Lucas 19

O Isus hem o Zahej

1 O Isus khugja ko gradi Erihon. I dži kote nakhela sine maškar o gradi, 2 alo jekh manuš so vikinela pe Zahej so sine jekh taro glavna danočnikija hem sine but barvalo. 3 Ov mangela sine te dikhel koj tano Isus, ama našti sine te dikhel le tari gužva, soske ov sine harno. 4 Adaleske prastandilo anglal hem uklingja ko kaš e smokvakoro te šaj te dikhel e Isuse, adaleske so džangja deka trebela te nakhel adathar.

5 A koga o Isus resla adathe, dikhla upre hem phengja leske: "Zahej, huli odma tele! Avdive mora te ovav ko to kher."

6 I o Zahej odma hulilo tele hem radosno primingja le ko po kher.

7 Sa o manuša dikhle adava i počminge te brborinen maškar peste: "Gelo gosti ko grešniko te bešel."

8 Ama o Zahej uštilo hem phengja e Gospodareske e Isuseske: "Akje, Gospode, ekvaš taro mo barvalipe ka dav le e čorolenge hem ako čorgjum nekastar nešto, ka iranav leske štar puti poviše."

9 A o Isus vakergja leske: "Avdive alo o spasenije ko akava kher! Adaleske so akava da manuš tano taro seme e Avraameskoro. 10 Soske o Čhavo Manušeskoro alo te rodel hem te spasinel adale soj tano našavdo!"