E Isuseskoro bijanibe
1 Ko adava vreme, o Rimsko caro o Avgust dengja naredba te kerel pe popis sa e manušenge ko carstvo. 2 Adava sine prvo popis kerdo dži kote o Kvirinij sine upravniko ki Sirija. 3 I sekoj gelo ko po gradi te potpišinel pe. 4 Agjar o Josif gelo taro gradi Nazaret ki Galileja, ki Judeja, ko Vitleem, ko gradi e Davideskoro, adaleske so sine tari familija hem taro seme e Davideskoro. 5 O Josif gelo adathe te potpišinel pe, ple verenicaja e Marijaja, so sine khamni. 6 Dži kote sine adathe ko Vitleem, alo o vreme e Marijake te bijanel e čhave. 7 Koga bijangja pe prvo čhave, pakjargja le ko pherne hem čhigja le ko pus, soske na sine gostinsko soba baši lenge.
O angejla vakerena e pastirenge deka bijandilo o Spasiteli
8 Ko adava than, adaja rat sine paše nesave pastijra so arakhena sine pumare bakhren ki niva. 9 I taro jekh puti pojavisalilo lenge o angeli e Gospodareskoro hem i slava e Gospodareskiri osvetlingja len, a ola but darandile.
10 Ama o angeli phengja lenge: "Ma daran! Akje anava tumenge šukar haberi, so ka anel bari radost sa e manušenge! 11 Avdive ko gradi e Davideskoro bijandilo tumenge o Spasiteli, soj tano o Hristos o Gospodari. 12 Akava ka ovel tumenge o znako: ka arakhen e čhave pakjardo ko pherne hem pašlola ko pus."
13 Taro jekh puti, e angeleja pojavisalili bari vojska angejla so falindor e Devle vakerge:
14 "Slava e Devleske ko učipe,
a ki phuv mir e manušencar, so lencar o Devel tano zadovolno!"
15 Koga o angejla irange pe ko nebo, o pastijra phenge maškar peste: "Ajde te dža ko Vitleem hem te dikha adava so phengja amenge o Gospodari."
16 I gele sigate, hem arakhle e Marija hem e Josife hem e čhave sar pašlola sine ko pus. 17 Koga dikhle e čhave, vakerge javerenge sa so sine phendo e čhavestar. 18 Hem sarine so šunge adava taro pastijra sine začudime. 19 Ama i Marija garavela sine sa akala bukja ko po srce hem razmislinela sine. 20 O pastijra gele peske, slavindor hem falindor e Devle bašo sa so šunge hem so dikhle, agjar sar so sine phendo lenge.