1 Mushule mwezwi Jesu wakenda kunelimwe ibhazu lyegungwa lyeGalili, lyakabewhi akale Taibheliyasi. 2 Akale ibunga igulwana lyakontobela, nokuti bakababona zwishamiso zwaakata echilisa balwaji. 3 Jesu wakatanha mudunhu, akale mwakale akagala pasi nabalayijwa babe. 4 Pakalepo unshaji wePasika, miliya yabaJuda wakababapelyo. 5 Paakalinga, wakabona ibunga igulwana lizha kwaali, Jesu wakati kuna Filipu, "Ndikupi kwatingatenga chinkwa, kuti banhu yaba belye?" 6 Yezwi wakazwileba onkweja, nokuti iye nokukwe wakabeziba kuti walutani.

7 Filipu wakonshandula eti, "Indipo yemyeji mishanu ina umwempela, aingatenge chinkwa chinokwana kuti umwe noumwe wabo ewane kababi."

8 Umwe wabalaijwa babe Endulu, mwanakwaina waSimoni Pita wakati kwaali, 9 "Pana umbisana yopano unazwinkwa zwebhali zwishanu nehobe imbili, koga yezwi zwingatani pabanhu bose yaba." 10 Jesu wakati kwabali, "Gajikani banhu pasi." Pakalepo pabugalo yobo pakabelina buhwa bunji, sezwo banhulume bakagala pasi, bakabeli bangaswika zwiulu zwishanu. 11 Kova Jesu etola zwinkwa, eboka, paakapeja, wakakobela yabo balubabeligele. Akabakobela nehobe naijo, bakalya madilo. 12 Akale pabakati baguta, wakabuja balayijwa babe eti, "Bunganisani zwimedu zwasala kusibe nezwichalashika." 13 Bakabunganisa, bakazhaja zwizuma igumi nezwibili zwezwimedu zwakava muzwinkwa zwishanu zwebhali, zwakasiyiwa naabo bakalya.

14 Banhu pabakabona chishamiso chaakata, bakati, "Yoyu ndiye chokomende umpolofeti, uchezha munyika." 15 Jesu aziba kuti bakumuda kuuntola nesimba kuti bounte she, Jesu wakabhuda akabwilila akale mudunhu eli ega.

16 Kwaba madekwana, balayijwa babe bakabhulukila kugungwa, 17 bakangwina mubwato bukulwana, benda museli kuKapenaumi. Kwakabaswibha, akale Jesu aajakabanu aswika kwabali. 18 Igungwa lyakanyamuka nokuti kwakabakupunga ibhepo linesimba. 19 Bakati bayuwa, bakwenda makilomita angaba mashanu kana mashanu nelimwe, bakabona Jesu ekwenda pezhulu pegungwa akale esendela pelyo nobwato. Bakatya, 20 koga wakati kwabali, "Ndimi, musitye." 21 Pakalepo bakountambula mubwato, akale pakalepo bwato bwakaswika kunyika kwabakabenda.

22 Nezhuba linotobela, banhu bakabasala kunelimwe ibhazu lyegungwa bakababona bwato bumwempela chete kwakale, akale Jesu aajakabangwina mubwato nabalayijwa babe, asi kuti balayijwa babe bakabenda boga. 23 Koga, mato anova kuTayibheliyasi akasendela pelyo noopo pabakabalyila chinkwa mushule mokuboka kwaTezi. 24 Banhu pabakabona kuti Jesu aajakabelipo, kana balaijwa babe, ibo nokwabo bakangwina mumato yayo bakenda kuKapenaumi, beshaka Jesu.

25 Pabakongwana museli lyegungwa bakati kwaali, "Ndayiji wezha lini yokuno?"

26 Jesu wakabashandula eti, "Ndolebesa nditi kwamuli, mondishaka, kusi kuti mwabona zwishamiso, asi pezhulu pokuti mwakalya mukaguta zwinkwa. 27 Musizwinyaje nezwokulya kunopela, koga kulya kwemisi isinopela, kwamunopiwa noMwananhulumyana woNhu, nokuti paali Mwali Tate bakabiga imhande yabo."

28 Kova beti kwaali, "Ini zwatilokwelela kuta, kuti tibeta mishingo yaMwali?" 29 Jesu wakabashandula eti, "Yoyu ndiwo unshingo waMwali, kuti mudimbwe munooyo waakatuma."

30 Nokudalo bakati kwaali, "Ngweno ngechipi chitondejelo chauchata, kuti tibone, akale tikudimbwe? Mishingo ipi yaunota? 31 MaTate edu akalya imana mugwegulu, sezwakakwalwa kuwhi, ‘Wakabapa chinkwa chakava kudenga kuti belye.’ "

32 Jesu wakati kwabali, "Ndinolebesa nditi kwamuli," Mozesi zwakamupa aatoba chinkwa chinova kudenga, Tate bangu ndibo banomupa chinkwa chechokomende, chinova kudenga. 33 Nokuti chinkwa chaMwali ndicho chinobhuluka chiva kudenga, akale chipa inyika bupenyu. 34 Bakati kwaali, "Tezi tipeni chinkwa yechi unshaji wose."

