1 Ehole edaka Apolosi ta Kolito, Polo alekedja ta mokili mo ngomba e Adjia, ko aimea ta Epeso. Atanea ndambo e batingami iho. 2 Ko abawadja: «Obolodjani Mwembo Mosɛnɔke ehole eimea ino badhimi?» Bamosɔmbedja bo: «Lopakina oka nongo babala ta tina e Mwembo Mosɛnɔke.» 3 Polo abawadja bo: «Otombani batisimo ba mondumba nda?» Bamosɔmbedja bo: «Batisimo ba Yoane.» 4 Iboa Polo abala na bu bo: «Yoane apaka batisimo babohombedja molema ko abalaka na bato badhimee moto iyona odoadea ngɔngɔ dji nde edii wɛtoko Yesu*.» 5 Ngɔngɔ dji mibalo mimina, batomba batisimo ta kombe e Kumu Yesu. 6 Polo ababakea mɔmɔ ko Mwembo Mosɛnɔke mobatitea; babanga bobala na minɔkɔ mi buki ko na botɛlɛ midjɔ mi Ndjakomba. 7 Bato bamina badaaka ibo basusu mbuti na doomi na babae.

8 Polo akwea ta ndako e miɔngɔnɔ e Bayudha, iho abala na swueya songe basato mobimba. Alehaka ta tina e Bokumu bo Ndjakomba ko akɔɔkɔ na ngulu bɛngi alonge bato ibia bamohokamedjaka. 9 Endelo ndambo e bato, bakɔɔkɔ melo mipipo balonaka bodhima babala bobe tina e Ndjea* ta boso bo bato. Asatuba na bu, ko adongedja batingami ena ko abalehaka masu masusu ta kalasi e Tilanusi. 10 Ekɔɔ bianga bibae, na mondumba mo bo bato basusu badikamaka ta ekenge e mokili mo Adjia, Bayudha na bikomi bikina, baso baoka mobalo mo Kumu.

11 Ndjakomba akɔɔkɔ midjɔ mi bokamoa minɛnɛnɛnɛ na mɔmɔ ma Polo. 12 Na tina emina balwɛkɛ bato ba bipeko bisendja kaoko miswala imia mipeaka mokuku mo nde: ibo basusu bahelaka ko membo mibe miimanaka. 13 Ndambo e Bayudha ibia badalaka pamba djisusu abengane membo mibe na bameka bolanga kombe e Kumu Yesu ta dii ibia badaaka na membo mibe, na bobala bo: «Naopakadeani mitindo oimaneni ta kombe e Yesu iyona okalehe Polo!» 14 Edaka na bana baami ba moto omɔti na kombe e Sikewa, omɔti o banganga ba Ndjakomba banɛnɛnɛnɛ ba Bayudha, bakɔɔkɔ modjɔ momina. 15 Mwembo mobe mobasɔmbedja bo: «Nadjebakadea Yesu ko nadjebakadea Polo. Endelo ino odiini banda?» 16 Ko moto odaaka na mwembo mobe asasaba diko di bobo, abalongea ko ababoma na ngulu mɛnɛ batia ta ndako mbundu ko babeneana pola. 17 Bato basusu ba Epeso, Bayudha ko na bikomi bikina baso baoka modjɔ momina; baoka bɔɔ ko kombe e Kumu Yesu esumama. 18 Bato banɛnɛ ibia badhimaka badoaka ahuodja midjɔ mibe mi bobo. 19 Bato banɛnɛ ta tei e ibia bakɔɔkɔ mikɔ mi bonganga badoa na buku dji bobo ko badjitumbaka ta miso ma bato basusu. Balanga motswiya mo dju ko baɛnɛ bo ibwani na pata dji palanga koto Tuku itano*. 20 Edii wɛtoko na ngulu e Kumu, mobalo monangana ko mosainedja na kpati enɛnɛ.

