1 Shule mwezwi, Jesu wakabekwendenda muGalili, ajakatubula kunda kuJudiya nokuti baJuda bakaba beda kuumbulaya. 2 Ngweno miliya yezwitumba yabaJuda yakababa pelyo. 3 Nokudalo banuna babe bakati kwaali, "Bhuda yopa inda kuJudiya kutila kuti balayijwa babo bebone mishingo iyo yaukumuta. 4 Nokuti akuna unhu unoshinga ekabwata, kana eda kuzibwa nabamwe. Kana ukata yezwi zwinhu, zwitondejele kunyika." 5 Banuna babe abajakabedimbwa mwaali.

6 Jesu wakati kwabali, "Unshaji wangu aujanu waswika asi kunamwi unshaji wose ulokwelela. 7 Banhu bomunyika abangamubenge koga imi banondibenga, nokuti ndinobabuja kuti banota zwinhu zwibi. 8 Indani kumiliya imwi, imi andijikumunda kumiliya yeyi, nokuti unshaji wangu ulokwelela aujanu waswika." 9 Aleba alo, wakasala muGalili.

10 Koga mushule mokunda kwabanuna babe kumiliya, naiye wakenda kwakale esinoboneka pachena, ekazwisisa. 11 Batungamili babaJuda bakabe boonshaka kumiliya beti, "Uko kupi?"

12 Kwakaba nokungunguna pezhulu pape pakati pabanhu, bamwe beti, "Yoyu unhu umbuya," akale bamwe beti, "Pe, ukumulasha banhu." 13 Nokutya batungamili babaJuda, apana wakalebeleka nezwizwe pachena.

14 Kwaba pakati kwemiliya Jesu wakenda mulubazhe lwetempeli akatangisa kulayija. 15 BaJuda bakachenama beti, "Seni unhu yoyu unoziba zwinji, iye esakalayijwa?"

16 Iye Jesu wakabashandula eti, "Kulayija kwangu akutoba kwangu asi ndikoyo wakandituma. 17 Kana unhu eda kuta kuda kwaMwali, uchaziba kuti indayijo yangu ikumuva kunaMwali kana kuti ndimuzwilebelekela nezwangu nesimba lyamgu. 18 Yoyo unozwi lebelekala nesimba lilye nezwizwe, unoshaka lukujo lulwe ega, koga iye unoshaka lukujo lwoyo wakontuma unechokomende, akale munaiye amuna maniepwa. 19 Mozesi aajakamupa Mulawo na? Koga akuna kana umwe wenu unolondota mulawo yoyo. Ini mushaka kundibulaya imi?"

20 Banhu bakashandula beti, "Unanedimoni! ndiani ukumuda kukubulaya?"

21 Jesu wakabashandula eti, "Ndakata chishamiso, chimwempela mose mwakachenamiswa nacho. 22 Mozesi wakamulaya kuti mumhalaje banhabanhulumyana benu (asi azwitova kuti kwakava kunaMozesi, koga kwakava kumatate enu) asi munomhalaja unhu nesabata. 23 Kana unhu emhalajwa nesabata, kuti mulawo waMozesi usivunwe, mwandinyemela chini? kuti ndachilisa unhu nesabata. 24 Musishungule mulinga unhu, koga shungulani nenzila ilolulama."

25 Bamwe banhu bomuJelusalema bakabebhuza beti, "Aatoba iye na yoyu unhulume wabakumushaka kubulaya? 26 Akale yopa ukumulebeleka pachena, koga apana zwibamuleba kwaali, zwingaba na, kuti batungamili banoziba kasa kuti ndiye Kristo. 27 Koga tinoziba kuti yoyu unhu unova kupi, asi Kristo akaswika akuna unhu unooziba kuti unova kupi."

28 Asi Jesu wakashomeja, elayija, mulubazhe lwetempeli eti, "Munondiziba, akale munoziba nokwandinova, andijakezha nokuda kwangu, iye wakandituma ndiwe chokomende. Akale iye amutounziba, 29 asi imi ndinounziba, nokuti ndinova kwaali, akale wakandituma."

30 Bakada kuunsunga asi akuna wakoumbhata nokuti unshaji uwe wakaba usanu waswika. 31 Asi banhu banji bakadimbwa munaiye, bakati, "Kristo angoswika, uchata zwitondejo zwinji na, kupinda zwatiwa nonhu yoyu?"

32 BaFalisi bakawha ibunga linyeula nezwaJesu. Bakulwana babatebuji nabaFalisi bakatumila balindi betempeli kuti benounsunga. 33 Jesu kova eti, "Ndinoba namwi kwonshaji umfupi, ndisikonda kunoyo wakandituma, 34 munoondipyanga asi amutoondiwana, kwandinobeli amutotubula kuswika."

35 Batungamili babaJuda bakabhuzana beti, "Biya unhu yoyu ukumuyeya kunda kupi, yoko kwaanoti atito tubula kuungwana? Umuda kunda kumakuta abaGiliki bakamwaikila, kuti enolayija baGiliki na? 36 Ukumulebani kana eti, ‘Munoondishaka koga amutoondiwana akale kwandinobeli amutoswika’? "

37 Nezhuba lyopejeleja lyemiliya, lyakaba lili izhuba igulwana kasakasa, Jesu wakamilika akalebelekela pezhulu, eti, "Kana peli nomwe unenyota, ngeezhe kwandili oonwa. 38 Iye unodimbwa kwandili sokuleba kwewhalo iti, ‘Kuva mumwoyo mumwe kunookunga injizi jevula yobupenyu.’ " 39 Ngweno yezwi wakazwileba pezhulu poMpepo, yabo banodimbwa kwaali bachootambula, nokuti uMpepo wakaba esanhu apiwa, nokuti Jesu aajakabanhu akujwa.

40 Pabakati bawha mawhi yaya, bamwe banhu bakati, "Ilebeswa, yoyu unhu ndiye umpolofeti ulolingililwa."

41 Bamwe bakati, "Yoyu ndiKristo."

Koga bamwe bakati, "Zwingaba alo na kuti Kristo angava kuGalili? 42 Ani iyo iwhalo ayijakaleba na kuti Kristo unoova kuchinde lyaDavidi akale kunsha weBhetelehema, kunova naDavidi?" 43 Nokudalo kwakaba nokusovumilana pakati pabanhu pezhulu pape. 44 Bamwe babo bakabeda kuunsunga koga akuna wakoombhata.

45 Balindi betempeli bakabwilila kubakulwana babatebuji nabaFalisi, ibo bakati kwabali, "Ini musoombuza?"

46 Balindi betempeli bakashandula beti, "Akuna unhu wanu akalebeleka soyu unhu."

47 BaFalisi bakabashandula beti, "Ani namwibo mwachengelwa na? 48 Kungaba umwe untungamili kana unFalisi wadimbwa munaiye na? 49 Koga ibunga yeli lisinoziba mulawo, lilofhizhwa."

50 Nikodimasi wakabenda kuna iye kale, akale eli umwe wabo, wakati kwabali, 51 "Ani mulawo wedu unopa untongo panhu, asanu apiwa chibaka kuti ewhiwe kuti watani."

52 Bakashandula beti, "Nawi unova kuGalili na? Shaka mumakwalo, unowana kuti akuna umpolofeti unobhuda muGalili." 53 Bakenda, umwe nomwe kungumba iye*.