1 "Myoyo yenu ngayileke kujiijika, dimbwani kunaMwali, mudimbwe nokwandili. 2 Munsha waTate bangu munabugalo bunji bokugala, Ndikumunda kunomubambanyila bugalo. Ngana zwisakadalo ndalomubuja 3 Akale ndingonda kunomubambanyila pokugala, ndoobuya akale, kuti ndoomutola mube kwandili, kuti pandili mubeyipo namwibo. 4 Akale moyiziba inzila kwandimunda."

5 Tomasi wakati kwaali, "Tezi, atitokuziba kwaumunda, tingaiziba chini inzila?"

6 Jesu wakati kwaali, "Imi ndimi inzila, nechokomende, nobupenyu, apana unozha kuna Tate, asi nokwandili. 7 Ngana mwakandiziba, mwalubaziba naTate bangu, kuvila ngweno mwabaziba akale mwababona."

8 Filipu wakati kwaali, "Tezi, titondejeni Tate, tova tagunchikana."

9 Jesu wakati kwaali, "Filipu, ndabeli namwi konshaji undefu kasa, koga autondiziba na? Yoyo wabona imi wabona Tate, ungati, ‘Titondeje Tate chini?’ 10 Autodimbwa na kuti ndimo munaTate akale naTate baimo munami? Mawhi andinolebeleka kunamwi anditowaleba nesimba lyangu, koga Tate banogala mwandili ndibo banota mishingo yabo. 11 Idimbwani kuti ndimo munaTate, naTate bayimo mwandili, kana kuti, mundidimbwe nemishingo yandinota. 12 Ndinolebesa ndinoti kwamuli, yoyo unodimbwa mwandili, unoota mishingo yandinota, akale unoota nemishingo mikulwana kupinda yandinota, nokuti ndikumunda kunaTate. 13 Chose chamuchakumbila muzina lyangu, ndoochita, kutila kuti Tate bekujwe muMwananhulumyana. 14 Kana mungokumbila chinhu muzina lyangu, ndochita.

15 "Kana mundida munolondota milawo yangu. 16 Akale ndichanamata kunaTate, akale banomupa umwe uMbhanchi, uchaba namwi kwemisi yose, 17 Iye uMpepo wechokomende, usinotambulwa nenyika, nokuti ayumbweni kana kuunziba, imwi monounziba nokuti unogala namwi akale unoba mwamuli.

18 "Anditomusiya muli senhelela, ndoozha kwamuli. 19 Munshaji unshomanana, inyika ayitoondibona, koga imwi moondibona, nokuti ndimpenyu, namwibo moobabapenyu. 20 Nezhuba yelyo mooziba kuti ndimo munaTate bangu, akale imwi munami, akale nami munamwi. 21 Iye una milawo yangu akale eyilondota ndiye unondida, akale iye unondida unoodiwa naTate bangu, akale Imi ndinoonda akale ndoozwitondejela pachena kwaali." 22 Judasi, usiliiye Isikaliyoti, wakati kunaiye, "Tezi umutilani kuti uzwitondejele kwatili, usinozwitondejela kunyika?"

23 Jesu wakonshandula eti, Unhu kana endida, uchawhilila indayijo yangu. Tate bangu banounda, akale isu tinoozha kwaali, tite unsha wedu mwaali. 24 Yoyo usinondida aatowhilila indayijo yangu, akale nendayijo yamunowha ayitoba yangu koga ngiyaTate bakandituma.

25 "Yezwi zwinhu ndamubuja ndichilinamwi. 26 Koga uMbhanchi, uMpepo uNchena, uchatumwa naTate muzina lyangu, iye unoomulayija zwinhu zwose, akale unoomukumbuluja zwose zwandakamubuja."

27 Lunyalalo ndolusiya kwamuli, lunyalalo lwangu ndomupa, anditomupa sobwayinopa inyika. Myoyo yenu ngileke kujiijika, kana kutya. 28 Mwawha nditi kwamuli ‘Ndonda, akale ndoozha kwamuli.’ Ngana mwakabendida, mwalushantilwa, nokuti ndimunda kunaTate, nokuti Tate bakulwana kwandili. 29 Akale ndamubuja ngweno zwisanu zwatikana, kutila kuti nonsi wazwichatikana mudimbwe. 30 Andichinolebeleka zwinji namwi, nokuti untongi wenyika yeno ukumuzha. Iye aana masimba pezhulu pangu, 31 koga ndota swokundilaya kwaTate, kutila kuti inyika izibe kuti ndobada Tate.

"Milikani tinde.