I parabola bašo nepošteno upravniko
1 O Isus phengja pe učenikonge: "Sine jekh barvalo manuš so sine le upravniko, so o barvalo manuš čhigja leske iftira deka hala leskoro barvalipe.
2 I o barvalo vikingja le hem pučlja le: ‘Soj akava so šunava baši tuke? Ane mange o spisako te dikhav sa so trošingjan. Tu našti više te kere buti sar upraviteli ki mande!’
3 A o upraviteli vakergja ki peste: ‘So te kerav akana koga mo gospodari ka brkinel man tari buti? Na sijum doborom zoralo te randav, a ladžava te mangav mange. 4 Džanava so te kerav te šaj priminena man o manuša pe kherende, koga ka ovav brkimo tari akaja buti.’
5 I vikingja sa e manušen so dužinena sine leskere gospodareskere, i pučlja e prvone: ‘Kozom dužineja me gospodareske?’
6 Ov odgovoringja: ‘Šel bure ujleja.’
Togaš o upravniko phengja: ‘Sigate le to lil kaj so pišineja hem pišin pinda deka dužineja.’
7 Palo adava pučlja e dujtone: ‘Kozom dužineja me gospodareske?’
Ov odgovoringja: ‘Šel bure giv.’
Leske da phengja: ‘Le to lil kaj so pišineja hem pišin oftovardeš deka dužineja.’
8 I o Gospodari falingja pe nepošteno upravniko so sine agjar džando. Adaleske so o manuša akale svetoskere tane podžande ko pe dejla taro okola soj tane sar lende, nego o manuša e svetlinakere. 9 Vakerava tumenge: keren tumenge amala adaleja so ka pomožinen len tumare barvalipaja, te šaj koga ka nakhel adava barvalipe, te oven primime ko večna khera.
10 Koj tano verno ko but hari, ov tano verno ko but, a koj nane pošteno ko but hari, nane pošteno ko but da. 11 Ako na sijen sine verno ko barvalipe e svetoskoro, koj ka mukhel tumenge ko vasta o čačutno barvalipe? 12 Ako na sijen sine verna ko tugjo barvalipe, koj ka del tumen tumaro barvalipe?
13 Nijekh sluga našti te služinel duje gospodarenge. Ili jekhe ka mrzinel, a okole ka mangel, ili jekheske ka ovel poslušno, a e dujtone nane te podnesinel. Našti služinena hem e Devleske hem e parenge."