Mateus 21

Yesu aingei ta Yelusalɛmɛ

1 Ehole ɛbatama bo mbuti na Yelusalɛmɛ ko ɛimea bo mbuti na ngando ɛ Betefadje, diko la ngomba ɛ mele ma Olive, Yesu aloma batingami babae: 2 «Abala na bu boo: Kɛɛni ta ngando enaho edii boso ba boono. Otanealeani punda mwali anangi na ngɔli ko mwana ɔ punda mbuti na nde. Tingoani basusu babae ko doani na bu odii mbai. 3 Nga moto akabala na nu modjɔ tina ɛ bu, mosɔmbɛdjani boo: "Kumu akambaka na bu." Ko mbala emɔti abakinalea bakɛɛ.»

4 Midjɔ mia misusu makɔɔmɔ bɛngɛ bibaeli ba motɛli bakokedjame:

5 «Balani na bato ba Siona boo:

Hokea, kumu ɔ wɛ adoi odii wɛ,

alumi na bwɛli, adii diko la punda,

ko diko la mwana ɔ punda, mwana ɔ punda ɔ punda mwali*21, 5 Hokea koko Djak 9, 9..»

6 Batingami bakɛɛ ko bakɔɔ oko moda mabaloma Yesu. 7 Batomba punda engbanga na mwana ɔ nde, baondea bisendja diko la bobo ko Yesu adaa odiko. 8 Emumu ɛ bato ɛonda bisendja ba bobo ta ndjia; bakina balena bitape ba mele ko babionda koko ta ndjia. 9 Bato ibadalaka boso ba Yesu na bii ibamokimanaka bagamaka boo: «Iyakoko odii Mwana ɔ Davidi! Yɛɛ boo adjongoame ona odoi ta kombe ɛ Kumu! Ekumu odii Ndjambe odiko!»

10 Ehole ɛingea Yesu ta Yelusalɛmɛ, ibonga isusu lakumana. Basahɔdja boo: «Moto hoo adii nda?» 11 «Bato basɔmbɛdja boo: Edii motɛli Yesu, ɔ Nasalɛta ta Galilai».