Mateus 26

Kuta tina ɛ Yesu

1 Ehole ɛbɛtɛ Yesu obala midjɔ mia misusu, abala na batingami ba nde boo: 2 «Ɔdjebakani opele boo edikai maswi mabae bɛngɛ tɛkɛ ɛ Pasika ɛbange: bakabalea Mwana ɔ moto bɛngɛ bamobake ta ekulusu.»

3 Bea, bakumu ba banganga ba Ndjambe na basuku ba ngando baputoana ta ndako ɛ Kaifa, kumu ɔ banganga ba Ndjambe; 4 bea, baokana tina ɛ opea Yesu na owɛi bobe ko bamoowoe. 5 Noko bea babala boo: «Etaboana omopea ta ehole ɛ tɛkɛ, bato basakatɔmbɔ.»

Mwali asopei Yesu malasi ta molo

6 Yesu adaka ta Betania, ta ndako ɛ Simo ona ɔdaka na mabha. 7 Mwali omɔti abatama mbuti na nde ena apeli molangi ma malasi ma motwuia monɛnɛ: amasopa diko la molo ma Yesu ehole ɛdaka yo ta mesa. 8 Ena ɔenɛ batingami bea, basuboa ko babala boo: «Tina ɛ obeedja malasi mii bea nda? 9 Bahɔnɔki omatɛkɛ na motwuia monɛnɛ ko ngɔngɔ djia opa falanga odii bakwali!»

10 Ehole ɛenɛ Yesu bea abala na bu boo: «Tina ɛtungeaka na nu mwali hoo nda? Akokedjai modjɔ mopele tina ɛ mbai. 11 Tina ɛ boo okadaeni na bakwali bihole bisusu; endolo mbai, odaeteleani na mbai bihole bisusu. 12 Ena osopei yo malasi mii ta mokuku ma mbai, akɔi bea tina ɛ obɔngɛdja opuseama ba mbai. 13 Nabalaka na nu, sooti boo: mɔɔngɔ masusu malehabi bo Mwako Mopele muu ta ngondo esusu, batɔndɔbi koko modjɔ mokɔi mwali hoo ko bamolɛdjakabi.»

Yudasi akabi Yesu

14 Bea omɔti ɔ batingami doomi na babae, ɔbeaka bo Yudasi Isikalioti, akɛɛ odii bakumu ba banganga ba Ndjambe 15 ko abala na bu boo: «Ɛpalaka no opani nga nakakaba Yesu odii no yee?» Bakumu ba banganga bamopa falanga dja bibende tuku isato. 16 Donga ehole ena, Yudasi abanga ohomba enɔli epele tina ɛ obakabea Yesu.

Yesu ayi mia ma Pasika engbanga na batingami ba nde

17 Ta iswi la mbangi la tɛkɛ ɛ mapa mataki nɛngɛ ɛ mapa, batingami bahɔdja Yesu boo: «Esika ɛpalaka wɛ boo laobɔngɛdjae mia ma Pasika nda?» 18 Yesu abasɔmbɛdja boo: «Kɛɛni ta ibonga odii moto omɔti bea ko balani na nde boo: "Kumu abali boo: Ehole ɛ mbai eimei; nayakalea mia ma Pasika engbanga na batingami ba mbai odii wɛ."» 19 Batingami bakɔɔ oko moda mabaloma Yesu ko babɔngɛdja mia ma Pasika.

20 Mɔkɔmɔkɔ, Yesu adaa ta mesa engbanga na batingami ba nde doomi na babae. 21 Ena ɔdaka bo baya, Yesu abala boo: «Nabalaka na nu, sooti boo: omɔti ta ndanda ɛ boono akabaleani.» 22 Baoka ndjokwa enɛnɛ ko bamohɔdja omɔti na omɔti boo: «Kumu, edii mbai?» 23 Yesu asɔmbɛdja boo: «Moto ona odubeaka na mbai ipa la nde ta saani, edii yo moto okabaleani. 24 Mwana ɔ moto agwalea elengɛɛ ɔkomama mo tina ɛ nde; endolo ndjokwa ndani tina ɛ moto ona okabi Mwana ɔ moto! Ɛboanaka opele tina ɛ moto ona boo adae pɛpɛ obotama.» 25 Yudasi, ona omokabalea ahɔdja boo: «Molehi, edii mbai?» Yesu amosɔmbɛdja boo: «Wɛ mɛɛnɛ obali.»

Mesa ɛ Kumu

26 Ena ɔdaka bo baya, Yesu atomba ipa ko, ngɔngɔ dja osakoa Ndjambe, alibuka ko alipa batingami ba nde; abala na bu boo: «Tombani ko yakani. Hee edii mokuku ma mbai.» 27 Ngɔngɔ djia atomba kɔbɔ, asakoa Ndjambe, abapa ko abala boo: «Ye mwani ino basusu, 28 tina ɛ boo hee edii makia ma mbai, makia ma edhimaneli ɛ Ndjambe imasopei tina ɛ bato bike, tina ɛ oyɛɛmɛ ba masumu ma bobo.