O Isus vazdela taro mule e udovicakere čhave
11 Palo adava, o Isus gelo ko gradi so vikinela pe sine Nain, a leja džana sine leskere učenikija hem but narodo. 12 I koga alo paše uza ko udar e gradeskoro, nesave manuša legarena sine jekhe terne čhave, so sine mulo. Ov sine jekh pe dajake, a oj sine udovica. But džene džana sine laja te parunen e čhave.
13 Koga dikhla la o Gospodari o Isus, pelo leske žal baši lake hem phengja lake: "Ma rov!"
14 Togaš alo paše hem pipingja i nosilka kote so sine o čhavo, i okola so phiravena le sine ačhile.
O Isus phengja: "Terneja, tuke vakerava ušti!"
15 I o mulo čhavo uštilo ki bul hem počmingja te kerel lafi hem o Isus dengja le leskere dajake.
16 Togaš sarinen darandile hem slavinge e Devle vakerindor: "Baro proroko pojavingja pe maškar amende!" hem: "O Devel alo te pomožinel pe narodo!"
17 I adava šundilo bašo Isus ki celo phuv e Evrejengiri hem ko sa o pašutne thana.
/images/a/WG5FS9VaSWVnVmV3VI8yP)
/images/a/Tcg2NiV7ce24OT6kCIQGR)