1 Jesu paakaleba yaya mahwi, wakalinga kudenga, akati, "Tate, unshaji waswika. Kujani Mwananhulumyana wenu kuti Mwananhulumyana emukuje bo, 2 sezwo mwakompa masimba pezhulu pabanhu bose, kutila kuti epe bupenyu businopela kuna yabo bose bamwakompa. 3 Akale yobu bupenyu businopela, kuti bemuzibe imwi Mwali wechokomende akale naJesu Kristo wamwakatuma. 4 Ndakamukuja penyika, ndakawupeja unshingo wamwakandipa kuti ndiunte. 5 Akale ngweno Tate, ndikujeni imi mbeli kwenu, nolukujo lwandakaba ndilinalo namwi inyika isanhu yabumbwa."

6 "Ndakatondejela izina lyenu kubanhu bamwakandipa kuva munyika, baluba benu mukandipa imi, akale bakalondota iwhi lyenu. 7 Ngweno banoziba kuti zwose zwamwakandipa zwinova kwamuli. 8 Nokuti ndakabapa mawhi amwakandipa, bakawatambula, bakaziba ichokomende kuti ndakava kwamuli nokudalo bakadimbwa kuti ndakatumwa namwi."

9 "Ndikumubanamatila, andijikumunamatila inyika, koga yabaya bamwakandipa nokuti ngabenu. 10 Zwose zwangu ngozwenu, zwenu ngozwangu akale ndokujwa nomunaibo. 11 Akale ngweno andichimo munyika, koga bayimo munyika, akale ndikumuzha kwamuli. Tate bachena, balondoteni muzina lyenu, ilo lyamwakandipa, kuti bebe unhu umwempela chete, sezwo tili bamwempela. 12 Ndichili nabo ndakabalondota muzina lyenu lyamwakandipa, ndikabalinda kusina umwe wabo wakalashika, kuzhe komwanhanhulumyana wakabakamisilwa kulashwa, kuti lukwalo luzhajikijwe. 13 Koga ngweno ndozha kwamuli, ndinoleba zwinhu yezwi penyika kutila kuti bezhajwe nolushanto lwangu mwabali. 14 Ndakabapa iwhi lyenu, akale inyika ikababenga nokuti abatoba benyika, sezwandisili wenyika. 15 Anditonamatila kuti mubabhise penyika, koga kuti mubalondote pana umbi. 16 Abatoba benyika, nami anditobeli wenyika. 17 Mubachenese muchokomende, iwhi lyenu ndilo ichokomende. 18 Sezwo mwakandituma munyika, namibo ndakabatuma munyika. 19 Ndazwichenesela ibo, kutila kuti becheneswe zwizhele."

20 "Anditonamatila yaba chete, koga naabo banodimbwa munami newhi lyabo, 21 kutila kuti bose bebe bamwempela sezwo imwi Tate muli mwandili nami ndili mwamuli. Ndinonamatila kuti naibo bebe mwatili, kutila kuti inyika idimbwe kuti mwakandituma. 22 Ndakabapa lukujo lwamwakandipa, kuti bebe bamwempela, zwatili bamwempela. 23 Imi mwabali, namwi mwandili, kuti bebebamwempela zwilopelelela, kutila kuti inyika izibe kuti mwakandituma akale mukabada, sezwamakandida imi."

24 "Tate, ndine chido chokuti yabaya bamwakandipa, bebe nami pose pandinobeli, kuti bebone lukujwo lwangu lwamwakandipa nokuti mwakandida musanu mwabumba inyika. 25 Imwi Tate bakalulama, kojoba inyika isakamuziba, koga ndomuziba, naibo yaba bakaziba kuti mwakandituma. 26 Ndakata kuti muzibikane kwabali, akale ndondila mbeli kuti muzibikane, kutila kuti kudanana kwenu kwamunanako kunami kube munaibo, namibo ndibe munaibo."