1 Wakangwina muJeliko, epinda mukati. 2 Mwakaba muli nonhulume unowhi Zakeu, eli untelesi unkulwana, ekafuma. 3 Wakaba edisisa kuti ebone kuti Jesu ndiyani, koga wakakonelwa kuumbona pezhulu pabanhu banji, nokuti iye wakaba eli umfupi. 4 Nokudalo, wakalabuka mbeli akanotanha munti wonSikamo kuti ombone pakupinda kukwe. 5 Jesu paakaswika pakale, wakalinga zhezhulu, akati kwaali, "Zakeu, bhuluka munti nokukambija nokuti ndokwelela kugala kungumba yiyo nasi."

6 Wakakimbija kubhuluka, akoontambula nolushanto. 7 Pabakabona yezwi, banhu bose bakanyunyuta beti, "Wenda kunoba mwezi wonchinyi."

8 Koga Zakeu wakamilika akati kunaShe, "Bonani, Tezi, ndichakamula pakati nopakati chuma changu ndipe basheti, kana pana undakachengela, ndinompa chuma chiche zwilopamhwa kana."

9 Jesu wakati kwaali, "Nasi luchijo lwezha kuneyi ingumba nokuti yoyu neebo mwananhulumyana waAbhulahamu. 10 Mwananhulumyana woNhu wakezha kwoshaka nokuchija bakalashika."

11 Bechakawhilila yezwi, wakendila mbeli akababuja unkwejaniso, nokuti wakaba aba pelyo neJelusalema naibo bakaba beyeya kuti bushe bwaMwali bwakaba buzwitondejela nokukambija. 12 Nokudalo, wakati, "Umwe unhulume unozwalwa kungumba yobushe wakenda kunyika iko kule kunoponchwa bushe, nokubuya mushule mwezwo. 13 Wakashoba igumi lyabashingi babe, wakabapa makobeli igumi, akababuja kuti, ‘Itani zwokushambaja nemali yeyi kujine ndibuye.’ 14 Koga banhu bomunyika yiye bakombenga bakatuma batumwa mushule mumwe kuti benoti, ‘Atidi kuti unhu yoyu etitonge.’

15 Wakati abuya mushule mwokuponchwa kukwe bushe, wakatumila bashingi babe baakaba asiyila imali, kuti beshobwe, ebone kuyizwalisa kwabo kwabakabekwelela kuti bete. 16 Wokutanga wakezha akati, ‘Tezi, ikobeli lyenu lyakazwala amwe ali igumi.’ 17 Iye wakati kwaali, ‘Wazwita, unshingi umbuya! Nokuti waaba nokubimbika muchinhu chitukutuku, ndokupa masimba pezhulu pamakuta ali igumi.’ 18 Wabili wakezha eti, ‘Tezi, ikobeli lyenu lyakazwala mamwe mashanu.’ 19 Wakati kuna yoyu, ‘Naibo ndokupa bukulwana kumakuta mashanu.’ 20 Wakezha umwebo, eti, ‘Tezi, heli ikobeli lyenu, ndakaliputila muncheka, 21 nokuti ndakabemutya kuti munhu unamwoyo unkukutu, motola pamusabiga chinhu, movuna pamusakabyala.’ 22 Iye wakati kwaali, ‘Namawhi awo, ndokupa undandu, iwi unshingi umbi! Iwi wakabeziba kuti ndinkukutu, ndotola zwindisakabiga, ndovuna zwindisakabyala? 23 Ini usakabiga ikobeli lyangu mubhenki? Pakubuya kwangu, ndalolitola lyazwala.’ 24 Wakati kuna yabo bakabelimile pelyo, ‘Tolani ikobeli kwaali, mupe yoyo unegumi lyamakobeli.’ 25 Asi bakati kwaali, ‘Tezi seni una igumi lyamakobeli kale.’ 26 ‘Ndinomubuja, umwe nomwe unanazwo, unoopiwa zwimwe, koga yoyo usina, unootolelwa zwishoma zwanobelinanazwo.’ 27 ‘Akale babengi bangu, yabo basakada kuti ndibatonge, babuzeni yopano mubabulaye pambeli kwangu."’

28 Mushule mwamawhi yaya, wakenda mbeli kwabo mulwendo, enda kuJelusalema. 29 Wakati aba pelyo neBhetifaji nokuBhetani, pedunhu linowhi Olivi, wakatuma balayijwa babe babili, 30 eti, "Indani kunzi ulolingana namwi, mungongwina mukati, muchawana mwana wedonki usanu ukagadwa nonhu, ukasungililwa, muunsupule muzhe nawo yokuno. 31 Kana umwe unhu emubhuza kuti, ‘Mukumukasupulilani biya?’ Muumbuje kuti, "Tezi unoida."

32 Batumwa yabaya bakenda, bakanowana sokuleba kukwe. 33 Pabakati belimukusupula mwana wedonki, beni bakati kwabali, "Monsupulilani mwana wedonki?"

34 Ibo bakati, "She unounshaka." 35 Bakombuza kunaJesu, bakawala micheka yabo pezhulu, bakombhancha kugada. 36 Paakabekwenda, bakawala ingubo jabo mungwagwa.

37 Wakati aba pelyo nomungenyuka wedunhu lyeOlivi, idupwa lyose lyabalayijwa lyakatanga kushomeja bekuja Mwali pezhulu pemishingo yiye yabakaba babona, 38 beti, "Ulokombolelwa Tezi unozha muzina lyaShe. Lunyalalo kudenga nolukujo pezhuluzhulu." 39 Bamwe babaFalisi bakabeli mubunga lyabanhu bakati kuna iye, "Ndayiji, kabulani balayijwa benu."

40 Iye wakashandula eti, "Ndinomubuja, kana bangowhilijila mabwe ndiwo achashomeja!"

41 Wakati aba pelyo, ebona iguta, wakalililila, 42 eti, "Ngana uziba nasi zwinhu zwinobuza lunyalalo! Koga feno yezwi zwilosisika mumesho awo. 43 Nokuti mazhuba anoozha pauchatilwa lukuta, uzunilwa nababengi babo, kumapazu ose, 44 unoowigilwa pasi, iwi nabana babo mukati, apana ibwe lichasala pezhulu pelimwe, nokuti aujakaziba izhuba lyokushanyilwa kukwo."

45 Wakangwina mutempeli, akatangisa kutatamila bakabetengesa, 46 eti kwabali, "Kulokwalwa kuti, ‘Ingumba yangu inooba ingumba yokunamata.’ koga imwi mwaita ibhako lyembava."

47 Wakabelayija muTempeli mazhuba ose. Batebuji bakulwana, bakwali, nabatungamili babanhu, bakabeshaka kuumbulaya, 48 koga bakashayiwa kuti baluzwita chini yezwi, nokuti banhu bose bakabesimatila kuwha mawhi awe.