1 Ngɔngɔ dji biso bobɔtɔ na bu, lokwea ta masuwa ko lokɛɛ mbala emɔti ta Kosi; ko ngɔngɔ dji isu imɔti loso loimea ta Lodɛsi, lokina ena ko loimea ta Patala. 2 Iho lotanea masuwa mamɔti mapalaka bokɛɛ ta Penisi; loso lokwea ko lokɛɛ. 3 Ehole eimea iso mbuti na Sipele, lokina esanga emina ta dɔɔngɔ di ebɔ e bali ko lotindoa ta Sili. Lotita ta Tile ta polo ebwanaka masuwa bodubodja leka lodaaka otei. 4 Iho lotanea batingami ko lokɔɔ na bu ena masu sambo. Enakoboa batingami balomama na Mwembo ko batɔndea Polo bo adae pɛpɛ bokɛɛ ta Yelusalɛmɛ. 5 Ndelo ekoka masu ma biso ma bodaa iyana, loso lodonga ena. Lodala ko batingami basusu bali na bami bakɛkɛ alosukedja, mbunoko ta sokolu e ngando enɛnɛ. Lodaa magbunda iso basusu ta mokula modua enɛnɛ ko loangɔnɔ. 6 Ko ngɔngɔ dji bosaiseana ndese e suka, lokwea ta masuwa, ko ibo baso basɔmbɔ ta dii ibo. 7 Iyana asidja iso mɔɔngɔ mo biso ta dua, lokina Tile ko lokɛɛ ta Pitolemaisi. Iho loiseana na ndenga, lokɔɔ na bu isu imɔti. 8 Ngɔngɔ dji busa bomɔti, lokɛɛ ko loimea ta Sedjale. Iho, lokwea ta ndako e molehi o Bwɛndi Bopele Pilipo iyona odaaka omɔti ta tei e bato sambo bahɔmɔkɔ na Ekelesa ko lodaa ena ta dii iyo*. 9 Adaka na bana bali banɛi ba pɛpɛ bodjeba baami batɛlɛkɛ midjɔ mi Ndjakomba. 10 Lodikama ena masu manɛnɛ, motɛli omɔti adonga ta Yudhea kombe e nde Agabusi*. 11 Adoa ta dii iso ko atomba mosenge mo Polo asananga mako na mɔmɔ ko abala bo: «Mwembo Mosɛnɔke mobali bo: Moswa mosenge imu Bayudha ba Yelusalɛmɛ bamonangadea mbɔti mondumba imu bamokabadea ta dii bato ibia badii pɛpɛ bodaa Bayudha.» 12 Ngɔngɔ dji booka mibalo mimina, iso bɛnɛ ko na denga di ngando enɛnɛ loangɔnɔ Polo adae pɛpɛ bokɛɛ ta Yelusalɛmɛ. 13 Endelo Polo abasɔmbedja bo: «Oyeakadeani ko ohombakadeani botswuani molema tina nda? Nadii mbuti, ediiti oto ta tina e bonangama mbɔti endelo bogwa ta Yelusalɛmɛ ta tina e kombe e Kumu Yesu.» 14 Iyana adaa iso pɛpɛ bohɔnɔ bohombedja malɛi ma nde, lokina bomopangoa ko loso lobala bo: «Kina bolulea bo Kumu bokokedjame.» 15 Ngɔngɔ dji masu, lokɔɔ mosɛlingo ko loiwea ta Yelusalɛmɛ. 16 Ndambo e batingami ba Sedjale bakɛɛ na su engbanga emɔti, balotomba bɛngi lodikame ta dii Manasɔni, moto o Sipele odaaka modhimi tomba ehele.

