Lucas 24

Ta ndjea e Emausu

13 Oko ta busa bomina, batingami babae badaaka bakakɛe ta ngando emɔti na kombe yu Emausu, ko ngando emina edii bohali bo ngonga djibae bɛngi oimee ta Yelusalɛmɛ. 14 Basabaleanaka midjɔ misusu imimi mikɔɔmɔ. 15 Ehole esolanaka ko e bomanaka ibo kitɛ, Yesu iyo mɛnɛ abatama mbuti na bu ko adalaka engbanga emɔti na bu. 16 Endelo miso ma bobo maihɔnɔ bomosipoa. 17 Yesu abawadja bo: «Eka mɛnɛ ebalakadea ino na ndjea nda?» Baema, ko baluma na ndjokwa. 18 Omɔti o bobo, kombe e nde Keleopasi, abala na nde bo: «Iyaya ta Yelusalɛmɛ, moto omɔti omaka bungea mɛko imimi minɔkɔdea ta masu imimi oko wɛ?» 19 Yesu abawadja: «Iyena nde?» Bamosɔmbedja bo: «Oko midjɔ mikɔɔmɔbi na Yesu o Nadjalɛtɛ! Adaaka motɛli o ngulu enɛnɛ, na mikɔ ko na mibalo ta boso bo Ndjakomba ko ta boso bo bato basusu. 20 Banganga ba Ndjakomba banɛnɛnɛnɛ ko babanei ba biso bamokaba bɛngi bamopɛ etumbu e yogo ko bamobaka ta ekulusu. 21 Ko iso loalɛndɛ bo iyo asikoadea Isalɛlɛ. Endelo a midjɔ misusu donga akɔmɔbimo ekɔi masu masato. 22 Edii sooti, ndambo e bali ba engbanga e biso balokamodji bobuke mɛnɛ, bakɛɛki ehumahuma ta ikila, 23 ko bataneakiti mokuku mo nde bahulaki balotɔndeaki bo babwɛndi babaimaneaki ko babatɔndeaki bo adii na bomɔ*24, 23 Boindja a 24.1-11.. 24 Ndambo ekina e biso bakɛɛki ta ikila, ko bataneaki midjɔ misusu oko mondumba mobatɔndeaki bali bamina, endelo iyo, bamoɛnɛkiti.» 25 Iboa Yesu abala na bu bo: «Bato ba milema mipipo, ino todhimeni mɛko misusu miotɔndeani batɛli! 26 Otadjebakadeani ibo Masiya abwanaki aɛnɛ saya boso bo bokwea ta ekumu e nde?» 27 Ko iyo abasipodja midjɔ mibalama tina e nde ta tei e Makomi, donga Mose mbunoko batɛli basusu.

28 Ehole eimea bo mbuti na ngando iyeye ekɛɛkɛ ibo, Yesu akɔɔkɔ ondingo anɔe pamba ekina. 29 Endelo ibo bamosiya ko babala na nde bo: «Dikama na su; eimea mɔkɔmɔkɔ ko busa bobanga bodipa.» Iboa akwea ta ndako bɛngi adea na bu. 30 Adaaka engbanga na bu ta mesa, ngɔngɔ atomba mapa ko amadjongoa, ko abuka ko abapa. 31 Iboa, miso ma bobo madipoama, ko bamodjeba; endelo alɛmɔ ta miso ma bobo. 32 Ko basabaleana bo: «Milema mi biso midaakiti na sepi enɛnɛ ta ehole elotɔndeaki iyo ta ndjea ko elotingodjaka iyo Makomi?»

33 Oko ta ehole emina baangɔɔ ko basɔmbɔ ta Yelusalɛmɛ. Batanea batingami doomi na omɔti badaaka esika emɔti na bina bu, 34 ibo babala na bu bo: «Edii sooti mɛɛnɛ bo, Kumu asisoi! Asaenɛmedji na Simona!» 35 Ko ibo bɛɛnɛ babadjebedja midjɔ minɔɔkɔ na ndjea na mondumba mo modjeba na bu ndelo ebabukeaka iyo mapa.