1 Agilipa* abala na Polo bo: «Obwani bosamba modjɔ mo we.» Iboa Polo angɔdjɔ ebɔ ko asamba bo: 2 «Mokondji Agilipa, na dii na sepi busa ibubu bosamba ta boso bo wɛ ta tina e midjɔ misusu mipundakini na Bayudha, 3 modjɔ mo wɛ odjebakadea midaa mi Bayudha ko na mondumba mokabome bo kitɛ. Naɔngɔnɔkɔdea ohokamedjeni na molema motitake.

4 «Bayudha basusu badjebakadea eka edaka bomɔ bo mbi, donga bwɛngɛ bo mbi; badjebakadea mondumba mohelama mbi ta tei e bato ba mbi ko ta Yelusalɛmɛ. 5 Babwani kutu bodaa batemo ba mbi, elɔkɔ ebo badjebakadeani tomba ehele, nadaaka omɔti ta tei e iputo di Bapalisai* disapaka na ngulu ta mondumba mo biso mo bohomba Ndjakomba. 6 Nakaimea edɛdiyeye ta sambi, edii tina e bo naisi elɛndɛ ta ndikano ekɔɔ ndjakomba na bakɔkɔ ba biso. 7 Mbota doomi na ibae djikalɛnde djiɛnɛ bokokedjama bo ndikano emina na bosalea Ndjakomba bulu na moi. Ko mokondji Agilipa, Bayudha bapundakadeani ta tina e elɛndɛ emina! 8 Ino badii iya, tina ndani obwanitini bodhima bo Ndjakomba akasisodje bato bago? 9 Mbi mɛnɛ nalɛnɛkɛ bo ebwanaka na mbi nanedje kombe e Yesu o Nadjalɛtɛ. 10 Iyena edii eka ekɔɔkɔ mbi ta Yelusalɛmɛ. Naisa bato basɛnɔke banɛnɛ ta bɔlɔkɔ; bobwana na bokondji ibua bodiaka mbi ta dii banganga ba Ndjakomba banɛnɛnɛnɛ, mbi nadhimaka ta ehole etombamaka meko e bobaowa. 11 Mbala inɛnɛ nabapaka etumbu ta ndako djisusu dji miɔngɔnɔ mi Bayudha, ko nabalomaka na ngulu balone bodhima. Nadaaka na kɛlɛ na bu ko nabanɔngedjaka tee mbunoko ta ngando djinɛnɛnɛnɛ dji bakɛndɛli*.»

12 «Iyena edii mondumba mokɛɛ mbi ta Damasi na bokondji ko na elomu lopani banganga ba Ndjakomba banɛnɛnɛnɛ. 13 Mokondji Agilipa, nadaaka na ndjea, ta ehole e midi, naɛnɛ bohu bomɔti bodongaka ta busa, bongɛsɛkɛ bonɔ modaakabusa, ko bokundakani na bato badalaka na mbi engbanga. 14 Iso basusu lokwa ta kpɔtɔ ko mbi naoka kɔpi ebalaka na mbi na monɔkɔ mo Baebele bo: "Saulu, Saulu, tina enɔngedjakadeani na wɛ nda? Ediiti na tina e bokɔ molo mobe ondingo ngɔmbɛ okalone bosuma mobalake mo mobanei o nde." 15 Mbi nawadja bo: "Kumu, wɛ nda?" Ko Kumu asɔmbedjani bo: "Mbi nadii Yesu iyona onɔngedjakadea wɛ. 16 Endelo donga ta kpɔtɔ, ema diko. Mbi nasaɛnɛmedji na wɛ bɛngi osaleeni; odadea temo o mbi bɛngi otɔndee mondumba moɛnini na wɛ ko na midjɔ mi oinedjadea mbi naikina. 17 Naobaneadea pamba isusu iolomedea mbi edae ta dii Bayudha kaoko ta dii bato badii pɛpɛ bodaa Bayudha. 18 Badipoa miso, badongedja ta modidi baimane ta bohu ko badongedja ta bokondji bo Satana badoe ta dii Ndjakomba. Bakamadhimeani badiadea ekutubanedji e pekato ko badie polo ta tei e bato ibia bahɔɔ Ndjakomba." »

19 «Ta tina emina, mokondji Agilipa, naimea bosuma ndjɛnɛ enɛ mbi bodonga ta busa. 20 Endelo nalehaka boso mɛnɛ bato ba Damasi ko na bato ba Yelusalɛmɛ, ngɔngɔ djimina bota basusu ba Yudhea ko na bato ba bikomi bikina; nabatɔndea basɔmbɔtɔne midaa ko badoe ta dii Ndjakomba ko misala mi bobo miinedje sooti mɛnɛ bo basɔmbɔtɔni*. 21 Iboa ta tina emina Bayudha bapeakabini ta tepelo ko bahombakabi baowoeni. 22 Endelo Ndjakomba abaneini tee mbunoko busa ibu ko nadii oko natɔndea mwako mo nde ta dii bato basusu, bobanga na bato ngasa mbunoko ta dii bakumi. Nitabalakadea modjɔ mokina, oko modjɔ mobala batɛli na Mose motungi mokɔɔme: 23 Kilito aɛnɛbi saya, asisoabi moto o boso ta tei e bato bago ko atɔndeabi bohu ta dii bato ba biso ko na bikomi bikina*.»

24 Ehole edaka Polo asamba boa, Pesitusi* agama bo: «Polo odii na igboma! Bodjeba bobuke bo wɛ bokɔnedji igboma!» 25 Polo asɔmbedja bo: «Mokumi Pesitusi, nadiiti na igboma. Mɛko misabala mbi midii mi sooti ko midii na tɛtɔ. 26 Mokondji Agilipa adjebakadea midjɔ mimina misusu na tina emina namibalakadea na swueya esusu boso bo nde. Nadhimakadea bo atabungeakadea nongo eka emɔti, modjɔ mo doi dimina dibalama ta mbombi. 27 Wɛ mokondji Agilipa, okadhime modjɔ mobala batɛli? Nadjebakadea bo okamodhimee!» 28 Agilipa abala na Polo bo: «Ediki mweka ohombedje malɛno ma mbi tina e boimea mokilito?» 29 Polo asɔmbedja bo: «Ekadika ehole ekɛkɛ kaoko ehole eyai, naangɔnɔkɔdea Ndjakomba ta tina e wɛ ko na ino basusu ibia bahokamedjakadeani busa ibubu, oimeeni ondingo mbi, dongedja oko mikpulu mi bibende imi minangini na bu!» 30 Iboa mokondji, gupɛlɛnɛlɛ, Belenise ko na bato basusu ibia badaaka na bu, baangɔ 31 ko basatuba ngungusa, basabaleana bo: «Moto iyo aikɔ nongo bobe bomɔti bobwani na nde bogwa kaoko bokwea ta bɔlɔkɔ.» 32 Ko Agilipa abala na Pesitusi bo: «Aso adaa pɛpɛ bosɛngɛ Kaisala akate ikambo di nde bakaki motingoa.»