17 Aimea iso ta Yelusalɛmɛ, denga baso baloasɔɔ na sepi. 18 Aya busa Polo akɛɛ engbanga emɔti na su ta dii Djake* ta esika eputoana basuku ba Ekelesa basusu. 19 Abaisea ko abatubana modjɔ momɔti na momɔti mokɔɔ Ndjakomba ta mosala mo nde ta tei e bato badii pɛpɛ bodaa Bayudha. 20 Ngɔngɔ dji bomohokamedja, bakumedja Ndjakomba. Ko babala na Polo bo: «Maninga, oɛnɛkɛdea, Bayudha banɛnɛ baimea bakilito: ibo basusu batingama ta Mobeko mo Mose. 21 Enakoboa, baoka bo wɛ olehadea Bayudha ibia badii ta bikomi basundola mobeko mo Mose; obaladea na bu bakine bolena bana ba bobo bipole ko na pɛpɛ bokimana naikina bokɔkɔ bo Bayudha. 22 Lokɔe bo? Sooti mɛnɛ baokadea bo wɛ osi boimea iya. 23 Edii bopele! Kɔɔ midjɔ misusu mibaladea iso na wɛ. Lodii iya na bato banɛi bapalakadea basidje masu ma ndikano ekɔɔ ibo ta dii Ndjakomba. 24 Batomba, kɛɛ na bu ndjea emɔti asasɛnodja ko baputea palanga, bɛngi bakatedje bibɛbɛlɛ*. Iboa bato basusu badjebadea bo midjɔ misusu miokaka ibo ta tina e wɛ midiiti mi sooti, ko baɛnɛdea bo okasume Mobeko. 25 Ta tina e bato badii pɛpɛ bodaa Bayudha ibia baimea bakilito, lobadjebedja meko mi biso ta mokanda bo: bawaniti boyaka muni mo tito otumbei bo bikeko mbeka, edae makiya, na muni mo tio odai ibo pɛpɛ bolena dɔli, badae pɛpɛ bokɔɔ ndukeli*.» 26 Iboa ngɔngɔ dji busa bomɔti, Polo atomba bato bamina, basasɛnodja na bu. Akwea ta tepelo bɛngi atɔndɔe isu di suka di bosasɛnodja ko na ehole epamadea mabondja tina e moto na moto*.

27 Ta mbuti na suka e masu sambo, Bayudha ba ekenge e mokili mo Adjia baɛnɛ Polo ta tepelo. Basumedja emumu e bato basusu balemoe ko bamopea, 28 bagamaka bo: «Bana ba Isalɛlɛ, doani olokamoeni! Indjani moto olehakadea bobe ta dii bato basusu ko pamba djisusu ta tina e ekomi e biso, Mobeko ko na tepelo iyeye. Ko edɛdiyeye, amei boisa pongono Bagɛlɛki ta tei e tepelo ko aimedji esika iye esɛnɔke esika e pita.» 29 Modjɔ mo, baɛnɛ Tolopime o Epeso na Polo ta ngando enɛnɛ ko balɛnɛkɛ bo amokwedjaka ta tepelo*. 30 Mongangale mokwa ta ngando enɛnɛ esusu ko bato badoa mbango ta pamba isusu. Bapea polo ko baimana na nde sokolu e tepelo ko na mbala emɔti badipa midipe. 31 Ehole ehombaka ibo bamoowoe, gala eimea ta dii tilibɛ* Yelusalɛmɛ esusu elumaka na mongangale. 32 Na mbala emɔti, atomba basodha na kapita ba basodha mokama ko bakɛɛ ebango ta pamba edaka emumu e bato. Iyana aɛnɛ ibo tilibɛ na basodha, bakina boboma Polo. 33 Iboa tilibɛ asalinda mbuti na nde ko amotomba ko apa motindo bamonange mbɔti na mikpulu mi bibende mibae; awadja eka edaka iyo ko na doi dikɔɔ iyo. 34 Endelo ta tei emumu e bato, bato na bato bagamaka na mondumba mo bobo. Tilibɛ aisipoaka mɛnɛ eka emɔti ta tina e mongangale mokɔɔkɔ bo; apa mitindo bakɛe na Polo ta bopango bo basodha*. 35 Ehole eimea Polo ta eiweli e ndako, basodha bamongɛngɛtɛ ta tina e mongangale monɛnɛ mokɔɔkɔ emumu e bato, 36 modjɔ mo boto basusu bakimanaka bagamaka bo: «Agwɛ!»

37 Ta ndelo iyena ekɛɛkɛ bo akwedja Polo ta bopango bo basodha, awadja tilibɛ ibo: «Obwani bopani ndjea e bobala eka emɔti?» Tilibɛ amosɔmbedja bo: «Okadjebe bobala monɔkɔ mo Bagɛlɛki? 38 Wɛ te moto o Edjipito iyona, osumedja mongangale masu masa nɔɔ, ko otomba bato koto inɛi ta edhu ibia badaaka baneli ba bila?» 39 Polo asɔmbedja bo: «Nadii Moyuda, nabotama ta Talase ngando enɛnɛ e Silisi, nadii moto o ngando emɔti enene e gala. Naoangɔni pani ndjea nabale na bato.» 40 Tilibɛ aso amopa ndjea. Polo aema diko ta eiweli e ndako, ekɔmea bato embete na ebɔ bɛngi bapɔpɔne. Bato basusu bapɔpɔnɔ ko Polo abala na bu na monɔkɔ mo Baebele bo: