1 Ngweno nonsi wotanga weviki Mariya wokuMagada wakakezha kugumbu nokukambija, kuchakaswibha, akabona kuti ibwe lyakababhiswa pegumbu. 2 Wakalabuka, akenda kunaSimoni Pita, nokunomwe undayijwa, waludisiswa naJesu, akati kwabali, "Babhisa Tezi mugumbu, akale atitoziba kwabombiga.’’

3 Pita wakabhuda noumwe undayijwa, bakenda bekalingisa kugumbu. 4 Bakalabuka pamwempela, koga umwe undayijwa wakalabuka kasa akasiya Pita, akaswika kutanga pegumbu, 5 akale wakakotama eshozhela, akabona micheka ili pasi, asi aajakangwina. 6 Simoni Pita wakezha, ountobela, akangwina mugumbu. Akabona micheka ili pasi. 7 Akale uncheka wakaba uli munsholo mumwe aujakabeli paneyimwe, micheka, koga wakabakapetwa uliwoga. 8 Undayijwa yondiya wakatanga kuswika pegumbu, naiye bo wakangwina akabona akale akadimbwa, 9 nokuti bakaba besanu bawhisisa lukwalo lunoti, ‘unokwelela kumuka kubafi.’ 10 Balayijwa bakabwilila kujingumba jabo.

11 Mariya wakaba elimile kuzhe kwegumbu efwikula, akale echinofwikula wakakotama akashozhela mugumbu, 12 wakabona ingilozi imbili jikambala zwimbalo zwichena, jiligele pasi, imwe kwakabeli kunsholo imwe kwakabeli namakumbo, yopo pakaba palajikwa untumbu waJesu 13 Jikati kwaali, ‘Mai munofwikulilani?" Iye wakati kwajili,

"Nokuti batola She wangu, akale anditoziba kwabombiga."

14 Echinoleba yezwi wakachebuka, akabona Jesu elimile, koga aajakaziba kuti ndiye. 15 Jesu wakati kwaali "Mai munofwikulilani? Ndiani wamunoshaka biya?"

Iye wakayeya soti undimi, akati kwaali, "Shungwasha, kana mombhisa, ndibujeni zwenu pamombiga, ndinountola.’’

16 Jesu wakonshoba eti, "Mariya."

Iye wakachingunuka akati kwaali, "Raboni ndiko kuti, "Undayiji," muchiHebhelu.

17 Jesu wakati kwaali, ‘‘Usindibhate, nokuti andijanu ndatanha kunda kunaTate bangu, koga inda kubanakwaina bangu, unoti kwabali ‘Ndotanha kunda kunaTate bangu, nokuna Tate benu, kunaMwali wangu, nokunaMwali wenu.’ "

18 Mariya wokuMagadala wakenda, akanobuja balayijwa kuti wabona Tezi, akale kuti wabujwa zwinhu yezwi naiye.

19 Madeko ezhuba lyakalelyo lyokutanga lyeviki, balayijwa bakabaka bungana pamwempela bekakonya mikoba nokuti bakabetya batungamili babaJuda, Jesu wakezha akama pakati pabo, akati kwabali, "Lunyalalo ngalube namwi." 20 Aleba yezwi, wakabatondeja maboko nebhazu lilye. Nokudalo balayijwa bakashanta nokubona Tezi. 21 Jesu wakapamha akati kwabali, "Lunyalalo ngalube namwi, Tate sezwa bakandituma namibo ndinomutuma." 22 Wakati aleba yezwi wakafemela pezhulu pabo akati kwabali, "Tambulani umpempo unchena. 23 Kana mukalekejela banhu luchinyo lwabo lunolekejelwa koga, kana mungosolekejela banhu luchinyo lwabo alutolekejelwa."

24 Ngweno Tomasi unowhi imbile umwe wabaligumi lina babili wakaba esipo pabali paakaswika Jesu. 25 Nezwo bamwe balayijwa bakati kwaali, "Isu taumbona Tezi," Koga iye wakati kwabali, "Kana ndisabona mumaboko awe mabanga enembe, ndikabiga kanyala mubanga enembe akale ndiwheke luboko lwangu mulubavu lulwe anditodimbwa." 26 Kwakati kwapinda mazhuba mashanu anamatatu, balayijwa babe bakaba belimungumba. Tomasi wakabeli nabo. Matendele akabakakonywa, asi Jesu wangwina akama pakati pabo akati, "Lunyalalo ngalube namwi. " 27 Wakati kunaTomasi, "Biga kanyala kako yopa, ubone maboko angu, ubuze luboko lulwo, ulubige palubavu lwangu, leka kusodimbwa koga dimbwa." 28 Tomasi wakashandula akati kwaali, "Tezi wangu naMwali wangu." 29 Jesu wakati kwaali, "Tomasi nokuti wandibona wadimbwa?" Balokombolelwa yabo basijakabona koga banodimbwa.

30 Jesu wakata zwimwe zwishamiso zwinji mbeli kwabalayijwa babe zwisakakwalwa muwhalo yeyi, 31 koga yezwi zwakakwalwa kuti mudimbwe kuti Jesu Kristo Mwananhulumyana waMwali, akale kuti kana mudimbwa mube nobupenyu muzina lilye.