1 Ngɔngɔ djimina, Polo akɛɛ ta Atɛne ta Kolito*. 2 Iho asongana na Moyuda omɔti na kombe e Akilasi, abotama ta Pɔti: ahulaka ta Itali na mwali o nde Pilisile modjɔ mo mokondji Kolode* apaka mitindo Bayudha basusu baimane ta Loma. Aputoana na bu, 3 ko abo adaaka akɔɔ oko mosala momɔti na bu adikamaka ta dii ibo ko asalaka; mosala mo bobo modaaka mo bokɔɔ bikpangba. 4 Engi busa bo sabata, Polo alehaka ta ndako e miɔngɔnɔ ko ahombaka mwɛngi mo botuba Bayudha na Bagɛlɛki ta edhimeli. 5 Ehole ehula Silasi na Timote ta Masedoane*, Polo asapa na bosusu ta boleha mobalo; adhimedjaka ta dii Bayudha bo Yesu adii Masiya. 6 Endelo iyana alona Bayudha mibalo mi nde ko na bomosinga; abhubhola bisendja bi nde* ko abala na bu bo: «Kina bo makiya mabino madae ta molo mo bino bɛnɛ, eindjiti mbi. Edɛdiyeye nakɛkɛdea ta dii ibia badii pɛpɛ bodaa Bayudha.» 7 Adonga ena ko akɛɛ ta dii moto omɔti na kombe e Titiusi Yusitusi okumeaka Ndjakomba ko ndako e nde edaka mbuti na ndako e miɔngɔnɔ e Bayudha. 8 Kilisipusi, mobanei o ndako e miɔngɔnɔ, adhimea Kumu, na ibota di nde disusu*. Bato banɛnɛ ba Kolito bahokamedjaka Polo, badhima pongono ko batomba batisimo. 9 Bulu bomɔti, Kumu abala na Polo na ndjɛnɛ bo: «Pɛpɛ bobanga oko, endelo bala pɛpɛ bopɔpɔnɔ oko, 10 modjɔ mo mbi na dii na wɛ. Pɛpɛ nongo moto omɔti obakeadea ebɔ e nde diko di wɛ bɛngi aokɔe bobe, modjɔ mo banɛnɛ iya ta ngando iye enɛnɛ badii ba mbi.» 11 Akɔɔ yanga emɔti na ekenge ta Kolito; abalehaka mobalo mo Ndjakomba. 12 Ehole edaka Galiɔni, gupɛlɛnɛlɛ o Akayi*, Bayudha baokana bɛngi bakɔe Polo bobe ko baso bakɛɛ na nde ta sambi 13 ko bamopunda bo: «Moto iyo apalakadea apangoe bato bakumee Ndjakomba na mondumba modii ngalingondo e mobeko.» 14 Polo ahomba abale, endelo Galiɔni asɔmbedja Bayudha bo: «Ekadaa bo moto iyo akɔiki modjɔ mobe kaoko modjɔ momɔti monɔi monɛnɛ, nabwani naohokamedjeni ino Bayudha. 15 Endelo abo edii wɛtoko kitɛ ta tina e bileho, kombe ko na mobeko mo bino, imua moindji ino. Mbi naloni bodaa djudji o mɛko mi mondumba imua!» 16 Ko ababengana ta sambi. 17 Iboa, ibo basusu bapea Sositɛni, mobanei o ndako e miɔngɔnɔ, ko babanga bomoboma boso bo sambi. Endelo Galiɔni aɛnɛ modjɔ momina ngasa.

18 Polo adikama masu manɛnɛ ta Kolito. Ngɔngɔ djimina akina denga ko akwea ta masuwa aso akɛɛ ta Sili na Pilisile ko na Akilasi. Ta Sakelesi ahaedja ebɛbɛlɛ, modjɔ mo masu ma ndikano* epa iyo Ndjakomba makoka. 19 Ehole eimea ibo ta Epeso, abakina ena. Akwea ta ndako e miɔngɔnɔ ko asolanaka na Bayudha. 20 Bamowadja adikame ndambo e masu ena, endelo aidhima. 21 Abakina ko abala bo: «Nasɔmbɔdea ta dii ino, Ndjakomba akapala.» Ko akɛɛ ta Epeso na masuwa. 22 Ehole esɛmɛɛ ibo ta Sedjale, aiwea boso mɛnɛ ta Yelusalɛmɛ aisea bato ba Ekelesa, ngɔngɔ djimina akɛɛ ta Atiosi. 23 Anɔdjɔ moo ehole, asɔmbɔ ko alekedja mbala emɔti ta ekenge e mokili mo Galatia ko na Pilidji*, andindimedje bodhima bo batingami basusu.

24 Enakoboa, Moyuda omɔti na kombe nde Apolosi, abotama ta Alɛkɛdjandɛlɛ, aimeaka ta Epeso. Adaka moto omɔti o bowɛi ko adjebaka Makomi na bobuke mɛnɛ. 25 Aleamaka ta Ndjea* e Kumu, ko alumaka na ingbangba, atɔndɔkɔ ko elehaka bopele mɛnɛ midjɔ mindjaka Yesu. Endelo adjebaka oto batisimo ba Yoane. 26 Abanga bobala na swueya ta ndako e miɔngɔnɔ. Ngɔngɔ dji bomohokamedja, Pilisile na Akilasi bamotomba ko bamoleha Ndjea* e Ndjakomba na mondumba monɔi na bopele. 27 Ngɔngɔ Apolosi atombaka meko e bokɛɛ ta Akayi. Denga basepa na mbuno emina ko bakoma mokanda ta dii batingami bɛngi bamoasɔe bopele. Iyana aimea iyo iho, akɔmedja ibia baimea badhimi banɛnɛ na ngɔlu e Ndjakomba. 28 Modjɔ mo na bowɛi bo nde bo kɔpi, ainedjaka ibunga di Bayudha ta miso ma bato: abainedjaka ta Makomi bo Yesu adii Masiya.