21 Ngɔngɔ dji midjɔ mimina, Polo, molomamake na Mwembo, atomba meko e bokɛɛ ta Yelusalɛmɛ alekedja ta Masedoane ko na Akayi. Abalaka bo: «Ehole eimeadea mbi iho etungi na mbi nakɛe pongono ta Loma.» 22 Aloma bakamoli ba nde babae, Timote na Elasite ta Masedoane, endelo iyo mɛnɛ adika moo ehole ta Adjia. 23 Ko ta eholo iyena mongangale monɛnɛ mokwa ta tina e Ndjea*. 24 Edaka moto omɔti na kombe Demetiliusi, mosala mo nde bokɔɔ leka lo bibende ko na bikeko bi tepelo bi ndjakomba mwali omɔti kombe e nde Alitemisi* ko na ndenge imina adaaka aputea batuli ba bibende ba nde palanga inɛnɛ. 25 Abaputoanedja ko na bato bakina ibia badaaka bakɔɔ mosala mo mondumba momina, ko abatɔndea bo: «Baningani, odjebakadeani bo lohelakadea oko na mosala imu. 26 Enakoboa oɛnɛkɛdeani ko okakadeani bo, ediiti oto ta Epeso, endelo mbuti na Adjia mosusu, moto okombedjake Polo apangoi ko abungedji mbongo o bato na bobala bo ba ndjakomba bakakɔɔme na mɔmɔ ma bato badiiti ba ndjakomba. 27 Modjɔ momina mobwani bobedja mosala mo biso, endelo mobwani naikina bobedja ekomu e tepelo e ndjakomba monɛnɛ mwali Alitemisi; iboa bato bamoɛnɛdea ngasa iyona okakumee ibo ta Adjia mosusu ko ta ngondo mobimba!»

28 Ehole eoka ibo modjɔ momina, baluma na kɛlɛ ko babanga bogama bo: «Alitemisi o Baepeso adii monɛnɛ!» 29 Mongangale mokwa ta ngando enɛnɛ esusu. Ibo basusu bakɛɛ ta esika e makou* bapea Gaiusi na Alisitalake, bato ba Masedoane ibia badalaka na Polo. 30 Polo apalaka asaimedje ta boso bo emumu e bato, endelo badhimi baso bamosia. 31 Ndambo e basali ba leta ba ekenge e mokili mo Adjia, ibia badaaka badjebani ba Polo bamolomea bwɛndi bo adae pɛpɛ bokɛɛ ta esika e makou.

32 Moto na moto adaaka adumbea na ndenge e nde ko mongangale modaaka mopipo ko bato banɛnɛ baidjebaka tina e boputoana bo bobo. 33 Ta tei e emumu, bato batɔndea moto omɔti na kombe e Alɛkɛdjandɛlɛ modjɔ momina, iyona olindaka Bayudha boso. Angɔdjɔ obɔ: apalaka atombe kɔpi bɛngi atingodje boso bo emumu e bato. 34 Endelo aokabo bo adii Moyuda, ibo basusu bagama engbanga tomba ngonga dji bae bo: « Alitemisi o Epeso adii monɛnɛ!» 35 Ta suka, mokomi o mikanda o ngando enɛnɛ apɔpɔnedja emumu e bato ko abala bo: «Bato ba Epeso, bato basusu badjebakadea bo boto ba Epeso bakabanee ndako e ndjakomba mwali Alitemisi ko na ekeko e nde edonga o diko. 36 Pɛpɛ nongo moto omɔti obwani boboma kitɛ na modjo momina. Iboa obwanini botitedjani milema mi bino pɛpɛ bokɔɔni oko bobe. 37 Bato ibibi badoi na nu iya batsioliti ndjakomba mwali o biso ko bamosingiti. 38 Ekadaa bo Demetiliusi ko na batuli ba nde ba bibende badii na ikambo di bopunda tina e moto omɔti, tibinalo dji dii ko na ba djudji: bakɛe apunda! 39 Ko okadaani na ikambo dikina ibɔngedjamadea ta iputo dinɛnɛ di mibeko. 40 Basaka lopunda na midjɔ imi misa nɔɔmɔ iya busa ibu mi pɛpɛ tɛtɔ loisi mongangale. Modjɔ mo ediiti nongo na mobeko momɔti mosa loloma loputoane iya ko losaka taka eka e bobala.» Ngɔngɔ dji bobala iboa, ayanedja bato.