1 Jesu aleba yaya mawhi, wakabhuda nabalayijwa babe bakavubuka igoba linowhi Kidiloni, kwaluba nechilili, chaakangwina nabalayijwa babe. 2 Ngweno Judasi, wakoncheta, naiye walubuziba bugalo yobwo, nokuti Jesu walusobungana kanjikanji nabalayijwa babe mwakale. 3 Nokudalo Judasi wakapiwa igapo lyabalwi nabalindi betempeli kubatebuji bakulwana akale nokubaFalisi, bakenda kuchilili yecho, beli namalambi nomwenje akale nezwilwaniso. 4 Jesu, eziba zwose zwalutikana kwaali, wakezha mbeli kwabo akati kwabali, "Mumupyanga aani?"

5 Bakonshandula beti, "Jesu wokuNazaleta."

Jesu wakati kwabali, ‘‘Ndimi iye."

Judasi wakoncheta, wakabelimile nabo. 6 Jesu paakati kwabali, "Ndimi iye," bakabwilila mushule bakawila pasi. 7 Wakababhuza akale eti ‘‘Mumupyanga aani?"

Bakashandula beti, "Jesu wokuNazaleta."

8 Jesu wakashandula eti, "Ndamubuja kuti ndimi iye, nokudalo, kana mupyanga imi, lekejani banhulume yaba bende." 9 (Yoku kuzhajikija mawhi aakabaleba kuti, "Kunaabo bamwakandipa, andijakalashikilwa kana nomwempela.")

10 Simoni Pita, wakatola igwalabaza lyaakabeli nalyo, akatema undanda wontebuji unkulwana, akondumula inzebe yokululyi. Izina lyondanda lyaluwhi Malikasi. 11 Jesu wakati kuna Pita, "Ibwiliza igwalabaza lilyo pabugalo bwalyo, ndisinwe na unkombe wokujiijwa wandapiwa natate bangu?"

12 Nokudalo igapo lyabalwi nontungamili walyo, nabalindi betempeli bakombhata Jesu bakonsunga. 13 Bakatanga bonsenga kunaAnasi, nokuti wakaba eli unkalabwa waKayifasi, wakabeli untebuji unkulwana igole yelyo. 14 NdiKayifasi wakabalaya baJuda kuti zwilolulama kuti unhu umwempela unokwelela kufila banhu bose.

15 Simoni Pita noomwe undayijwa bakatobela Jesu. Nokuti yoyu undayijwa waluzibwa nontebuji unkulwana, wakangwina mulubazhe lontebuji unkulwana pamwempela naJesu, 16 koga Pita echimile pazhe, pankoba. Umwe undayijwa waluzibwa nontebuji unkulwana, wakabhuda akanolebeleka nondindikaji wonkoba, akangwinisa Pita mukati. 17 Unsichana walulinda pankoba wakati kunaPita, "Iwi autoba umwe wabalayijwa bonhu yoyu na?"

Iye wakati, "Anditoba."

18 Ngweno bashingi nabalindi betempeli bakabangija moto wamasimbe, nokuti kwakabetonhola, bakabelimile bezwikotela moto, Pita naiye wakaba elinabo elimile ezwikotela moto.

19 Untebuji unkulwana wakabhuza Jesu nezwabalayijwa babe nendayijo yiye. 20 Jesu wakonshandula akati, "Ndabelebeleka pachena kubanhu bose, unshaji wose ndakabelayija mumasinagogo akale nomutempeli, kuli iko kunobunganila baJuda bose, andijakaleba chinhu mwakasisika. 21 Unondibhuzilani? Ibhuza yabo bakandiwha, kuti ini zwandakaleba kwabali, banoziba zwandakaleba."

22 Alebeleka yezwi, umwe undindi wetempeli wakaba elimile pelyo naJesu wakomakula akati, "Ndiko kudabila untebuji unkulwana na yoku?"

23 Jesu wakonshandula eti, "Kana ndalebeleka bubi, sumikija bubi yobwo, koga kana ndalebeleka zwanana, wandilobelani biya?"

24 Anasi wakontumija akasungwa kuna Keyifasi untebuji unkulwana.

25 Ngweno Simoni Pita wakaba elimile ezwikotelela moto. Bakabhuza beti, ‘‘Iwi, autoba umwe wabalayijwa babe na?"

Wakanyenyeja eti, "Anditoba imi?"

26 Umwe wabashingi bontebuji unkulwana, igamu lyowakabadumulwa inzebe naPita, wakabhuza eti, ‘‘Andijakubona na uli naye muchilili?"

27 Pita akale wakapamha enyenyeja, pakalepo igukulume lyakakokoleka.

28 Kova beva kungumba yaKefasi, boonsenga Jesu kungumba yontongi wabaRoma. Kwakaba kuchi zwingwanangwana. Ibo abajakangwina mungumba yontongi kuti besiswibhe, betila kuti belye ipasika. 29 Nokudalo Pilato wakabhuda akenda kwabali akati, ‘‘Mumumpomela undandu ni unhulume yoyu?"

30 Bakonshandula beti, "Ngana unhulume yoyu esiumvuni womulawo atijaluumbuza kwauli."

31 Pilato wakati kwabali, ‘‘Untoleni imwi muuntonge nomulawo wenu."

BaJuda bakati kwaali, ‘‘Atitovumijwa isu kubulaya unhu." 32 Yoku kwaluba kuzhajikija iwhi lyaJesu lyaakaleba etondejela kuti unoofa lufu lwakata chini.

33 Ngweno Pilato wakangwina kabili mungumba yontongi wabaRoma akashoba Jesu, akati kwaali,‘‘Ndiwi She wamaJuda na?"

34 Jesu wakonshandula eti, ‘‘Ukumuleba yezwi nokukwo, kana wazwibujwa nabamwe nezwangu?"

35 Pilato wakashandula eti, ‘‘Imi ndiNjuda na? Luji lulwo akale nabatebuji bakulwana bakupila kwandili, ini zwawata?"

36 Jesu wakashandula eti, ‘‘Bushe bwangu abutoba bwenyika yeno, ngana bushe bwangu buli bwenyika yeno, bashingi bangu balulwana, kuti ndisisungwe nabatungamili babaJuda, koga bushe bwangu abutoba bwopenyika."

37 Pilato wakati kwaali, "Ndiko kuti ulishe na?"

Jesu wakashandula eti, "Wazwileba ndiwi kuti ndili she. Ndizwo zwandakazwalilwa, akale ndizo zwandakezhila penyika, kuti ndisumikije ichokomende. Umwenoumwe uli wechokomende unowha iwhi lyangu."

38 Pilato wakombhuza eti, ‘‘Ichokomende ini? "

Mushule mokulebeleka yezwi, wakabhuda akenda kubaJuda akale, akati kwabali, "Andijikumuwana undandu mwaali. 39 Koga imwi munengalilo yokuti ndimusungunulile unsungwa umwempela pePasika. Movuma na kuti ndimusungunilile she wabaJuda?"

40 Ibo bakakongoloka kakale beti, "Kusi yoyonhu ne koga Bhalabhasi!" Ngweno Bhalabhasi waluba umpambi.