1 Lōqōn̄ vitwag se, mahē Tigsas mahayveg hay lēm̄ tatay nen, net vitwag hag tō nen, namnen nehet, kē tit hon̄yeg tenenen vēhte. 2 Ba yatkel et den kēy etet yoyon̄ tō Tigsas en, so kē tak qeleave, kē tak wē vēh net nan Lōqōn̄ M̄ōkheg si tateh. Veg kēy soksok namtehal a so ak sisgoy kē aē.

3 Tō Tigsas mavap van hiy net nan so, "Ēy, nēk van me ba tig me lengon ige sil gēn." 4 Tō Tigsas nivēhge van hiy kēy wo, "?Nele nongēn vap so gēn so ak qeleave Lōqōn̄ M̄ōkheg? ?So gēn ak nahaphap mey nēwē, si ak nahaphap mey nehet? ?So vaēh net, si wuhmat net?" Ba kēy et vulu goy te kē. 5 Tō Tigsas mololgagay, tō metet velvel kēy. Ba kē memgaysēn se kēy, veg nēqtēy namaymay wowoh. Tō kē nivap van hiy net nan so, "Nēk hon̄yeg tenenen namnē." Tō kē nihon̄yeg tenenen namnen tō niwē. 6 Me atgiy, ige Farisi makalō, wa muvug tiwag mi ige non Mayanag Herod. Kēy soksok namtehal so kēy tuwuh vēh Tigsas qeleave.

7 Tigsas tiwag mi ige nonon mavan yak den mahē nen, tō kēy van tēqēl yow lēbē Kalili, ba nisil liwo madam tatag kēy. Nisil gōh mavan me den Kalili, wa mavan me den Judea 8 wa den napnō liwo Jerusalem, wa den nēvēwti vōnō a Idumea, wa den yatkel vōnō tekel bē lon̄ Jordan, wa yatkel vōnō se, sisqet napnō lililwo vōyō, Taya wa Saydon. Ige sil gōh mavan me hiy Tigsas veg kēy moyon̄teg noyoy bahaphap a Tigsas makak geh tō. 9,10 Tigsas mavaēh woqse et, ak tō so ige del a nogom en, kēy vēyvēy tēmtēm lokse kēy so tan̄qal kē. Tō Tigsas mavap van hiy ige nonon so kēy tēymat nōbō-ōt vitwag so kē nihag aē, veg kēy tiple vēy tuqutquy van hiy kē. 11 Wa ige tamat, mahē a kēy met Tigsas en, kēy yowtaq hōw lengon tō gaygayka so, "Inēk gōh Ēntēn Ḡod!" 12 Ba Tigsas mohole gatgoy kēy so kēy nitog vavasemlō so ikē ihē.

13 Tō Tigsas mavan kal luwutwut vitwag tō mōlōl ige a kē nemyōs tō kēy van me hiy kē. 14 Kē metyak ige son̄wul nanm̄e vōyō wa mōm̄ōk nahay so ige hal. Kē mōm̄ōk kēy so kēy dam tatag kē, wa tō so nivētleg lō kēy so toytoy Noyoy Ēwē. 15 Tō kē melep van naman hiy kēy bōvōyvōyyak vu het den net.

16 Nahan ige son̄wul nanm̄e vōyō gōh wa, Simon, a Tigsas mōl nahan mey negyaq so Pita. 17 Wa yohē yantēntēn Sēbēdē, Jemes wa Jon, a Tigsas mōl nahayō mey negyaq so Boanerges (nēdēmdēm nan so ninti len̄vayvay, veg namtevōyō namaymay). 18 Wa tō Andrō, Filip, Batholomiw, Mathiw, Tomas, Jemes a ēntēn Alfeus ōk, Tadeus, Simon Silot, 19 wa Judas Iskariot, a me atgiy, kē mukēg tō Tigsas van lemnen ige tavale nonon.

20 Vētmahē a Tigsas mōm̄ōl lok me lēm̄ tiwag mi ige nonon en, woqse sil mavan lokse me hiy kēy, tō tateh su tekel mahē so kēy so gengen aē. 21 Mahē a ige nonon tenenen moyon̄teg noyoy veg kē en, kēy van me so lepyak kē, veg ige mavap so kē naqaqa.

22 Ba yatkel vatvatgo Bele mavan tēqēl me den Jerusalem, tō kēy mavap so, "Belsebul, kē notogtog tiwag mi net anen." Wa tō, "Tigsas melep naman nonon den namyanag non ige vu het nan bōvōyvōyyak vu het."

23 Tigsas mōlōl me ige nan, wa mavap navap tēngeg van hiy kēy so, "!Satan tit vōyyak vēhte Satan! 24 Sowo ige non namyanag vitwag notog vēlwoy, ige tekelgi notog tavale mi ige tavalgi, namgumgu non mayanag nen tit tig vēhte. 25 Ige lēm̄ vitwag, so kēy wo motog vēlwoy, ige nan tit tog galgalsi vēhte. 26 Tō ige non Satan wo motog tavale lokse mi kēy lokse, tō kēy so tog vēlwoy, tō vel mugumgu non Satan tit tig vēhte, wa tabah. 27 Tateh et nihayveg lēm̄ non net maymay vitwag so nivēl nahaphap nonon. So kē wo nemyōs so niak qelenen, kē nilēg maymay bah net nan en, tō kē qoyo vēl nahaphap nonon."

28 Tō Tigsas mavap so, "Nok vap van hiy kimi nēhēyhēywē. Ḡod tēdēmveteg vēh nubug del a net mak tō, wa vel hohole hethet a net mavap tō hiy kē. 29 Ba net nivap hethet hiy Nuvu Yon̄ en, Ḡod tit dēmveteg vēhte nubug nan, nubug nan notogtog lap qelenen a tit bah vēhte." 30 Tigsas mohohole qele gōh veg kēy mavap so nuvu a mi Tigsas en, nuvu nan nehet.

31 Ige yathēthēn Tigsas tiwag mi tita nonon mavan me mahē nen. Ba et hayveg te lēm̄, ba kēy mitig lap aslil. Tō kēy mēvētleg goy Tigsas so kē nivan tō me hiy kēy. 32 Ba woqse sil hag walēg tō Tigsas en, tō kēy vap van hiy kē so, "Ey, tita nōnōm tiwag mi yathithi yow aslil en, kēy nemyōs so et nēk."

33 Ba Tigsas meplu, mavap wo, "?Tita mino tiwag mi ige yathithik ihē?" 34 Tō Tigsas metet ige sil a hag walēg tō kē en, ba mavap so, "Kimi gōh ige tita mino, wa ige yathithik wa ige yatētētek, 35 veg net a niak nahap a Ḡod nemyōs en, tō ikē ithik, tētek wa tita mino."