1 Paakapeja zwose kuleba zwaakabeda kuti banhu bewhe, wakangwina muKapenaume. 2 Untungamili wezana lyabalwi behondo, wakabeli nonshingi unodikana kwaali wakabelwalila kufa. 3 Paakawha nezwaJesu, wakatuma bakulwana bamaJuda kuti benoonkumbila kuti ezhe kwochilisa unshingi uwe. 4 Pabakaswika kunaJesu, bakanombweta kasa beti, "Ulokwelela kasa kubhanchwa namwi, 5 nokuti unoda inyika yedu akale ndiye wakatibakila isinagogi."

6 Jesu wakenda nabo. Pakati abapelyo nengumba, untungamili wabalwi wakatumila bakwaina babe kwaali kuti benoti, "She musizwinyaje nokuti anditokwelela kuti mungwine mungumba yangu; 7 nokudalo ndizwo ndayeya kuti ndizhe imi kunamwi.Koga ilebani iwhi chete unshingi wangu echijwe. 8 Nokuti imibo ndinhu upo pasi pomulawu, ndina balwi baipo pasi pangu; kuna umwe ndinoti, ‘Inda’ unonda, ndingoti kunomwe, ‘Izha’ unozha, ndikati kunzike wangu, ‘Ita yechi’ unota."

9 Jesu paakawha mawhi yaya wakachenama, akachebuka, akati kubanhu bakabontobela, "Ndinomubuja andijanu ndawana kudimbwa kukulugulu kwakadai kana muIzilayeli."

10 Bakati yabo bakabatumwa pabakabwilila kungumba bakawana unshingi wakabelwala, achila.

11 Kuva yopo wakenda kuguta lyeNaini epelekejwa nabalayijwa babe pamwempela nabanhu banji. 12 Paakati aba pelyo neshubo lyeguta, wakashangana nabanhu bekanyamula unhu wakaba afa, wakabeli mwananhulumyana umwempela wamai babe, ibo belinchilikaji, banhu banji bomuguta bekwenda naye. 13 She paakombona wakonwhila ishe akati kuna iye, "Usilile." 14 Wakenda pelyo akaguma bushasha, banyamuli bakama. Iye akati, "Awe nzhuzha, ndinoti kwauli, imuka." 15 Unzhuzha wakaba akafa wakamuka akagala, akatanga kulebeleka. Iye akompila kuna amai babe.

16 Banhu bose bakabanolutyo, bakakuja Mwali beti, "Undebambeli waMwali unkulwana waswika pakati pedu, Mwali washanyila banhu babe!"

17 Impuwo yiye yakawhikana kunyika yose yeJudiya namatunhu akabhatana nayo.

18 Balayijwa baJoni bakombuja iye zwose yezwi zwinhu. 19 Joni wakashoba balayijwa babe babili akabatuma kunaShe, kunombhuza kuti, "Ndiwi ukumuzha na, kana tilingilile umwe?"

20 Pabakaswika kuna iye, bakati, "Tatumwa kwobhuza kwauli naJoni uMbhabhatizi kuti, ‘Ndiwi ukumuzha na?’ Kana tilingilile umwe?"

21 Panoyo unshaji wakachilisa banhu banji mumalwaji abo, zwinobanyaja, nemipepo mibi, akata mapofu manji, kuti bebone. 22 Wakashandula akati, "Indani munobuja Joni zwimwabona nezwimwawha, mapofu amubona, makosha amukwenda, bana mapelembuji bamushampulujwa, nabanenzebe jisinowha, bamuwha, nabafi bakumumuswa akale indebo imbuya imubhaunulwa kubasheti. 23 Ulokombolelwa usinonyetejwa nami."

24 Pabakenda batumwa baJoni, wakatanga kulungulula nezwaJoni kubanhu eti, "Mwakenda mugwegulu kunobonani? Idete liteketeswa nebhepo na? 25 Mwakenda kunobonani? Unhulume ulombala zwimbalo zwibhodo na? Banombala ali akale belalama bupenyu bwopezhulu banowanika mungumba jamatezi. 26 Biya mwakamunda kunobonani? Undebambeli waMwali na? Eya, ndinomubuja, zwinopinda undebambeli. 27 Ndiye wakakwalwa nezwizwe kuwhi, ‘Ndootuma untumwa wangu pambeli papo, unookungubula inzila yiyo.’ 28 Ndinomubuja pakati pabo bose bakazwalwa nabechinhukaji apana unkulwana kupinda Joni, koga yoyo untukutuku mubushe bwaMwali, ndiye unkulwana kupinda iye."

