1 Ngweno Jesu paakaziba kuti baFalisi, bawha kuti Jesu wakabelayija, akale ebhabhatiza eta balayijwa banji kupinda Joni, 2 (kojoba Jesu, iye nokukwe aajakabhabhatiza, asi balaijwa babe ndibo bakabe bhabhatiza) 3 Wakabhuda muJudiya akenda kuGalili kabili. 4 Asi wakabekwelela kupinda nomuSamaliya.

5 Nezwo wakezha kuguta lyeSaika limo muSamaliya, pelyo nominda waJakobe waakabapa mwananhulumyana uwe Josefa seshabo. 6 Inhiba yaJakobe yakabeli pakalepo, Jesu anyajwa nolwendo lulwe wakagala pelyo nenhiba. Kwaluba unshaji wamasikati makulwana.

7 Kwakaswika unhukaji wokuSamaliya koteka ivula, Jesu wakati kwaali, "Ndipe ivula ndinwe." 8 Noyo unshaji balayijwa babe bakabenda kuguta kunotenga zwolya.

9 Unhukaji unSamariya wakati kwaali, "Iwi unJuda, imi ndinSamaliya ungandikumbila chini ivula?" (Nokuti baJuda abatolyijana nabaSamaliya)

10 Jesu wakonshandula eti, "Ngana uziba chipo chaMwali akale kuti ndiyani ukumulebeleka yezwi kwauli eti, ‘Ndipe ivula ndinwe’ iwi waluunkumbila, akale iye walukupa ivula inopa bupenyu."

11 Unhukaji wakati kwaali, "Shungwasha amuna chokutekesa, akale inhiba inomila, munoiwana kupi ivula inopa bupenyu?" 12 Unkulwana na kupinda tate bedu Jakobe wakatipa inhiba yeyi, akanwa mwaili iye emene, nabana banhulumyana babe, nechuma chiche? 13 Jesu wakati kwaali, "Wose unonwa yeyi ivula unoba nenyota kakale, 14 asi iye unonwa yeyo ivula yandichoompa, aatoba nenyota, ivula yandichoompa, inooba mwaali ishawi, linovilila kuswikila mubupenyu businopela."

15 Unhukaji wakati kwaali, shungwasha ndipeni ivula yeyi kuti ndisibe nenyota akale, kana kuzha yokuno kooteka ivula.

16 Jesu wakati kwaali, "Inda unoshoba undume uwo, muzhe yokuno."

17 Unhukaji wakoonshandula eti, "Andina undume."

Jesu wakati kwaali, "Walebesa kuti, Auna undume. 18 Nokuti wakabeli nabalume bashanu, akale yoyu waunanaye ngweno aatoba undume uwo, yezwi wazwileba nechokomende."

19 Unhukaji wakati kwaali, "Shungwasha, ndinobona kuti mumpolofeti." 20 Matategulu edu balunamatila mudunhu yeli, koga imwi munoti kuJelusalema ndiko kuna bugalo bulosungilwa kunamatila banhu.

21 Jesu wakati kwaali, "Nhukaji ndidimbwe, unshaji ukumuzha yopo pabasinoonamata Tate pedunhu yeli kana muJelusalema." 22 Imwi munonamata zwamusinoziba, isu tonamata zwatinoziba, nokuti luchijo lunova kuba Juda. 23 Koga unshaji ukumuzha, akale waswika ndingweno, yopo banodimbwa zwechokomende banoonamata Tate mumpepo nomuchokomende, yabo ndibo Tate babanoshaka kuti bebanamate. 24 Mwali umpepo, akale yabo banounamata banokwelela kuunamata mumpepo nomuchokomende.

25 Unhukaji wakati kwaali, "Ndinoziba kuti Mesiya ukumuzha (iye unoshobwa ewhi Kristo,) angozha unootipandululila zwinhu zwose."

26 Jesu wakati kwaali, "Imi ndikumulebeleka nawi ndimi iye."

27 Pakalepo balayijwa babe, bakezha. Bakachenama kuti ukumulebeleka nonhukaji, asi akuna wakati kunhukaji, "Ini zwaunoda," kana kunaJesu kuti, "Ini ulebeleka naye?"

