1 Iyana ahela iso, looka bo esanga emina kombe e yu Malete. 2 Bato ba esanga emina balokɔmea bopele mɛnɛ: abonie mbuwa adaaka akwa ko piɔ ekɔɔkɔ balanedja mosa monɛnɛ ko iso basusu lomohika ta polo eloasɔkɔ ibo. 3 Polo aandoa kata e ndjɛlɛ bɛngi aesabe ta mosa, endelo mombitɔ omɔti na saya e mosa aimana ko atingama na nde ta ebɔ. 4 Ehole eɛne bato ba esanga emina ndjɔ atingi na Polo ta ebɔ, basabaleana bo: «Sooti mɛnɛ moto iyo adii mooweli o bato, modjɔ mo na nongo asahela iyo ta dua enɛnɛ bodju bo Ndjakomba batamopakadea ndjea bo ahelame.» 5 Endelo Polo apukusa ebɔ ende ndjɔ akwa ta mosa ko aioka nongo saya emɔti. 6 Ibo baambaka baɛnɛ ahaloe kaoko akwɛe mbala emɔti ko agwɛ. Endelo batukea tee ko baiɛnɛ nongo modjɔ momɔti mobe bokɔmɔ na nde; basandja malɛno babala bo adaaka ndjakomba*. 7 Mbuti na esika edaka iso, edaka na kpɔtɔ dji mobanei o esanga, kombe e nde Pubiliusi, aloasɔ na bwela ko lowɛɛ ta dii iyo masu masato. 8 Sange e Pubiliusi adaaka asambi apekaka na pɛpɛlɛ ko na mosoa mo makia. Polo akɛɛ ta dii iyo, angɔnɔ na bomobakea mɔmɔ ko amoheledja. 9 Ngɔngɔ djimina, bato bakina ba esanga badaaka na bipeko badoa pongono ko bahela. 10 Baloinedja isuma na modumba mosusu ko ehole ekonda iso ta masuwa, balopa leka losusu lotakaka tina e mɔɔngɔ mo biso.

11 Loyeyoa ta esanga e Malete songe basato. Ngɔngɔ djiimina, lokwea ta masuwa ma Alɛkɛdjandili kombe e mu «Diosikule»*, imia manɔdjɔkɔ ehole e piɔ iho. 12 Loimea ta ngando enɛnɛ e Silakidje iyana lodikama masu masato. 13 Adonga iso ena lokimana mokula bɛngi loimee ta ngando enɛnɛ e Legio. Aya busa mopɛpɛ mo satina mobanga boboma ko ngɔngɔ dji masu mabae loimea ta Pudjole. 14 Ta ngando enɛnɛ iyena losongana na denga balowadja lodikame na bu eyenga emɔti. Iyena edii mondumba moimea na su ta Loma. 15 Denga di Loma baokaka gala e biso ko baso badoa asongana na su ta djaando e Apuisi ko na ta polo ekabee ibo Ndako Djisato. Ehole e baɛnɛ Polo, asakoa Ndjakomba ko aso aoka mokuku ngulu. 16 Ngɔngɔ dji boimea bo biso ta Loma, bapa Polo ndjea e bodaa iyo mɛnɛ e nde polo, na soda omɔti iyona omosɛndjɛlɛkɛ.

17 Ngɔngɔ dji masu masato, Polo abea ba babanei ba Bayudha. Ehole eputoana ibo, abala na bu bo: «Dengani, nongo adai mbi pɛpɛ bokɔɔ bobe bomɔti ta tei e ekomi e biso ko ta midaa mi bakɔkɔ ba biso, napeama ta Yelusalɛmɛ ko nakabama ta dii bato ba Loma. 18 Ngɔngɔ dji bato ba Loma bosambedjani bapalaka batingoeni, modjɔ mo baitaneani na modjɔ mobe mobwani na mbi bogwa. 19 Endelo Bayudha baidhima iboa mbi nasɛngɛɛ bo Kaisala akate ikambo di mbi, na pɛpɛ bobedja gala e ekomi e mbi*. 20 Indjani modjɔ mokambaki na mbi naoɛnɛni ko naotɔndeani. Modjɔ mo banangini mikpulu mi bibende ta tina e mbuno e Ndjakomba ekalɛnde bana ba Isalɛlɛ.» 21 Ibo bamosɔmbedja bo: «Iso lobolodjiti nongo mokanda momɔti modongi ta Yudhea bɛngi losambedje ikambo di wɛ ko pɛpɛ nongo mwange biso omɔti odongi iho bɛngi alotɔndee modjɔ momɔti kaoko bobala bobe ta tina ewɛ. 22 Endelo lopalaki olotɔndee modjɔ molɛnɛkɛdea wɛ, modjɔ mo lodjebakadea ibo pamba isusu balonakadea iputo idia idii wɛ.» 23 Bahɔɔ busa bo bosongana na Polo, ko aimea busa bomina, badoa ibo banɛnɛ ta ndako edhikamaka iyo. Polo abatɔndeaka Bokumu bo Ndjakomba donga ehuma mbunoko mɔkɔmɔkɔ, ko ahombaka abapangoe badhime Yesu na bolanga Mobeko mo Mose ko na buku dji Batɛli. 24 Bato bakina badhima mibalo mi nde, bakina baidhima. 25 Iboa banangana na pɛpɛ mookano ta tei e bobo, Polo abala na bu na bokue bo: «Mwembo Mosɛnɔke modaaka na molonga ehole ebala imo na bakɔkɔ ba bino na ndjea e motɛli Isaya! 26 Mobala bo:

"Kɛɛ atɔndee bato ibia bo:

Okakadeani bopele, endelo otasipoadeani;

oindjakadeani bopele, endelo otaɛnɛdeani.

27 Modjɔ mo milema mi bato ibibi midii mipipo;

baditei matoi ko badipi miso, bɛngi madae pɛpɛ boɛnɛ, matoi ma bobo madae pɛpɛ booka, badae pɛpɛ bodia bowɛi bo bosipoa ta tina emina iyena badae pɛpɛ bohombedja milema ta dii mbi

bɛngi nabaheledje*."

28 Djebani bopele bo, Ndjakomba aloma bwɛndi bo mohelo ta dii bato badii pɛpɛ bodaa Bayudha*: ibo bamookɛadea!»

[ 29 Ama bala Polo iboa, Bayudha baimana aisane kitɛ enɛnɛ mɛnɛ.*]

30 Polo akɔɔ bianga bibae itombo ta ndako e boputela. Iho asɔkɔ bato basusu bakɛkɛ amoindja. 31 Alehaka mɛko mi Bokumu bo Ndjakomba ko alehaka midjɔ miindji Kumu Yesu Kilito na sweya enɛnɛ ko moto o bomosia aidaka.