1 Nelimwe izhuba lyeSabata wakenda kungumba youmwe unkulwana wabaFalisi kuti enolya naye, bakaba bakondingisisa. 2 Unhu waluba ekazwimba umbili wakabeli mbeli kukwe. 3 Jesu wakalebeleka kubalayiji bomulawo nabaFalisi eti, "Zwipo pamulawo kana nee, kuchilisa nezhuba lyeSabata?"

4 Asi ibo bakawhilijila. Jesu wakontola akonchilisa, kova ondeka kuti ende. 5 Wakati kwabali, "Ndiyani wenu unoti eli nomwana kana inkabe yawila munhiba nezhuba lyeSabata, esinokambijisa kuyibhisa kojoba lili izhuba lyeSabata?"

6 Asi bakakonwa kunshandula panezwi.

7 Ngweno wakababuja unkwejaniso yabo bakabakokwa, abona bamwe bezi beshala bugalo bwechilemeso, akati kwabali, 8 "Kana wakokwa kumabhiko omuchado, usigale pechigalo chobulemeso, nokuti posa unhu unolemekejwa kupinda iwi angaba ekakokwabo, 9 iye wamukoka mose angezha kova eti kunawi." "Ipa chibhula yechi kunoyu, yezwi zwinokupisa ishoni nokuti unonyamuka ukanogala pechigalo chabanhukoga" 10 Asi kana wakokwa, inda unogala pechigalo chabanhukoga, kutila kuti angoswika unkoki, unoti kwauli, nkwaina, inyamuka, unogala mbeli nokudalo yezwi zwinopa kulemeswa kwauli pakati pabanhu bose baunobeligele nabo. 11 "Nokuti yabo banozwikuja banooninipiswa, akale yabo banozwininipisa, banookujwa."

12 Wakati kunoyo wakabonkoka, "Kana uda kukoka bamwe kuti belye nawi, chilayilo kana mabhiko, usishobe bakwaina babo, kana bakulu babo namakamu awo kana babakijani balofuma, nokuti bangookukokabo, kova wobwilizilwa indipo iyo. 13 Asi kana wata mabhiko, koka basheti, namakosha namapofu, 14 ungodalo unookombolelwa, nokuti yaba abana zwokukubwilizila. Unoobwilizilwa nezhuba lyokumuka kwabakalulama."

15 Umwe waabo wakabelya naye wakati awha yezwi wakati kwaali, "Ulokombolelwa yoyo uchoolya chinkwa mubushe bwaMwali!"

16 Koga Jesu wakati kwaali, "Kwakabeli nonhu wakata mabhiko makulwana, akakoka banhu banji 17 pawakaswika unshaji wamabhiko wakatuma unshingi uwe kuti enoti kunayabo baakabakoka, ‘Izhani nokuti zwose zwabambanyilwa.’ 18 Asi bose bakatanga kukumbila lubhatilo. Wotanga wakati kwaali, ‘Ndatenga minda, ndilokwelela kunda kunoombona, undibhatile nche.’ 19 Umwe wakati, ‘Ndatenga zwipani zwishanu zwenkabe, feno ndimunda kunozwikweja, undikumbilile lulekelelo.’ 20 Umwe neebo wakati, ‘Ndava mukulobola ngweno, nokudalo anditotubula kuzha.’ 21 Nezwo unshingi wakabwilila kuna tezi uwe akombuja. Mweni wengumba wakalutila akati kunshingi, ‘Kambija inda kumigwagwa nomujinzila jomuguta, ubuze yopano basheti naabo banabukosha namapofu nabanoshuja.’ 22 Unshingi wakati, ‘She ndata sokuleba kwenu; asi bugalo buchimo.’ 23 Tezi wakati kunshingi, ‘Inda kumigwagwa nomutunzila tutukutuku ubahatamije banhu kuti bezhe, kutila kuti ingumba yangu izhale.’ 24 Ndinomubuja apana kana umwe wabo bakabakokwa uchalabila chilayilo changu!"

25 Wakabekwenda nebunga lyabanhu banji liuntobela; wakachingunuka kwabali akati, 26 "Kana unhu ezha kwandili esinobenga tate babe, namai babe, nonkaji uwe, nabana babe, nabakazwaji babe bechinhulume, nabakazwaji babe bechinhukaji, eya nobupenyu bubwe aangabe undayijwa wangu. 27 Aani naani usinonyamula unchinjikwa uwe, enditobela, aangabe undayijwa wangu. 28 Ndiyani pakati penu unoti kana eda kubaka bushozhi, esinotanga agala pasi tangwa ezibe kuti unemalini akale unanayo na imali yokushingisa kuswikila kubaka kupele? 29 Kana esinota alo, aatotubula kupeja kubaka bushozhi, unojibila kubaka mabambo chete, bose banozwibona banoonseka, 30 beti, ‘yoyu wakatanga kubaka asi wakakonwa kupeja kubaka.’ 31 Kana ndiupi she unonda kuhondo kunolwana noomwe She esinotanga kugala pasi, eyeyesesa kuti igumi lyezwiulu zwabalwi babe linotubula kulwana nooyo She, unamakumi mabili ezwiulu zwabalwi? 32 Kana abona kuti unokomwa unomuka nokutuma umililili uwe kuti enombwetela lunyalalo bechikule kutila kuti beve bawhanana. 33 Nokudalo," Jesu wakati, "Aani naani usinolamba chose chuma chiche aangabe undayijwa wangu."

34 "Munyu umbuya, koga kana washampuluka, ungalweleswa neni akale? 35 Auchina nshingo kuvu kana kulwi lwomfhuje, banhu banondasha. Unenzebe jokuwha ngeewhe."