29 Pabakawha zwose yezwi, bose banhu nabatelesi, bakakuja Mwali nokuti bakabhabhatizwa nombhabhatizo waJoni, 30 koga baFalisi nabasilawu bakalamba kubhabhatizwa sokulonga kwaMwali.

31 "Ani biya banhu bechizekululu changweno ndobakwejanisa neni, bananga sani? 32 Bananga sabana batukutuku bagele pamusika beshomejana beti; ‘Takamulijila bundimbwa, koga amujakazana, takamukwimbila jedilwe koga amujakalila.’ 33 Joni umbhabhatizi wakezha esinolya chinkwa kana kunwa iwaini, koga mwakati unanedimoni. 34 Mwananhulumyana wonhu waswika, elya nokunwa, koga munoti, ‘Lingani yoyu unhulume! Unolyisa kasa akale unkolwi, unkwaina wabatelesi nabachinyi!’ 35 Koga buchenjevu bwakaboneka buli bwakalulama nabana babo bose."

36 Umwe wabaFalisi wakakoka Jesu kuti bende benolya bose, nokudalo wakenda mungumba yomFalisi akagala kutebuli. 37 Kwakangwina unhukaji waluba elalama bupenyu bwomuluchinyo muguta yeli, paakaziba kuti Jesu unolayila mungumba yomFalisi, wakenda ekasenga ifukwana yamafuta obunde, 38 elimile kushule mwaJesu elikumakumbo elila, wakabukusha mishoji yiye yakabedonela pamakumbo aJesu eshingisa masusu awe, kova emyonta makumbo aJesu akonguba mafuta. 39 umfalisi wakabakoka Jesu ebona yezwi, wakayeya nezwomumwoyo uwe eti, "Ngana unhu yoyu eli undebambeli waMwali, waluziba kuti yoyu unhu ukumuunguma ndiyani akale ulichini, nokuti unchinyi."

40 Jesu wakonshandula akati, "Simoni, pana zwandikumuda kuleba kunawi."

Iye wakashandula eti, "Lebani Ndayiji."

41 "Kwakaba kuli noncheneki wakacheneka banhulume babili, Umwe wakonchenekesa madinali anokwana mazana mashanu, umwe akonchenekesa madinari makumi mashanu. 42 Bakakonwa kulipa chikwelete bose, uncheneki akabalekejela mububili bwabo. Ndiyani biya pakati pabo uchoonda kasa?"

43 Simoni wakashandula eti, "Ndinobimba kuti yoyo wakalekejelwa elinemali inji."

Jesu wakati, "Ndimo kasa." 44 Jesu wakachingunuka akalinga kunhukaji akati kuna Simoni, "Simoni, uumbweni yoyu unhukaji? Ndangwina mungumba yiyo koga aujandipa ivula kuti ndishambe makumbo angu, koga iye wanyolopisa makumbo angu nemishoji yiye akabukusha namasusu awe. 45 Iwi aujandimyonta, koga iye kuvila pandangwina wabemyonta pamakumbo angu pose. 46 Iwi aujaguba unsholo wangu namafuta, koga iye waguba makumbo angu namafuta anonhuwilila. 47 Nokudalo luchinyo lulwe lunji, lwalekejelwa nokuti watondeja kuda lukulwana, asi yoyo unolekejelwa zwishoma, neebo unotondeja ludo lushoma."

48 Wakati kunhukaji, "Luchinyo lulwo lwalekejelwa."

49 Yabo bakaba beli naye belya petebuli bakatanga kulebeleka pakati pabo beti, "Ndiyani yoyu unota kulekejela luchinyo?"

50 Wakati kunhukaji, "Kudimbwa kukwo kwakuchija, inda mulunyalalo."