Nnwẹr s'Akpaar-aponga 7

Gideọn okhem anạng p’ẹkhạma ch’Midiyan

1 Wa k’ekpebhawu jạnẹ, Jerub-Baal (kw’ode Gideọn) ọttạra ajunung pẹ phyibh abhingi k’efhobhcho ch’Harọd. Wa ibyibhingasẹ s’anạng p’Midiyan ining k’ibir-ibira kw’ipekhuma s’ibaang okpecho kw’More. 2 Ọvaar Ubinọkpaabyi obeni Gideọn bẹ́, "Ajunung p’akhaam asaabhẹ aseng eden. Amma anạng p’Midiyan mạ́ntạkha nge bẹ k’mbọhk. Oyongu mạma, anạng p’Israẹl m’asi-m ẹmma aben bẹ́, ‘Ẹfa chamạna kk’mạna ẹkaana e.’ 3 Ma o, m’asi ẹyaakha anạng arim-mkpong bẹ́, ‘Tte ọnạng kwidede kw’n’ọfhạnọ bẹ́, tikhi-tikhi ukwuru ojora, ubina k’okpecho kw’Gilead ọmmạnga nnạm.’ "Ma wọ ajunung nnọhna arạbh afa ukuma chi, akpa nnạm abhạna, n’urikhi ajunung nnọhna ẹrạbh ukuma asen.

4 Okhenkha, Ọvaar Ubinọkpaabyi obeni Gideọn bẹ́, "Ajunung mbọ atim asaabhẹ aseng eden. Tạkha bẹ sạkha kha efhobh, ọfha nnyoma bẹ nnạng-ọ. Ode mbeni bẹ, ‘Oyok nwa ẹwọ m’ọtwạn abọ,’ ẹma wọ m’ọtwạn abọ; okhenka, ode mbeni bẹ́, ‘Oyok nwa abọ mọ́twạn,’ abọ mọ́twạn."

5 Ma wọ Gideọn utim ajunung mbọ ọsạkha k’efhobh. Ma wọ Ọvaar Ubinọkpaabyi obeni Gideọn bẹ́, "K’ikhaana s’ajunung p’attim ndwudwungu agwo asi, tekha ayok p’atim ẹdaak akperi asi masẹ ẹpfa ẹttaakhẹ asi." 6 Wa ajunung arạbh chi ẹbọ p’atim mbọhk akperi asi agwo. Ajunung mbọkha phyibh attim ndwudwungu agwo.

7 Ọvaar Ubinọkpaabyi obeni Gideọn bẹ, "Ajunung mbọ arạbh chi p’atim mbọhk akperi asi agwo, ebọ p’amma m’nsenga ma nkkaan-ọ, mbạra ntạkha anạng p’Midiyan nge bạnga k’mbọhk. Tte ajunung mbọkha phyibh ammạnga nnạm, ọnạng-ọnạng k’akhẹ k’ukkira." 8 Ma wọ wa Gideọn ọtọhmọ anạng mbọkha p’Israẹl phyi-phyibh akpa nnạm k’akkira pabẹ, okhenka, wa ochokhu ajunung mbọ arạbh chi, p’atọhk ogbạre ọttạra nsa s’abukpọhng p’ayok mbọkha p’afon-ofona.

Ma okpe ngwọ, wa ibyibhingasẹ s’anạng p’Midiyan ining k’ipekhuma k’isekhisek kw’Gideọn. 9 Ma irungu njọ, Ọvaar Ubinọkpaabyi obeni Gideọn bẹ́, "Bina ata arima anạng p’Midiyan abẹ k’ibyibhingasẹ sabẹ, ukwuru bẹ́, amma m’ntạkha bẹ ọtạkha nge ọ k’mbọhk. 10 De ojor-ọ ojora bẹ́, ata arima bẹ abẹ, sạkha k’ibyibhingasẹ, ọtọhmnạng kwọ Pura abẹ, 11 khọhmọ itọhng abhaanga idik s’abẹ n’akpaak. Ma wọ m’abạr ettem, ata arima anạng mbọ abẹ k’ibyibhingasẹ sabẹ." Ma wọ, ẹma ọttạra ọtọhmnạng kwẹ Pura, asạk afona kha iyaan k’ibyibhingasẹ sabẹ. 12 N’ode s’anạng p’ẹkhạma ch’Midiyan, ọttạra anạng p’ẹkhạma ch’Amalẹk, ọttạra anạng p’nkhạma s’irukhu k’ukhubha kw’okpebha-dudon kk’atobha masẹ ọsaabh f’agwurubhebhe k’ipekhuma. Akamẹl pabẹ abạra asaabh masẹ opong kw’ọraanga kw’ọnạng n’mókke ubhik.

13 Ma wọ Gideọn ọjạrọ-ọjạrọ ọta ukpira k’ọkpe kw’ujunung wạnọ n’ọkpaak oyok idachen s’ọttaar bẹ́, "Amma nttaar idachen s’nse brẹd kw’ode iriring kw’abẹ atim barli asi, kw’n’otto-otto ugina tạrr, ọta ọnwa k’ibyibhingasẹ s’anạng p’Midiyan. Utima ẹfa njọ ọta ọtọhbh k’ukkira, akwẹ ọbhạkhẹ mkper otto ukhubha."