35 Jesu wakati kunaibo, "Ndimi chinkwa chobupenyu, yoyo unozha kwandili aatofa nenzhala, noyo unodimbwa kwandili aatofa nenyota. 36 Koga sezwandakaleba kwamuli, kuti mwandibona imi asi amutodimbwa 37 Bose yabo bandinopiwa naTate bangu banoozha kwandili, akale yoyo unozha kwandili, anditoontatamilila kuzhe. 38 Nokuti ndakabhuluka ndiva kudenga, kusi koota chido changu, asi chido choyo wakandituma, 39 akale yechi ndicho chido choyo wakandituma, kuti ndisilashikilwe kana nomwempela waabo bose baakandipa, koga kuti ndibamuse muzhuba lyokupejeleja. 40 Nokuti, yechi ndicho chido chaTate bangu, kuti wose unobona Mwananhulumyana akale edimbwa mwaali unooba nobupenyu businopela, akale imi ndoomusa nezhuba lyokupejisila."

41 BaJuda bakanyunyuta, nokuti wakati, "Ndimi chinkwa chakabhuluka chiva kudenga." 42 Bakati, "Yoyu aatoba Jesu, mwananhulumyana waJosefa, unatate namai batinoziba na? Biya unoleba chini ngweno kuti, ‘Ndakabhuluka ndiva kudenga.’ "

43 Jesu wakabashandula eti, "Musingungune mukati mwenu. 44 Apana angezha kunami, kuzhe kokuti Tate bakandituma bebabuze, akale ndinoobamusa nezhuba lyokupejeleja. 45 Zwilokwalwa muwhalo jabapolofeti kuwhi, ‘Akale bose banoolayijwa naMwali.’ Wose uchabaawha akale alayijwa naTate, unoozha kwandili. 46 Apana wanu abona Tate, kuzhe koyo unova kuna Mwali, iye ega ndiye wakabona Tate. 47 Ndinolebesa nditi kwamuli, iye unodimbwa una bupenyu businopela. 48 Ndimi chinkwa chobupenyu. 49 MaTate enu akalya imana mugwegulu, akale bakafa. 50 Yechi ndicho chinkwa chinobhuluka chiva kudenga, kuti unhu angalya akale esife. 51 Ndichinkwa chopenyu chakava kudenga, kana unhu angochilya chinkwa yechi, unoolalama kwemisi isinopela, akale chinkwa chandichapila kubupenyu bwenyika, umbili wangu."

52 BaJuda bakakakabajana pakati babo beti, "Yoyu unhu, angatipa chini umbili uwe kuti tilye?"

53 Nokudalo Jesu wakati kwabali, "Ndolebesa nditi kwamuli, kuzhe kokuti mulye umbili woMwananhulumyana woNhu akale munwe ilopa lilye, amuna bupenyu mwamuli, 54 iye unolya umbili wangu akale enwa ilopa lyangu una bupenyu businopela, akale ndoomusa nezhuba lyokupejeleja 55 nokuti umbili wangu kulya kwechokomende, akale ilopa lyangu chinwiwa chechokomende. 56 Iye unolya umbili wangu akale enwa ilopa lyangu, unogala mwandili akale namibo ndogala mwaali. 57 Sezwo Tate bapenyu bakandituma, akale nokuti ndolalama nokuda kwaTate, neezwo yoyo unondilya, unoolalama nokuda kwangu. 58 Yechi ndicho chinkwa chakabhuluka chiva kudenga, chisili sechakalyiwa namatate enu akafa, yoyo unolya chinkwa yechi unoolalama kwemisi isinopela."

59 Yezwi wakazwileba paakabelayija elimusinagogi, muKapenaumi.

60 Banji babalayijwa babe, pabakazwiwha yezwi bakati, "Yeyi indebo indemu, ndiani angaitambula?"

61 Koga Jesu, ezwiziba emene kuti balayijwa babe bakumungunguna nazwo, wakati kwabali, "Zwinomunenguja na yezwi? 62 Mukangobona Mwananhulumyana wonhu etanha ebwilila kudenga kwaakabeli pakutanga ke? 63 UMpepo ndiye unopa bupenyu, umbili aunanshingo, mawhi yaya andalebeleka kwamuli uMpepo nobupenyu. 64 Koga pana bamwe benu basinodimbwa." Nokuti Jesu wakabeziba kuvila pakutanga kuti ndibani basilodimbwa, akale nokuti ndiani walooncheta. 65 Akale wakati, "Ndizwo ndakamubuja kuti apana unozha kwandili kuzhe kokuti azwipiwa naTate."

66 Mushule mwezwi, bunji bwabalayijwa babe bakabwilila shule akale abajakaba bechinokwenda naye. 67 Jesu wakati kuna baligumi nababili, "Namwibo mumuda kunda na?"

68 Simoni Pita wakonshandula eti, "Tezi tingenda kunaani? Iwi ndiwi una mawhi obupenyu businopela. 69 Akale isu tadimbwa, tikaswika pakuziba kuti ndiwi uNchena waMwali."

70 Jesu wakabashandula eti, "Andijakamushala na imwi, baligumi nababili? Akale umwe wenu ndiguluzhanje." 71 Wakabeleba Judasi mwananhulumyana waSimoni Isikaliyoti, nokuti iye, umwe wabaligumi nababili ndiye walooncheta.