1 Wakanyamula mesho awe akabona bafumi bebiga zwipo zwabo munsangwa yompilo, 2 akabona inchilikaji yaluba unsheti ibiga makobeli mabili. 3 Wakati iye, "Chokomende ndinomubuja, yeyi inchilikaji inosheta yabiga zwinji zwinopinda zwabamwe bose, 4 nokuti bose yaba babiga zwibavubula mufuma yabo, inchilikaji yakakuhumula zwose zwayakabeli nazwo pakulalama kwayo."

5 Bamwe pabakabelebeleka nokuyebeka kwetempeli namabwe mabhodo akale nezwipo zwakabepilwa, iye wakati, 6 "Zwose yezwi zwinhu zwimubweni, unshaji unooswika wokuti apana ibwe limwempela lichoosala likabambwa pezhulu pelimwe, lisakolomolelwa pasi."

7 Bakombhuza bakati, "Ndayiji, biya zwinootikana lini yezwi, akale, ini chichaba chitondejelo chokuti zwalobotikana?"

8 Iye wakati, "Chenjelani musichengwe, nokuti banji banoozha muzina lyangu beti, ‘Ndimi iye!’ akale beti, ‘Unshaji wabapelyo!’ Musibatobele. 9 Musitye kana muwha jihondo nokumukilana, nokuti yezwi zwinokwelela kuti zwitikane tangwa, kupela akutokambija kuswika." 10 Wakati akale kwabali, "Inyika imwe inoomukila imwe inyika, nobushe bunoomukila bumwebo bushe, 11 kunooba nokudengunuka kukulwana kwenyika, ibhamba, malwaji, nozwitiko zwibi kunabose bugalo, akale kunooba nezwitondejelo zwinotyisa zwiva kudenga. 12 Asi zwisanu zwatikana zwose yezwi, banoomusunga nokumuyangatisa, akale bemusenga mumasinagogo nokumubiga muntolongo, munoomiswa mbeli kwamashe nabatongi pezhulu pezina lyangu. 13 Yoyu unooba unshaji wenu wokuti musumikije. 14 Nokudalo zwiyeyeni mumyoyo yenu, kutila kuti musizwinyaje kuti munooshandula mutini, 15 nokuti imi ndoomupa mawhi namaano anoota kuti babengi benu bekonwe kumuzunda kana kumukakabaja. 16 Munoosengwa kwabali nabazwali, nabanakwaina benu, akale nabakwaina benu, bamwe benu banoobulayiwa, 17 Munoobengwa nabanhu bose pezhulu pezina lyangu. 18 Asi apana kana limwempela lyesusu munsholo mwenu lichoolashika. 19 Mukusima kwenu munoowana bupenyu.

20 "Kana mukabona Jelusalema yazyungulukilwa nabalwi, zibani kuti kupalajwa kwayo kwaba pelyo. 21 Nokudalo lekani yabo baiko kuJudiya betizhile kumatunhu, nayabo baimo mukati mweguta bebhude, naabo baiko kumizi besingwine, 22 nokuti yaya ndiwo mazhuba olubwilizilo, kuti zwose yezwo zwakakwalwa zwizhajikijwe. 23 Mayee kunabo banemimba, namamai banomwisa munayo mazhuba! Kunooba neshungu penyika nolunya kuluji yolu, 24 banoobulayiwa negwalabaza akale banoopambilwa kunyika jose, neJelusalema linootobwa namakumbo abokuzhe kujine unshaji wabo bokuzhe wazhajikijwa.

25 "Kunooba nezwitondejelo zwichatikana kuzhuba, kumweji nokunyenyeji, nopenyika induji jinooba neshungu, jinyajwa nokukampa nontimbo wegungwa, 26 banhu banoopela isimba nokutya akale nokumilila zwinobezha munyika, nokuti masimba edenga anoodengunuka. 27 Akale banoobona mwananhulumyana wonhu ezha elimugole elinamasimba nolukujo lukulwana. 28 Kana zwinhu yezwi zwatanga kutikana, nyamukani, munyamule misholo yenu mulinge zhezhulu, nokuti luchijo lwenu lwaba pelyo."

29 Wakababuja unkwejaniso eti, "Lingani unkuyu neimwe yose miti, 30 Ikangotangisa kukwinila, momuka nokuziba kuti izhizha lyaba pelyo. 31 Nokudalo, mungobona zwinhu yezwi zwitikana, zibani kuti bushe bwaMwali bwaba pelyo.

32 "Ndinolebesa nditi kwamuli, chizekululu chisanhu chapinda, zwose yezwi zwinhu zwinooba zwatikana. 33 Idenga nenyika zwinoopela, koga mawhi angu aatoopela.

34 "Zwichenjeleleni kuti myoyo yenu isibhatikane nobuhungu, nokukolwa, nokulakamila zwobupenyu, kuti yelyo izhuba lisoomuswikila musinoliyeyela, 35 nokuti linoozha pezhulu ponhu wose upo penyika. 36 Nokudalo galani mwakabhwazula, munamata kuti mube nesimba lyokutizha zwose zwichootika, nokuma mbeli kwoMwananhulumyana woNhu."

37 Akale mazhuba ose wakabelayija muTempeli, asi nonshaji wamadeko wakabenda kunolala mudunhu linowhi Olivi. 38 Zhingwanangwana, banhu bose bakabezha kwaali koonwhilila mutempeli.