14 Osenga ma, oyok-udikkobh kwẹ ubhina bẹ́, "Udik ọdwạkh-ọdwạk kòde, kw’oyongu bẹ́, ọkkangkkang-kkro kw’Gideọn kw’ode nnwa kw’Joash, kw’ubin Israẹl wọ. Ubinọkpaabyi kk’anạng p’Midiyan, ọttạra ibyibhingasẹ sabẹ phyibh ọtạkha ugi ẹ k’mbọhk."

15 K’okpe kw’Gideọn ọbhaang idachen nnọ, ọttạra oche kw’asẹ iyini, utwunga echo ọnạng Ubinọkpaabyi ikpukpobha. Ọkpa nnạm ọbhạna k’ibyibhingasẹ s’anạng p’Israẹl, oben bẹ bẹ́, "Abạnga abina e, khiri Ọvaar Ubinọkpaabyi kk’anạng p’Midiyan, ọttạra ibyibhingasẹ sabẹ ọtạkha oge bạnga k’mbọhk e!" 16 Ukwu ọbhaangẹ ajunung arạbh chi mbọ k’ibyi ittaan, ọtạkha abukpọhng ọttạra agbạre p’ọttọhk nạn ode oge bẹ phyibh k’mbọhk, ọttạra akhebh p’ọnna oge ma k’agbạre mbọ ẹtaanga.

17 Oben bẹ bẹ́, "Akker-m o, abạnga ator-m k’ntwạkhọ. De mkpir k’ibyibhingasẹ ọkhaan-ọkhaan, oche kwidede kw’nsi, abạnga asi oche ngwọ. 18 K’okpe kw’amma ọttạra anạng phyibh p’aning abamẹ ange abukpọhng pamạna, oche ngwọ gwọ kw’abạnga ma phyibh p’aning abaabha mạna ma ibyibhingasẹ, m’age abukpọhng pabạnga, abạra awur ẹmạng aben bẹ́, ‘Ekhema ede ch’Ọvaar Ubinọkpaabyi, ọttạra ch’Gideọn.’ "

19 Mạnna wọ kw’Gideọn ọttạra ajunung arạbh asen p’aning abẹ ata akpira k’ibyibhingasẹ s’anạng mbọ ọkhaan-ọkhaan, bạrạsẹ n’ukpir k’irungutem, k’okpe kw’abe kk’atik-ibyi afona. Abẹ age abukpọhng pabẹ, abạra avọhkhọ ogbạre f’abẹ atim k’mbọhk. 20 Ikhaana nnọ ittaan ige abukpọhng, ibạra ivọhkhọ agbạre. Ọnạng-ọnạng utim ikhebh k’ọkwabọhk, ọttạra abukpọhng k’udimbọhk, ọnạng-ọnạng uwuru ẹmạng oben bẹ́, "Abạnga atima akkangkkang-kkro arima irima nja anạng Ọvaar Ubinọkpaabyi ọttạra Gideọn!" 21 Ujunung kwidede obe k’akhẹ k’ibyi, abẹ abaabha ibyibhingasẹ nnọ, anạng p’Midiyan phyibh n’arạbh, agạma.

22 Masẹ abukpọhng mbọ arạbh chi age, Ọvaar Ubinọkpaabyi usi ajunung p’Midiyan phyi-phyibh abhạkhẹ atima akkangkkang-kkro pabẹ oyeni n’arima abẹma oyeni abẹ. Arim-ekpong mbọ arạbhọ atena kha Bet-Shita, kha ukhubha kw’Zerera tạrr, akpira kha erem ch’Abẹl-Mẹhola, ọbaanga Tabat. 23 Anạng p’Israẹl p’abin k’ẹkhạma ch’Naptali, ọttạra ch’Ashẹr, ọttạra ẹkhạma ch’Manasẹ phyi-phyibh ayini k’iyaan akhubh anạng p’Midiyan. 24 Wa Gideọn ọtọhmọ akpaakh-nkkaabha ọbaabha efhondiden ch’okpecho kw’Ephraim, oben bẹ́, "Abạnga asạkha akwu arima anạng p’Midiyan abẹ, abạnga abạra akpa bẹ eden ma k’Ọraanga kw’Jọrdan tạrr akpira kha Bet-Bara."

Ma wọ ajunung p’ẹkhạma ch’Ephraim phyi-phyibh afon ata akpa bẹ eden mạma k’Oraanga kw’Jọrdan tạrr akpira kha Bet-Bara. 25 Wa abẹ abạra avạkha adecho afa p’anạng p’Midiyan p’ade: Oreb ọttạra Zeeb. Abẹ afhọ Oreb k’ẹtakpa ch’Oreb, abẹ afhọ Zeeb k’ibyi s’abẹ n’amyạna achidwuk kha Zeeb. Wa abẹ akhubhu anạng p’Midiyan, abạra atima echo ch’Oreb, ọttạra ch’Zeeb akkena Gideọn, kw’uning kha Jọrdan ọkhaan-ọkhaan.