1 Mushule mwezwi, kwakaba namabhiko abaJuda, akale Jesu wakenda kuJelusalema. 2 Ngweno muJelusalema peshubo lyeMhwizi, kwaluba negandwa lyaluwhi muchiHebhelu Bhetisaida, lyaluba lyakazyungulukwa notutumba tushanu. 3 Mututumba kwakabelilele banhu banji bakabelwala, mapofu, makosha, nabakakokonyala, 4 *bekamilila kukovongwa kwevula nokuti ingilozi yaShe yakabekwenda noumwe unshaji, mugandwa ikovonga ivula, yoyo walutanga kungwina mushule mwokukovongwa kwevula wakabechiliswa kuva mubulwaji cheninge bupi bwaalulwala. 5 Umwe unhulume wakabelipo, wakabalwala kwamakole makumi matatu anatushanu tunatutatu. 6 Jesu paakaumbona, wakaziba kuti waluba akalala kwonshaji undefu, wakombhuza eti, "Unoda kuchila na?"

7 Unhulume unolwala wakashandula eti, "Shungwasha imi andina unhu angandibiga mugandwa pakunokovongwa ivula, asi yopo kana ndinda umwe unongwina mbeli kwangu."

8 Jesu wakati kwaali, "Nyamuka, utole bushasha ukwende." 9 Pakalepo unhulume wakachila, akatola bushasha bubwe akakwenda. Yeli lyaluba izhuba lyesabata. 10 BaJuda bakati kunhulume waluba achiliswa, "Nasi isabata azwipo pamulawu kuti unyamule bushasha bubo."

11 Koga wakabashandula eti, "Unhulume wandichilisa wati kunami, ‘Tola bushasha bubo ukwende.’ " 12 Bakombhuza beti, "Ndiani unhulume wakubuja kuti utole bushasha bubo ukwende?"

13 Ngweno unhulume wakaba achiliswa aajakaziba kuti ndiani, nokuti Jesu wakababhuda, sezwo kwaluba nebunga lyabanhu mubugalo yobo. 14 Mushule mwezwo, Jesu wakongwana mutempeli akati kwaali, "Linga wachila, usichinye kabili, kutila kuti usiwilwe nezwikulwana kupinda yezwi."

15 Unhulume yoyu wakabhuda akanobuja baJuda kuti ndiJesu woonchilisa. 16 Yezwi ndizwo zwakatisa kuti baJuda boonshetesa Jesu nokuti wakabeta yezwi nezhuba lyesabata. 17 Koga Jesu wakabashandula eti, "Tate bangu bakumushinga, nami ndikumushinga."

18 Yezwi ndizwo zwakatisa kuti baJuda bedisise kasa kuumbulaya, nokuti aajakataluka mulawo wesabata chete koga wakabeshoba Mwali kuti ndiTate babe, ezwikwelanisa naMwali.

19 Jesu wakati kwabali, ndinolebesa nditi kwamuli, Mwananhulumyana apana zwaangate ega, asi unota zwaanobona zwitiwa naTate babe, nezwo zwose zwinotiwa naTate, zwinotiwa bo noMwananhulumyana. 20 Nezwo Tate banoda Mwananhulumyana, akale banontondeja zwose zwabamuta, banoontondeja mishingo mikulwana kuna yeyi, zwokuti munooshama. 21 Sezwo Tate bemusa bakafa akale bebapa bupenyu, zwili alo, Mwananhulumyana unopa bupenyu kunaabo baanoda kupa bupenyu. 22 Tate abatotonga unhu, koga bakapa isimba lyose lyokutonga kuMwananhulumyana, 23 kuti bose bekuje Mwananhulumyana somubanokuja Tate. Iye usinokuja Mwananhulumyana aatokuja Tate bakontuma.

24 Ndolebesa nditi kwamuli, iye unowhilila iwhi lyangu akale edimbwa munaiye wakandituma, una bupenyu businopela akale aatotongwa koga unobabhuda mulufu akangwina mubupenyu. 25 Ndolebesa nditi kwamuli, unshaji ukumuzha akale ndingweno yopo bakafa pabanowha iwhi lyoMwananhulumyana waMwali akale yabo banoliwha banoolalama. 26 Sezwo Tate bana bupenyu mwabali, nezwo bakapa Mwananhulumyana kuti ebe nobupenyu mwaali, 27 akale bakompa isimba lyokutonga nokuti Mwananhulumyana woNhu. 28 Musishamiswe nezwi, nokuti unshaji ukumuzha yopo bose baimo mumakumbu banowha iwhi lilye, 29 akale banoobhuda mumakumbu abo, yabo bakata zwibuya banoomuka bebe bapenyu, akale yabo bakata zwibi banoomukila kunotongwa.

30 Apana zwandinotubula kuta nesimba lyangu, ndotonga sokubujwa naMwali, akale kutonga kwangu kwakalulama nokuti anditoshaka kuda kwangu asi kuda kwoyo wakandituma.

31 Kana ndizwisumikijila, busumikiji bwangu abutoba bwechokomende, 32 upo umwe unosumikija kwandili akale ndinoziba kuti busumikiji bwaanopa nezwangu ngobwechokomende. 33 Mwakatuma bamwe banhu kunaJoni, akasumikija ichokomende. 34 Zwisi zwokuti ndinobimba nobusumikiji bwandikumutambula kuva kubanhu, asi ndinoleba yezwi kuti muchijwe. 35 Joni wakabeli chimuniko chakabetutuma chingaima, akale imwi mwakashantila untutumo uwe kwonshaji unshoma. 36 Asi busumikiji bwandinanabwo bukulwana kupinda bwaJoni, nezwo mishingo yandakapiwa naTate kuti ndipejise, yeyi mishingo yandikumuta, inobuza busumikiji bwokuti Tate bakandituma. 37 Akale Tate bakandituma ibo bakanditila busumikiji. Iwhi lyabo amujanu mwaliwha, amujanu mwabona zwabali, 38 akale amuna iwhi lilye munamwi, nokuti amutoundimbwa yoyo waatuma. 39 Munotokoloja makwalo Machena, nokuti munoyeya kuti munowana bupenyu businopela mwaali, akale yayo makwalo ndiwo anobuza busumikiji bwangu, 40 asi munolamba kubuya kwandili kuti mube nobupenyu.

41 Anditotambula kukujwa kunova kubanhu. 42 Koga ndinomuziba. Ndoziba kuti amuna ludo lwaMwali mwamuli. 43 Ndezha muzina lyaTate bangu asi amutonditambula, koga umwe angozha nezina lilye, munoontambula. 44 Mungadimbwa chini, imwi munotambula lukujo kuva kunoumwe noumwe, asi musinoshaka lukujo lunova kunaMwali chete. 45 Musiyeye kuti ndinomupa undandu kunaTate. NdiMozesi ukumumupa undandu kuna yoyo wamunobimba naye. 46 Kana mwakadimbwa munaMozesi, mwaludimbwa munami, nokuti wakakwala nezwangu. 47 Asi kana musinodimbwa mumakwalo awe, mungawadimbwa chini mawhi angu?