1 Kwasala mazhuba mashanu nelimwempela kuti iPasika liswike, Jesu wakenda kuBhetani, yoko kwaluba kuli naLazalo, wakamuswa naJesu kubafi. 2 Bakombhikila chilayilo, Mata akompakulila naLazalo umwe waabo bakaba belya naJesu. 3 Mariya wakatola iganta lyelita yobunde bwenadi bwakabeshoba imali yopezhulu, akaguba makumbo aJesu, akabukusha makumbo aJesu eshingisa masusu awe, ingumba yose ikanhuwilila bunde. 4 Koga Judasi Isikaliyoti, umwe wabalayijwa babe (iye wakooncheta) wakati, 5 "Ani yobubunde busatengeswa nendipo yonshingo wegole, kova imali yeyo ipiwa basheti." 6 Yezwi wakazwileba, kusi kuti wakaba eli nechido nabasheti koga nokuti wakabeli imbava, akale sezwo wakabelondota chikwama chemali, walugala etola zwalubigwa mukati.

7 Jesu wakati, "Undekeni, ebulondote bunde kuswika izhuba lyokujikwa kwangu, 8 Basheti munogala muli nabo unshaji wose, asi imi amutogala muli nami."

9 Ibunga lyabaJuda palyakawha kuti umo muBhetani, alijakezhila Jesu chete, asi kobona Lazalo waaluba amusa kubafi. 10 Nezwo bakulwana babatebuji bakayeya kuti bebulaye Lazalo neebo, 11 nokuti, pezhulu paLazalo, banji bakasiya baJuda bedimbwa munaJesu.

12 Nezhuba linotobela, ibunga igulwana lyabanhu lyakabezha kumiliya, lyakawha kuti Jesu ukumuzha kuJelusalema. 13 Nokudalo bakatola inhabi jamalala bakenda kunountandamija beshomeja beti, "Hosana! Ulokombolelwa iye unozha muzina lyaTezi, Iye She weIzilayeli."

14 Jesu wakawana mwana wedonki, akatanha, sezwo zwilokwalwa kuwhi,

15 "Usitye, mwananhukajana weZiyoni,

ilinga, She uwo ukumuzha.

ekatanha mwana wedonki."

16 Balayijwa babe abajakazwiwhisisa yezwi pakutanga, asi Jesu paakangaimiswa bakayeya kuti yezwi ndizwo zwakakwalwa pezhulu pape akale zwakatiwa kwaali.

17 Ibunga lyakaba lili naye, paakashomeja Lazalo kuti ebhude mugumbu akale eumusa mubakafa bakendila mbeli besumikija. 18 Ndizo zwakatisa kuti ibunga linde kunountandamija, nokuti bakaba bawha kuti wakaba ata chichemiso yecho. 19 BaFalisi bakati kunoumwe noumwe, "Mwazwibona kuti apana zwamungate, ilingani inyika yatobela iye."

20 Ngweno pakati paabo bakabenda kunonamata kumiliya kwaluba nabaGiliki. 21 Nokudalo bakenda kuna Filipu, wokuBhetisaida muGalili bakati kwaali, "Shungwasha, tinoda kubona Jesu."

22 Filipu wakenda akanobuja Endulu, mububili bwabo bakenda kunobuja Jesu. 23 Jesu wakati kwabali, "Unshaji waswika wokuti Mwananhulumyana woNhu engaimiswe. 24 Ndinolebesa ndinoti kwamuli, kuzhe kwokuti imbeyu yekoloni imbwelele muvu, itikofa, inogala yakadalo, asi ingofa inozwala ikoloni inji. 25 Iye unoda bupenyu bubwe unolashikilwa nabo, asi iye unobenga bupenyu bubwe munyika yeyino unobulondota kusinopela. 26 Kana unhu endishingila, unokwelela kunditobela yokwo kwandili, nechishingi changu akale chinoba ipo, kana ani azwe endishingila, Tate banoondemekeja.

