1 Panoyo unshaji bakabelipo bamwe bakabuja Jesu nozwabaGalili bakabulayiwa naPilato banelopa lyabo lyakaba lyashanganiswa nompilo wabo. 2 Wakabashandula akati, "Imwi moyeya kuti ibo baGalili yaba, bakaba beli bachinyi bakulwana kupinda bamwe bose baGalili nokuti bakayabula alo? 3 Ndinomubuja, mane abajakadalo, koga kana musinoshanduka, mwose moopalala saibo. 4 Kana yabo igumi lina bashanu bana batatu bakafa bechigwa pakuwilwa nobushozhi boku Silomu, imwi moyeya kuti yabo bakabeli bachinyi kupinda bose banhu balugala muJelusalema? 5 Ndinomubuja nditi mane, kana musachingunuka, mwose moopalala saibo.

6 Wakababuja yoyu unkwejaniso, eti: "Umwe unhulume wakabyala unkuyu muchilili chiche chonzhambi, wakangwina kuti enochela ihuyu mukati, asi apana unchelo waakawana. 7 Wakati kunshingi uwe womuchilili, ‘Lingapela mumakole ose matatu apinda ndizha kwopota ihuyu munkuyu yoyu, apana chindanu ndawana. Unteme unti yoyu! Ini upeja kulya muvu lyangu?’ 8 Iye wakonshandula eti, ‘Tezi unsiye kwegole pela tibone, ndunshakulile mumbali kova ndibiga umfhuje. 9 Kana ukazwala michelo igole limuzha, panobeli pabuya, koga ukakonwa mungontema zwenu."’

10 Jesu wakabelayija musinagogi nezhuba lyeSabata. 11 Kwaluba nonhukaji wakaba eli nompepo umbi wakaba wondwajika kwamakole igumi lina mashanu ana matatu unshana uwe wakabakakovomala esinotubula kuma ekakololoka. 12 Paakati Jesu ombona, wakonshoba, eti kwaali, "Awe nhukaji wasupulwa mubulwaji bubo." 13 Wakabiga maboko awe panaiye, akava akololoka unshana uwe pakalepo, akakuja Mwali.

14 Koga untungamili womusinagogi wakabipilwa nokuti Jesu wakalapa nezhuba lyeSabata, akalebeleka kubanhu bakaba belipo, akati, "Kunamazhuba mashanu ana limwe okushinga, nokudalo izhani mumazhuba yaya kuti muchiliswe, asi musizhe nezhuba lyeSabata."

15 She wakonshandula akati, "Imwi bachengeji! Apana pakati penu unosupula inkabe kana idonki muchilyilo chalyo neSabata kuti enoyinwisa na? 16 Feno hechi chizwalwa choluji lwaAbhulahamu chabakasungwa naSatani kwamakole igumi linamashanu ana matatu, aatokwelela kusupulwa mukusungwa kukwe nezhuba lyeSabata na?" 17 Paakaleba yaya mawhi, bose babengi babe bakaba neshoni, akale banhu bose bakashantilwa naizwo zwose zwishamiso zwibhodo zwaakata.

18 Nokudalo wakati iye, "Ani bushe bwaMwali bunanga seni? Ndingabutojanisa neni? 19 Bunanga sembeyu yemasitadi yakabyalwa nonhu muchilili chiche, yakakubuka ikaba unti, inyuni jinobakila zwizhumbo penhabi."

20 Akale wakati, "Ndobutojanisa neni bushe bwaMwali? 21 Bunanga somfufumuso wakatolwa nonhukaji, akabushanganisa ekwelanisa nobuswa bwekoloni bulokamulwa katatu, zwikafufumuka."

22 Wakapinda mukati mwamakuta nomumizi, elayija ekalingisa kuJelusalema. 23 Umwe unhu wakati kwaali, "Tezi, kunoochijwa bashoma chete na?"

Iye wakati kwabali, 24 "Kwejani namasimba enu kungwina nonkoba ulomanikila, nokuti banji, ndinomubuja, banookweja kungwina naiwo, asi abatootubula. 25 Kana mweni wengumba anyamuka kova ekonya idendele, imwi kwowanika mupopazhe mulimile kova mutanga kugogoja pedendele muti, ‘Tizhulileni unkoba She!’ Iye unomushandula eti, ‘Anditomuziba kuti mova kupi.’ 26 Pakalepo imwi munooti, ‘Takalya, tikanwa tilinamwi, akale mwakalayija mumigwagwa yedu!’ 27 Koga iye unooti, ‘Anditoziba kuti munova kupi, Bhudani yopa imwi bahungu.’ 28 Yopo kunooba nokulila, nokuziya kwameno, pamuchoobona Abhulahamu, naIsaki, naJakobe, naibo bose bapolofeti mubushe bwaMwali, imwi mose mwalashilwa kuzhe. 29 Banhu banooswika beva kubuvezhuba, kubumililo, kubunwanyuni nokuchamhembe, bezha kotola bugalo bwabo kumabhiko omubushe bwaMwali. 30 Lingani, baiko kumapejelejo bachooba bokutanga, bokutanga neebo bachooba bopejeleja."

31 Pakelepo bamwe baFalisi bakezha bakati kuna iye, "Bhuda yopano ukwende, nokuti Helodi umuda kukubulaya."

32 Wakabashandula eti, "Indani munobuja yeyo ihaba kuti, ‘Nasi namangwana ndinobhisa mipepo mibi nokuchilisa, nezhuba lyatatu ndobaapeja unshingo wangu.’ 33 Zwisineni kwanasi namangwana nezhuba linotobela ndilokwelela kukwenda nenzila yangu, azwilokwelela kuti undebambeli waMwali, ebulayilwe kumwe kuzhe kwokuJelusalema."

34 "Jelusalema, Jelusalema! Unobulaya bapolofeti baMwali nokupubula namabwe yabo banotumwa kunawi! Tungana ndida kubunganisa bana babo bose, seseche inofukatila tukukwana twayo mumapapilo, asi aujakada! 35 Linga ingumba yiyo inolashwa. Akale ndokubuja, auchinoondibona, kujine kuswike unshaji wauchooti, ‘Ulokombolelwa unozha muzina lyaShe."’