1 Wakati kubalayijwa babe, "Zwinhu zwinobuzilija luchinyo zwilokwelela kuzha, koga mayee kunoyo unozwibuzilija yezwo! 2 Zwaluba zwibuya kuti ihando isungililwe munchibha mumwe etukoposelwa mugungwa pana kuti etise umwe waaba batukutuku kuti echinye. 3 Chenjelani nokwenu.

"Kana mwanakwaina uwo akuchinyila, unkalalile, kana achingunuka, undekejele. 4 Kana akubipisila tushanu tuna tubili nezhuba, akale ebuya kwauli tushanu tuna tubili eti, ‘Ndakukanganisila’ iwi unokwelela kundekejela."

5 Bapositoli bakati kunaShe, "Tipamhijileni kudimbwa kwedu!"

6 Tezi wakashandula eti, "Ngana kudimbwa kwenu kuli kukulwana semhuji yemasitadi, mwaluti kunti wonSikamo yoyu, ‘Nyukuka unozwijikila mugungwa’ unti yoyo walumuwhilila.

7 "Ndiyani pakati penu unanshingi uwe unondimila kana kunchejela imhwizi, unoti kana aswika ebhuda kuminda eti kwaali, ‘Izha nokukambija, gala pasi ulye na? 8 Aatoti kwaali, ‘Bambanya chilailo changu, umbale zwilokwelela utukondilindila kuswikila ndapeja kulya nokunwa. Iwi unoolya nokunwa kana ndapeja na?’ 9 Angomboka na unshingi yoyu nokuti wata zwaalayiwa kuta? 10 Nokudalo ngazwibe alo nokunamwi. Kana mwata zwamwalayiwa kuta, itini, tibashingi chete, tata zwitaba tikakwelela kuta."’

11 Palwendo lulwe lwokuJelusalema, wakapinda pakati peSamaliya neGalili. 12 Echinongwina muna umwe unzi, wakatandamijwa nabanhu bali igumi bakabelwala mapelembuji ibo bakamila kule naye, 13 bakashomeja beti, "Jesu, Tezi! Tiwhileni ishe!"

14 Paakababona wakati kwabali, "Indani munozwitondejela kubatebuji."

Bechinokwenda, bakashampulujwa. 15 Umwe wabo paakabona kuti wachiliswa, wakabwilila etunhumwija Mwali newhi lipo pezhulu, 16 akazwiwigila pasi pamakumbo awe omboka. Yoyu unhu wakabeli unSamaliya. 17 Nokudalo Jesu wakati, "Akujachiliswa bali igumi na? Bamwe bashanu nabana baipi? 18 Apana wabuya kwotunhumwija Mwali kuzhe kwoyu umvakule?" 19 Wakati kuna iye, "Imilika unde azwo, kudimbwa kukwo kwakuchilisa."

20 Paakabhuzwa nabaFalisi kuti bushe bwaMwali bunoswika lini, wakabashandula eti, "Bushe bwaMwali abutozha sechitondejelo chinooboneka, 21 akale abutoti, ‘Hobuno yokuno’ kana ‘Hobuya yokuya!’ Izibani kuti bushe bwaMwali bwipo pakati penu."

22 Wakati kubalayijwa babe, "Unooswika unsi pamuchada kobona izhuba lyoMwananhulumyana wonhu, koga amutoolibona. 23 Banooti kwamuli,‘Ilingani, hondiya yokuya!’ kana kuti, ‘Ilingani hoono yokuno!’ Musinde, musibatobele. 24 Nokuti kuzha kwoMwananhulumyana wonhu kunooba solupenyo lunomunika kunelimwe ibhazu lyedenga lunda nokunelimwe ibhazu lyedenga unodalo Mwananhulumyana wonhu nelyo izhuba lyokuzha kukwe. 25 Koga ulokwelela kusheteswa tangwa etikolambwa nechizekululu yechi. 26 Sobukwakaba kuli mumazhuba aNowa, kunooba alo mumazhuba oMwananhulumyana woNhu. 27 Banhu bakalya, bakanwa, banhulume nabanhukaji bakalobola nokulobojwa kukajine kukaswika izhuba lyaakangwina mubwato Nowa, mapopoma evula akezha akabapalaja bose. 28 Akale zwinanga sezwakatiwa mumazhuba aLoti, bakalya, bakanwa, bakatenga, bakatengesa, bakabyala, bakabaka, 29 koga nezhuba lyokubhuda kwaLoti muSodoma, kwakana moto nesalifa uva kudenga zwikabapalaja bose, 30 zwinooba alo nezhuba lyaachatondejelwa Mwananhulumyana woNhu. 31 Nelyo izhuba, yoyo unooba eli pedenga lyengumba, eli nezwibiya zwizwe mungumba, esibheluke kuti ezwitole, noyo unobeli muminda, esibwilile mushule. 32 Kumbulukwani unkaji waLoti. 33 Yoyo unoda kulondota bupenyu bubwe unolashikilwa nabo, asi yoyo unobulasha, unoobulondota. 34 Ndinomubuja, noobo busiku babili banoba belilele pabulo bumwempela, umwempela unootolwa, umwe akasiyiwa. 35 Banhukaji babili banooba bekwiya pamwempela, umwe unootolwa, umwe akasiyiwa." 36 Bakombhuza bakati, "Ngokupi, Tezi?" 37 Wakashandula akati, "Yopo pana untumbi, magola anobungana."