27 "Ngweno umpepo wangu ulojiijwa. Ini zwandingalebe? Nditi Tate, ndichijeni panoyu unshaji? Mane, ndezhila yezwi—panshaji yoyu. Kutila kuti ndindile mbeli mukujiila koono unshaji. 28 Tate ngaimisani izina lyenu."

Pakalepo iwhi lyakaswika liva kudenga liti, "Ndalingaimisa akale ndinolingaimisa kabili."

29 Ibunga lyaluba lilimile lyakaliwha iwhi bamwe bakati, "Kwadilima," asi bamwe bakati, "Ingilozi yabelebeleka naye."

30 Jesu wakashandula akati, "Iwhi yeli lyezhila imwi, alijezhila imi." 31 Ngweno ndiwo unshaji wokulangwa kwenyika, pakalepo unchinda wenyika yeyi unoolashilwa kuzhe. 32 Imi, pandichanyamulwa kuva penyika ndokakatila banhu bose kwandili. 33 Wakaleba yezwi kuti etondejele kuti unoofa lufu luli chini.

34 Ibunga lyakounshandula liti, "Tazwiwha kuva kumulawo kuti Kristo unobelipo kwemisi yose. Unoleba chini kuti Mwananhulumyana woNhu unokwelela kunyamulwa enda pezhulu? Ndiani yoyu Mwananhulumyana woNhu?"

35 Jesu wakati kwabali, "Mwenje uchina namwi kwonshaji umwe umfupi. Kwendani muchina nomwenje, kuti inhilima isimuwane, iye unokwenda munhilima aatoziba kwaamunda. 36 Muchina nomwenje, dimbwani mumwenje kuti mube bana bomwenje."

Jesu paakaleba yezwi, wakabhuda akanobwata. 37 Kojoba akata zwishamiso zwinji mbeli kwabo, koga ibo abajakadimbwa mwaali, 38 yezwi zwakaba alo kuti kuzhajikijwe mawhi akalebwa noMpolofeti Izaya okuti,

"Tezi, ndiyani wakadimbwa kupupula kwedu,

akale ndikunani Tezi kwaakatondejela isimba lilye?"

39 Nezwo abajakadimbwa. Nokudalo Izaya wakati akale,

40 "Wakabata bakaba mapofu,

akale akata kuti myoyo yabo ibe mikukutu.

kutila kuti mesho abo esibone, nemyoyo yabo isiwhisise,

kuti bechingunukile kwandili ndibachilise."

41 Izaya wakaleba yezwi nokuti, wakabona kungaima kwaJesu akalebeleka nezwizwe.

42 Zwisinani banji babatungamili, bakadimbwa mwaali, koga pezhulu pokutya baFalisi abajakalebeleka nezwazwo pachena, betyila kuti bangabhiswa musinagogi, 43 nokuti bakabedisisa lukujo lwabanhu kasa kupinda, lukujo lwaMwali.

44 Jesu wakashomeja eti, "Iye unodimbwa mwandili, aatodimbwa kwandili asi kunoyo wakandituma." 45 Akale iye unobona imi, wabona yoyo wakandituma. 46 Ndezha somwenje munyika, kuti yoyo unodimbwa munami esigale munhilima. 47 Kana unhu ewha indebo yangu asi esinoyilondota, anditontonga. Nokuti andijakezha kotonga inyika asi koyichija. 48 Iye unondilamba akale esinotambula indebo yangu una unountonga, mawhi andinoleba anooba, untongi uwe nezhuba lyopejisila. 49 Nokudalo anditoleba yezwi zwiva musimba lyangu, asi ibo Tate bakandituma, ndibo bakandipa chilayo chokuti ndilebeni akale kuti ndilebeleke zwipi. 50 Ndinoziba kuti undayo yoyu bupenyu businopela. Nokudalo zwandinoleba, ndinozwileba sokulayilwa kwangu naTate.