1 "Ndinolebesa ndinoti kwamuli, Iye usinongwina nopankoba wedanga lyemhwizi koga etanha nelimwe ibhazu, yoyu unhu imbava akale umpambi, 2 asi iye unongwina nopankoba ndiye undyisi wemhwizi. 3 Undindi unounzhulila ishubo, imhwizi jinowha iwhi lilye, akale unoshoba imhwizi jije namazina ajo, ejitungamilila pakubhuda. 4 Kana ajibhisa jose, unokwenda mbeli kwajo, kova imhwizi jiuntobela nokuti jinoliziba iwhi lilye. 5 Ajitotobela umvakule, koga jinountizha nokuti ajitoliziba iwhi lyomvakule."

6 Jesu wakaleba unkwejaniso yoyu kwabali, asi abajakawhisisa, zwaakaba, eleba kwabali.

7 Jesu wakapamha akati kwabali, Ndinolebesa ndinoti kwamuli, ndimi unkoba wemhwizi. 8 Imhwizi ajijakabawhilila bose bakanditangila kuzha, nokuti imbava nabapambi. 9 Ndimi unkoba, aani nani unongwina nomunami, unoochijwa akale unongwina ebhude, ewane machelelo. 10 Imbava inozhila kukwiba, nokubulaya nokupalaja chete, koga ndakezha kuti bewane bupenyu, akale buzhele.

11 Ndimi uNdyisi umbuyanana, uNdyisi umbuyanana unopila bupenyu bubwe kumhwizi. 12 Unshingi unchenekwa, usili undyisi kana mweni wemhwizi, paanobona ibhele lizha, unotizha ejisiya imhwizi, ibhele linobwezha jimwe, kova lijitataula. 13 Unotizha nokuti unchenekwa, akale aanani nemhwizi. 14 Ndimi uNdyisi umbuyanana, ndinojiziba imhwizi jangu, akale naijo jangu jinondiziba, 15 sezwo Tate bendiziba nami ndinobaziba Tate, ndinopila bupenyu bwangu kumhwizi. 16 Akale ndina jimwe imhwizi jisili jelino idanga, naijo ndinokwelela kujibuza akale jinoowha iwhi lyangu. Nezwo jinooba idanga limwempela noNdyisi umwempela.

17 Pezhulu pechisoko yechi, Tate banondida nokuti ndinopila bupenyu bwangu kutila kuti ndibutole kabili. 18 Apana anganditolela ibwo, koga ndobupila nokuda kwangu. Ndinesimba lyokubupila, akale ndinesimba lyokubutola kabili, yoku kulayila ndakakutambula kuva kunaTate bangu.

19 Kwakaba nokukakabajana kabili, pakati pabaJuda pezhulu pamawhi yaya. 20 Banji babo bakati, "Unanedimoni akale unopenga, ini munwhilila?"

21 Bamwe bakati, "Yeji ajitoba indebo jonhu unane dimoni. Idimoni lingata mesho ebhofu kuti ebone na?"

22 Kwakabeli nemiliya yokupila itempeli kuJelusalema nonshaji wemhepo, 23 akale Jesu wakabekwenda mulubazhe lwetempeli lyaSolomoni. 24 Nezwo batungamili babaJuda bakonkomboloja bakati kwaali, "Uchaswika lini utisiya tikakahajika? Kana uli Kristo tibuje pachena."

25 Jesu wakabashandula eti, "Ndamubuja asi amutodimbwa. Mishingo yandinota muzina lyaTate bangu, ndiyo inondisumikijila. 26 Asi amutodimbwa nokuti amutoba imhwizi jangu. 27 Imhwizi jangu jinoliwha iwhi lyangu, akale ndinojiziba nayijo jinonditobela. 28 Ndinojipa bupenyu businopela, ajitoopalala, akale akuna angajivupula mumaboko angu. 29 Tate bangu bakandipa ijo, bakulwana kupinda bose akale akuna unotubula kujivupula muluboko lwaTate. 30 Imi naTate tibamwempela."

31 BaJuda bakatola mabwe kabili kuti bompubule, 32 koga Jesu wakabashandula akati, "Ndakamutondeja mishingo yangu mibuya yakava kunaTate, biya munondipubulila upi?"

33 BaJuda bakonshandula bakati, "Atitokupubulila mishingo mibuya koga kuti watuka Mwali nokuti iwi uli unhu unozwita Mwali!"

34 Jesu wakabashandula akati, "Azwijilokwalwa na mumulawo wenu kuti, Ndati muli bamwali." 35 Kana akabashoba kuti bamwali kunabo kwakaswika iwhi lyaMwali, asi lukwalo luchena alungatalukwe, 36 imwi munoti iye wakashalujwa naTate akatumwa munyika, "Unotuka Mwali nokuti ndati, ‘NdiMwananhulumyana waMwali?’ 37 Kana ndisinota mishingo yaTate bangu, nezwo musindidimbwe, 38 koga kana ndiita, kojoba musinondidimbwa imi, asi dimbwani mumishingo, kutila kuti muzibe akale muwhisise kuti Tate bayimo mwandili nami ndimo munaTate "

39 Bakakweja akale kuunsunga koga wakapujumuka mumaboko abo.

40 Wakabhuda akenda, museli mwolwizi Jolodani, kubugalo bwaakatangila Joni kubhabhatizila, akasala elikwakale. 41 Banhu banji bakezha kwaali bakati, "Joni aajakata zwishamiso," koga zwose zwinhu zwaakaleba pezhulu poyu unhu ilebeswa. 42 Banji bakadimbwa mwaali kubugalo yobo.