1 Igapo lyose lyabanhu lyakanyamuka likonsenga kunaPilato. 2 Bakatanga kuumpa undandu beti, "Unhu yoyu tongwana eniepela banhu, ekanganisa inyika yedu eti banhu besilipe mutelo kunaKesali akale umuti ndiye Kristo She."

3 Pilato wakombhuza eti, "Uli She wabaJuda na?"

Iye wakashandula eti, "Seni ndiwi wazwileba."

4 Pilato wakati kubatebuji bakulwana nebunga lyabanhu, "Andibweni undandu kunoyu unhulume."

5 Koga ibo bakasimisa beti, "Ukumukunijila banhu nokulayija kukwe muJudiya yose, kuva kuGalili nokuno kwose."

6 Paakawha yezwi, Pilato wakabhuza kuti yoyu unhu angaba wokuGalili na? 7 Paakaziba kuti upopasi pobushe bwaHelodi, wakontumila kunaHelodi, iye waluba muJelusalema noyo unshaji. 8 Helodi wakashantilwa kasa kubona Jesu, nokuti wakabadisisa kwonshaji undefu kumbona nokuti wakabawha nezwizwe, ebimba kuti angabona chichenamiso chitiwa naiye. 9 Wakombhuza mibhuzo kwonshaji undefu; koga iye aajakashandula. 10 Batebuji bakulwana nabakwali bakasimatija kumpa undandu. 11 Neebo Helodi nabalwi babe bakonsota, bakombajika chimbalo chibhodo, bakombwiliza kunaPilato. 12 Helodi naPilato bakava baba bakwaina, kojoba mushule bakabebengana.

13 Pilato wakashoba pamwempela batebuji bakulwana nabatungamili nabanhu, 14 akati kwabali, "Mwabuza unhu yoyu kwandili mumpa undandu wokusungilija kuti banhu bepanduke, Pandombhuzisisa mbeli kwenu, imi andijongwana elinondandu sokuleba kwenu, 15 kana Helodi ajongwana nondandu, wombwiliza kwatili. Apana zwaakata zwaalokwelela kuti ebulayiwe. 16 Nokudalo ndichonabha nditukondeka ende azwe." 17 Ngweno wakabakasungilwa kusunungula unhu umwempela pamabhiko.

18 Asi bose bakazholomoka pamwempela beti, "Yoyu ngefe, mutisunungulile Bhalabhasi!" 19 Unhulume wakaba asungilwa imhelemhele yakabatikana muguta akale nokubulaya unhu.

20 Pilato wakapamha kwabali eda kusupula Jesu; 21 asi bakashomeja beti, "Unkahamile! Unkahamile!" 22 Pilato wakalebeleka lwatatu kwabali akati, "Ani wakata undandu ni unhu yoyu? Imi ndongwana esina undandu unokwelela kuti ebulayiwe, nokudalo ndichonabha chete nditukounsungunula."

23 Asi ibo bakanangatila kuzholomoka beti ekahamilwe. Mawhi abo akazunda. 24 Untongo waPilato wakaba wokuti zwibakabeda zwitiwe. 25 Nokudalo wakasungunula yondiya wakabasungilwa imhelemhele nokubulaya unhu; akabapila Jesu kuti bonte zwabakabeda

26 Pabakaba benda naye, bakabhata nesimba umwe unowhi Simoni wokuSayilini wakabeva kuminda, bakonyamulisa unchinjikwa mushule mwaJesu.

27 Igapo lyabanhu igulwana lyakontobela Jesu, pamwempela namamai bakabelila nokukwiila. 28 Koga Jesu wakachebukila kwabali akati, "Mamai eJelusalema, musindililile imi, koga zwililileni imwi nabana benu. 29 Nokuti mazhuba akumuzha pabachooti, ‘Balokombolelwa basinozwala, bezwizwalilo zwisanu zwazwala, nabanamazhamu asakamwisa.’ 30 Banootanga kuti kumatunhu, ‘wilani pezhulu pedu!’ nokututunhu, ‘Tisiseni.’ 31 Nokuti kana yezwi zwitiwa kunti unyolo, ini zwichatiwa kunti wakakoma?"

32 Bakatungamija bo bamwe bapanduki babili kuti benobulayiwa. 33 Pabakaswika kubugalo bunowhi "Bhepe lyonsholo," bakonkahamila pamwe nabapanduki babili, umwe kululyi umwe kuchesho. 34 Jesu wakati, "Tate balekejeleni nokuti abatoziba zwibakumuta."

Bakakandila kuti bekobelana zwimbalo zwizwe. 35 Banhu bakama belingilija, nabatongi bakonseka beti, "Wakachija bamwe, neebo ngezwichije, kana eliKristo unshalwa waMwali!" 36 Nabalwi behondo bakonseka, besendela kwaali kuti bompe iwaini inopanyuka, 37 beti, "Kana uli She wabaJuda, zwichije!"

38 Kwakaba kuli nonkwalo pezhulu pape, unoti, "Yoyu ndiShe wabaJuda."

39 Umwe wabapanduki wakabakakahamilwa yopo wakondebela bubi eti, "Autoba Kristo na? Zwichije utichijebo."

40 Koga umwe wakadabila onkalalila eti, "Autotya Mwali na, aubweni iwi kuti watongelwa zwilokwelana naye kuti ufe. 41 Kulangwa kwedu kuno kwendelana nezwito zwedu, asi yoyu unhu apana chibi chaakata." 42 Wakati iye, "Jesu undiyeye ungoswika kubushe bubo."

43 Wakati kunaiye, "Chokomende ndinoti kwauli, nasi yelino unoba nami muPaladiso."

44 Kwakababa iawa yashanu nemwempela, kukaba nenhilima ishango lyose kujine kukaba iawa yashanu ina mana, 45 izhuba lyasikatilwa, uncheka womuTempeli ukajeluka pakati nopakati. 46 Jesu wakalila eshomeja newhi igulwana, akati, "Tate ndinopila umpepo wangu mumaboko enu." Paakapeja kuleba yezwi wakafema kopejisila.

47 Untungamili wezana lyabalwi behondo, paakabona zwatikana, wakakuja Mwali eti, "Yoyu unhu chokomende wabakalulama."

48 Banhu banji bakabezha kolingilila, pabakabona zwatikana, bakabwilila kumisha yabo beloba zwifuba zwabo neshungu. 49 Akale bose bakabezibana naye, pamwempela namamai bakabontobela beva kuGalili bakamila kule bekalinga yezwi zwitikano.

50 Kwakaba kuli nonhu unowhi Josefa, wakabeva kuAlimatiya. Wakabeli imhingu yeGota igulwana, ekalulama akale elemekejwa, 51 iye aajakabavuma zwakababambwa nabamwe kuti zwitiwe, iye wakava kuJudini iguta lyomuAlimatiya bakamilila bushe bwaMwali. 52 Unhulume yoyu wakenda kunaPilato, akakumbila untumbu waJesu. 53 Wakontulula, akomputilija muncheka akombiga mugumbu lyakabachiwa pamwala lisanu lyalajikwa untumbu mukati. 54 Lyakaba lili izhuba lyokubambanyila, akale neSabata yakaba ilimukutanga.

55 Mamai bakabezha beva kuGalili beli naye, bakatobela mushule, bakabona igumbu nondajikilo wontumbu,

56 Akale bakabwilila bakalonganyila bunde namafuta okunguba. Nezhuba lyeSabata bakanyetutuka sezwakazwilebwa nomulawu.