1 Ngɔngɔ dji masu masato iyana aimea iyo ta ekenge e mokili, Pesitusi adonga ta Sedjale ko akɛɛ ta Yelusalɛmɛ. 2 Banganga ba Ndjakomba banɛnɛnɛnɛ ko na bakumu ba Bayudha bapunda Polo ta dii yo. Bamowadja na ingbangba bo 3 abakɔmedje na boloma Polo ta Yelusalɛmɛ; modjɔ mo bakɔɔkɔ inginda imɔti ta tina e nde ko bapalaka bamoowoe na ndjea. 4 Endelo Pesitusi abasɔmbedja bo Polo adaaka ta bɔlɔkɔ ta Sedjale ko iyo mɛnɛ apalakadea asɔmbe iho. 5 Abakea bo: «Kina bo bakondji ba bino bakɛe na mbi engbanga emɔti ta Sedjale bakɛe apunda moto omina iho, ekadaa bo akɔɔ modjɔ momɔti mobe.» 6 Pesitusi akɔɔ ta dii ibo oto masu bomwambe kaoko doomi, ko atita ta Sedjale. Aya busa, adaa ta kiti e nde ekataka iyo makambo ko apa mitindo badoe na Polo. 7 Iyana aimea iyo, Bayudha ibia batitaka donga ta Yelusalɛmɛ bamohika ko bamopunda pundi djinɛnɛ djinɔɔke djidaka na pɛpɛ mwɛngi mo bosamba. 8 Endelo Polo asamba ko abala bo: «Nakɔɔti nongo modjɔ momɔti mobe, edae ta tei e mibeko mi Bayudha, edae ta tina e tepelo, edae ta tina e Kaisala.» 9 Abo Pesitusi apalaka bosepedja Bayudha, awadja Polo bo: «Opalakadea oiwee ta Yelusalɛmɛ asamba ta tina e modjɔ momina iho ta dii mbi?» 10 Polo asɔmbedja bo: «Na dii ta boso bo sambi e Kaisala ko asambadea mbi oko ena. Nakɔmeiti Bayudha nongo bobe bomɔti, wɛ mɛnɛ kutu odjebakadea bopele mɛnɛ. 11 Ekadaa bo nakɔi bobe ko nakakɔɔ bobe bobwani na yogo, natalonakadea bogwa. Endelo ekadaa midjɔ mipundakadeani na bu midiiti sooti, pɛpɛ nongo moto omɔti obwani bokabani ta dii ibo. Nasɛngɛi ta dii Kaisala* akate ikambo i mbi.» 12 Iboa, ngɔngɔ dji Pesitusi bosolana na bato ba nde bakamopɛ bileho, abala bo: «A bo osɛngɛi osambe ta dii Kaisala, okɛɛdea ta dii Kaisala.»

13 Ngɔngɔ dji masu, mokondji Agilipa ko na Belenise, baimea ta Sedjale bɛngi baisee Pesitusi*. 14 Abo bakɔɔ masu manɛnɛ ena, Pesitusi atɔndea mokondji modjɔ mo Polo abala bo: «Edii na moto omɔti iya Pelikisi amokina ta bɔlɔkɔ. 15 Ehole ekɛɛ mbi ta Yelusalɛmɛ, banganga ba Ndjakomba banɛnɛnɛnɛ ko na basuku ba Bayudha bamopunda ko basɛngɛɛni namopɛ etumbu. 16 Mbi nabasɔmbedja bo ta momɛsɛno mo Baloma te bapɛ moto etumbu boso bo nde bosamba na moto o mopundi ta sambi. 17 Iboa badoa na mbi ndjea emɔti. Nainɔdjɔ ngonga, aya busa nadaa ta kiti e ekakate mbi makambo ko naloma babee moto omina. 18 Bapundi ba nde badoa, endelo nalɛnɛkɛ bo babwani bomodosa na midjɔ mikina minɔi mibe. 19 Baisanaka na nde oto kitɛ ta tina e mondumba mo bobo mo bohomba Ndjakomba o bobo bɛnɛ ko na Yesu omɔti iboa ogwa ko Polo adhimedjaka bo adii na bomɔ. 20 Ta tina e mbi, nitaɛnɛkɛdea nongo eka e bokɔ ta modjɔ mondumba imua, ta tina emina nabalabi na Polo aiwee ta Yelusalɛmɛ bɛngi akɛe asamba iho ta tina e modjɔ momina. 21 Endelo Polo asɛngɛi bo: ikambo i nde isukee oko ta dii mokondji monɛnɛ o Loma. Iboa mbi napi simbisi e bomobanea ta bɔlɔkɔ mbunoko namolome ta dii Kaisala.» 22 Agilipa abala ba Pesitusi bo: «Mbi nadii na posa naoke moto omina mbi mɛnɛ.» Pesitusi asɔmbedja bo: «Omokadea puma.» 23 Iboa aya busa, Belenise na Agilipa badoa na ekumu esusu ko bakwea ta ndako e sambi na bakondji ba basodha na basuku ba ngando enɛnɛ. Pesitusi, aloma babee Polo. 24 Iboa Pesitusi abala bo: «Mokondji Agilipa ko ino basusu ibia badii na su iya, oɛnɛkɛdeani moto iyo: Bayudha basusu ba Yelusalɛmɛ ko ba iya badoaki esayea iya ta dii mbi ta tina e moto iyo, na bogama bo abwaniti adaa ta bomɔ. 25 Ta tina e mbi naɛni akoiti nongo modjɔ mobwani na nde bogwa. Abonie iyo mɛnɛ asɛngei mokondji monɛnɛ o Loma akate ikambo; Natombi meko e bomoloma ta dii iyo. 26 Nitadjebakadea nongo eka ebwani mbi bokomea mokondji monɛnɛ o Loma ta tina e nde; ta tina emina nadoi na nde iya ta boso bo bino basusu, ko na bonɔɔ ta dii wɛ mokondji Agilipa, ngɔngɔ dji mawadja, nadie eka ebwani na mbi bokɔɔ. 27 Modjɔ mo nitaɛnɛkɛdea tina ebwani na mbi bolomea mokondji monɛnɛ o Loma mobɔlɔkɔ na pɛpɛ bodjeba modjɔ mo mopundi na bu.»