1 Ngweno umwe unhulume wakabelwala, wakaba ewhiLazalo wokuBhetani, iguta mwakabegala Mariya naMatha bakabeli unkulu nonuna. 2 Yoyu Mariya ndiye wakaguba Tezi mafuta, akabukusha makumbo namasusu awe. Unkazwaji uwe Lazalo wakaba elwala. 3 Nezwo yaba unkulu nonuna, bakatumila iwhi kunaJesu beti, "Tezi, Lazalo waunoda ukumulwala."

4 Asi Jesu paakazwiwha wakati, "Yaya malwaji aatoba olufu, asi ndiwolukujo lwaMwali, kuti Mwananhulumyana waMwali ekujwe nazwo."

5 Jesu wakabeda Matha, Mariya nonkazwaji wabo Lazalo. 6 Nezwo paakawha nezwokulwala kwaLazalo, wakagala amwe mazhuba mabili mubugalo mwaakaba eli. 7 Mushule mwezwi wakati kubalayijwa babe, "Andeni kuJudiya kabili."

8 Balayijwa babe bakati, "Ndayiji, baJuda bakabeda kukupubula namabwe munshaji ushomanana wapinda, asi ngweno ukumuda kunda kwakale kabili?"

9 Jesu wakabashandula eti, "Akuna maawa igumi namabili muzhuba na? Kana unhu angokwenda masikati aatogubhulwa nokuti unobona nomwenje wenyika yeino." 10 Asi kana unhu akakwenda, busiku, unogubhulwa nokuti aana mwenje. 11 Wakati alebeleka, akapamija eti, "Unkwaina wedu Lazalo walala, koga ndichenda kunoomusa."

12 Balayijwa babe bakati kwaali, "Tezi kana kuli kuti walala, uchachila."

13 Ngweno Jesu wakaba alebeleka nezwolufu lwaLazalo, asi ibo bakayeya kuti kulala kokunyetutukwa. 14 Kova Jesu ebabuja pachena eti, "Lazalo wafa, 15 akale nokuda kwenu, ndinoshanta kuti andijabelipo, kutila kuti mudimbwe. Koga andeni kuna iye."

16 Tomasi unoshobwa kuti imbile, wakati kunabamwe balayijwakwaina, "Andeni nasu kutila kuti, tife naye."

17 Ngweno Jesu paakaswika, wakawana kuti Lazalo wakaba aba mugumbu kale kwamazhuba mana. 18 Bhetani yakabeli pelyo neJelusalema, unshizho ungaba makilomita matatu. 19 Banji babaJuda bakaba bezha konyalaja Matha naMariya pezhulu ponkazwaji wabo.

20 Yopo Matha paakawha kuti Jesu ukumuzha, wakenda akanootandamija asi Mariya wakagala mungumba. 21 Matha wakati kuna Jesu, "Tezi ngana wabelipo yopano unkazwaji wangu aajalofa. 22 Asi nangweno ndinoziba kuti chose chaunokumbila kuna Mwali, Mwali unokupa."

23 Jesu wakati kwaali, "Unkazwaji uwo unomuka kubafi."

24 Matha wakati kwaali, "Ndinoziba kuti unoomuka pakumuka kwabakafa nezhuba lyopejisila."

25 Jesu wakati kwaali, "Ndili kumuka nobupenyu, iye unodimbwa kunami kojoba akafa, asi unoolalama, 26 akale iye unolalama nokudimbwa munami aatoofa. Unodimbwa yezwi na?"

27 Wakati kwaali, "Ndimo Tezi, ndinodimbwa kuti uli Kristo Mwananhulumyana waMwali, iye ukumuzha munyika."

28 Paakaleba yezwi, wakenda akashoba unkazwaji uwe wechinhukaji Mariya kumbali akati, "Undayiji upo yopano, ukumukushoba." 29 Mariya paakazwiwha yezwi, wakamilika nokukambija akenda kunaJesu. 30 Ngweno Jesu aajakabanu angwina munsha koga wakabechi kubugalo kwaakabashangana naMatha. 31 BaJuda bakabeli naye mungumba, beunyalaja pabakabona Mariya emilika nokukambija akale ebhuda pazhe, bakontobela beyeya kuti ukumunda kugumbu kunolilila kwakale.

32 Ndipo Mariya, paakaswika yopo pakabeli naJesu, paakombona wakafhigama pamakumbo awe eti kwaali, "Tezi ngana wabelipo yopa unkazwaji wangu aajalufa."

33 Jesu paakombona elila nabaJuda bakabezha naye nayibo belila wakabhatikana kasa mumwoyo akalwajilwa, 34 akale kova ebhuza eti, "Moondajika kupi?"

Bakati kwaali, "Tezi, izha ubone."

35 Jesu wakalila. 36 Nezwo BaJuda bakati, "Ilingani kuti wakabeunda chini!"

37 Asi bamwe babo bakati, "Unhu yoyu wakata kuti mapofu ebone, ajalounta na unhu yoyu kuti esife?"

38 Jesu wakabhatwa neshungu akenda kugumbu lyakaba lili bhako akale ibwe lyakaba likalikonya. 39 Jesu wakati, "Ibhisani ibwe."

Asi Matha, unkazwaji womfi Lazalo, wakati kwaali, "Tezi nouno unshaji kunoba kwaba nokunhuwa, nokuti waaba namazhuba mana afa."

40 Jesu wakati kwaali, "Andijakubuja na kuti kana udimbwa unobona lukujo lwaMwali?" 41 Nokudalo bakabhisa ibwe. Akale Jesu wakalinga kudenga akati, "Tate, ndinoboka nokuti mwandiwha imi. 42 Ndinoziba kuti munondiwha unshaji wose, asi ndaleba yezwi pezhulu pabanhu bamile yopa, kutila kuti bedimbwe kuti mwakandituma." 43 Paakaleba yezwi wakashomeja newhi igulwana eti, "Lazalo, bhuda." 44 Unhulume wakababafa wakabhuda, maboko awe namakumbo awe akapombelwa nemicheka, akale chiso chiche chikasungwa noncheka. Jesu wakati kwabali, "Unsupuleni, akale mundeke ende."

45 Banji babaJuda bakabezha kolila naMariya bakababona zwaakaba ata, bakadimbwa munaJesu, 46 koga bamwe bakenda kubaFalisi bakababuja zwakaba zwatiwa naJesu. 47 Nokudalo batebuji bakulwana nabaFalisi bakagala igota bakati, "Ini zwatingate? Nokuti yoyu unhulume ukumuta zwishamiso zwinji." 48 Kana tingoondeka endila mbeli, banhu bose banodimbwa mwaali, akale baRoma banozha koopalaja itempeli lyedu akale nenyika yedu.

49 Koga umwe wabo wakabewhi Keyifasi wakabeli untebuji unkulwana igole yelyo, wakati kwabali, "Apana chinhu chamunoziba, 50 Amutowhisisa kuti, zwili ndibwalo kunamwi kuti unhu umwempela efile banhu, kuna kuti inyika yose ipalajwe." 51 Ajakaleba yezwi nokuda kukwe, asi nokuti wakaba eli untebuji unkulwana igole yelyo, wakafolofita kuti Jesu unokwelela kufila baJuda, 52 kusi kwabaJuda chete, asi kubunganisa nabana baMwali balopalalana kunyika jose.

53 Nezwo kuva nelyo izhuba, bakalangana kuti bombulaye. 54 Nezwo Jesu ajakabechinokwenda pachena pakati pabaJuda, koga wakenda kumizi ipo pelyo negwegulu, kuguta lyaluwhi Ifulemu, kwakale wakagala nabalayijwa babe.

55 Ngweno miliya yePasika yabaJuda, yakababapelyo, banhu banji bakava kumizi bakenda kuJelusalema iPasika isanu yaswika kuti beno zwichenesa. 56 Bakabepyanga Jesu, belebelekesana belimile mulubazhe lwetempeli beti, "Mubweni soti ukumuzha na kumiliya?" 57 Ngweno bakulwana babatebuji nabaFalisi bakaba balaya kuti uchaba aziba kuti Jesu ukokupi, ebazibise, kutila kuti bounsunge.