Lucas 16

I parabola bašo barvalo manuš hem o Lazar

19 O Isus vakergja: "Sine jekh barvalo manuš so uravela pe sine ko najšuže šeja hem sekova dive živinela sine ko luksuz. 20 Angli leskiri porta pašlola sine jekh čorolo manuš so celo leskoro telo sine ko rane, so leskoro anav sine Lazar. 21 Ov but mangela sine te hal adava so perela sine tari sofra e barvaleskiri. Dži o džukela avena sine hem ližinena sine leskere rane.

22 Koga mulo o čorolo, o angejla legarge le e Avraameske ki angali. I o barvalo da mulo hem sine parumo. 23 Ko than e mulengoro, ko bare muke, o barvalo dikhla upre hem duraldan dikhla e Avraame hem e Lazare leske ki angali. 24 Togaš vikingja: ‘Dade Avraame, žalin man hem bičhal e Lazare te sapankerel samo hari po naj ko pani hem te šudrarel mi čhib, soske but mučinava man ki akaja jag.’

25 Ama o Avraam odgovoringja: ‘Mo čhavo, setin tut deka primingjan to šukaripe dži kote sijan sine dživdo, a o Lazar po lošnipe. A akana o Lazar utešinela pe, a tu mučineja tut. 26 Uza ko sa adava, isi maškar amende hem tumende hor dupka, i te mangla nekoj te nakhel akatar tumende ili adathar akate, našti te nakhel.’

27 A o barvalo manuš phengja: ‘Togaš molinava tut, dade Avraam, bičhal e Lazare me dadeske ko kher. 28 Adaleske so adathe isi man pandž phrajla. Neka opomeninel len o Lazar te na aven ola da ko akava than e mukjengoro.’

29 O Avraam odgovoringja: ‘Len isi len o Zakoni e Mojsijaskoro hem o Lil e Prorokongoro. Neka šunen len.’

30 A o barvalo vakergja: ‘Nane adava dovolno, dade Avraam! Nego ako nekoj taro mule gelo ki lende, ola ka pokajnen pe.’

31 O Avraam phengja leske: ‘Ako na šunge adava so pišingja o Mojsej hem o prorokija, nane ni te šunen ako nekoj uštilo taro mule.’ "