga munolamba mulinondandu nokuti munoti munobona."