28 Nezwo unhukaji wakasiya ihali iye yevula, akenda muguta, akati kubanhu, 29 "Izhani mubone unhulume wandibuja zwose zwandakata. Angaba iye Kristo na yoyu?" 30 Bakabhuda muguta akale bakenda kwaali.

31 Noyonshaji balayijwa babe bakombweta beti "Ndayiji ilya."

32 Koga wakati kwabali, "Ndina zyokulya zwamusinoziba imwi."

33 Balayijwa bakati kunoumwe noumwe wabo, "angaba ipo na woombuzila zwokulya?"

34 Jesu wakati kwabali, "Kulya kwangu kuta chido choyo wakandituma, akale nokupejisa unshingo uwe. 35 Imwi amutosoti, ‘Kuchina myeji mina yasala, kova kuzha kuvuna na?’ Ndomubuja kuti ilingani, mubone kuti muminda mwachena kale kwakwelela kuvunwa. 36 Iye unovuna, unowana indipo akale unobunganya michelo kobupenyu businopela kutila kuti umbyali nounovuna beshante panu pamwempela. 37 Nokudalo chichimbe chinolebesa chinoti, ‘Umwe unobyala akale umwe unovuna.’ 38 Ndakamutuma kuti muvune yezwo zwamusakashinga, bamwe bakashinga, akale imwi mwakavuna pabakashinga ibo."

39 BaSamaliya banji bomuguta yeli bakadimbwa kunaJesu pezhulu pobusumikiji bonhukaji yoyu wakati, "Wandibuja zwose zwandakata." 40 Nokudalo BaSamaliya pabakezha kwaali, bakonkumbila kuti egale nabo, akale wakagala kwakale mazhuba mabili.

41 Akale banji kasa bakadimbwa pezhulu pamawhi aJesu. 42 Bakati kunhukaji, "Atichinodimbwa nokuda kwamawhi awo, nokuti tazwiwhila toga, akale taziba kuti yoyu chokomende unchiji wepasi lyose."

43 Mushule mwamazhuba mabili wakenda kuGalili. 44 Nokuti Jesu nokukwe wakabati, "umpolofeti aatokujwa munyika iye." 45 Nokudalo paakaswika kuGalili, baGalili bakontambula, nokuti bakababona zwose zwaakabata muJelusalema kumiliya, nokuti naibo bakabenda kumiliya yePasika. 46 Wakenda akale kuKana muGalili, yoko kwakabashandula ivula ikabe waini. Akale kuKapenawomi kwakabeli nontungamili walulwalilwa nomwananhulumyana. 47 Paakawha kuti Jesu wava kuJudiya waswika muGalili, wakenda akoonkumbila kuti ende enochija mwananhulumyana uwe, nokuti wakaba alobofa. 48 Jesu nezwo wakati kwaali, "Kuzhe kokuti mubone zwitondejelo nozwishamiso amutodimbwa."

49 Untungamili wakati kwaali, "Shungwasha, delela, mwana wangu esanhu afa."

50 Jesu wakati kwaali, "Inda mwananhulumyana uwo unochila."

Unhulume yoyu wakadimbwa iwhi Jesu lyakalebeleka kwaali, akanyamuka akenda kumba kukwe. 51 Paakaba enda, bashingi babe bakontandamija bakombuja kuti mwananhulumyana uwe wachila.

52 Nezwo wakababhuza unshaji paakatanga kupabula, bakati kwaali, "Zhilo neawa yotanga yamasikati makulwana, kupisa mbili nokululuma kwakapela." 53 Tate bakaziba kuti ndiwo unshaji Jesu paakati kwabali, "Mwananhulumyana uwo uchachila," akale iye nokukwe wakadimbwa, nemhuli iye yose.

54 Ngweno chaluba chishamiso chabili yechi, Jesu chaakata abuya eva kuJudiya enda kuGalili.