1 Ko Saulu adhimedjaka yogo e Etsiɛni*.

Oko ta busa bomina ibua monɔngɔ mopipo mokwea ta Ekelesa e Yelusalɛmɛ. Badhimi basusu, banangana ta ekenge e mokili mo Yudhea ko na Samalia dongedja oko bapɔsɔlu. 2 Endelo bato ba milema mipele bapusea Etsiɛni ko bayea bobuke mɛnɛ ta tina e yogo e nde.

3 Saulu, aowaka Ekelesa na ingbangba; akweaka ta ndako emɔti na emɔti, apee bali na baami, ko abaisaka ta bɔlɔkɔ*.

4 Bato ibia bananganaka, badalaka ta ekomi esusu, atondee mobalo mo Bwɛndi Bopele. 5 Pilipo, anɔɔ ta ngando enɛnɛ emɔti e Samalia, ko abanga botɔndea gala e Kilito. 6 Emumu e bato baputoana bahokamedjaka bopele mɛnɛ mibalo mi Pilipo ehole eokaka ibo ko eɛnɛkɛ bo bimbete bikɔkɔ iyo. 7 Modjɔ mo membo mi pita miimanaka na bato banɛnɛ na bogama na ngulu ko na bato ba binama bikatatake ko na bitumbɛ banɛnɛ bahelaka. 8 Iboa, mongandi moso modaa monɛnɛ ta ngando enɛnɛ emina. 9 Enakoboa donga ehele moto omɔti adaaka ta ngando enɛnɛ emina kombe e nde Simona. Akɔɔkɔ bonganga ko akamodjaka bato ba Samalia. Asatukoaka moto monɛnɛ, 10 ko bato basusu, bobanga na bɛngɛ mbunoko basuku basapaka na nde. Babalaka bo: «Moto iyo adii na ngulu e Ndjakomba, iye ekabee bo "Ngulu enɛnɛ".» 11 Basapaka na nde, modjɔ mo donga ehele abakamodjaka na mikɔ mi nde mi bonganga. 12 Endelo ehole edhima bo Bwɛndi Bopele bobatɔndea Pilipo ta tina e Bokumu bo Ndjakomba ko na tina e Yesu Kilito, batomba batisimo na bali na baami. 13 Simona iyo pongono adhima ko atomba batisimo; adikamaka na Pilipo ko alumaka na bokamoa na boɛnɛ bimbete na midjɔ minɛnɛ mi bokamoa imia mikɔɔmɔkɔ.

14 Aoka bapɔsɔlu ibia badaaka ta Yelusalɛmɛ bo Samalia edhimi mobalo mo Ndjakomba, babalomea Petelo na Yoane. 15 Ehole eimea bo ta Samalia, baangɔnɔ tina e badhimi bɛngi badie Mwembo Mosɛnɔke. 16 Abo, Mwembo Mosɛnɔke moipetaka tita nongo diko di moto omɔti o bobo; batomba batisimo oko ta kombe e Kumu Yesu. 17 Iboa Petelo na Yoane ba babakea mɔmɔ, ko badia Mwembo Mosɛnɔke. 18 Ehole eɛnɛ Simona bo Mwembo mopaami ta ndelo ebabakea bapɔsɔlu mɔmɔ, abalwɛ palanga 19 ko abala bo: «Pani mbi pongono bopilo bomina, bɛngi bato ibia babakeabi mbi mɔmɔ babolodje Mwembo Mosɛnɔke.» 20 Endelo Petelo amosombedja bo: «Kɛɛ agwɛ na wɛ na palanga dji wɛ, modjɔ mo olɛdji bo ikabo di Ndjakomba dibwani bosombama na palanga! 21 Obolodjiti nongo eka emɔti ta midjɔ imi minɔmɔkɔdea iya, modjɔ mo molema mo wɛ moditi bodju ta boso bo Ndjakomba. 22 Sandja malɛi imia ma wɛ mabe ko angɔnɔ Kumu, bɛngi ekabɔngɔ, akutubanedjadea malɛi ma molema masadiaka wɛ mabe. 23 Naɛni bo molema mo wɛ modii molumake na bobe ko odii mobuli o pekato.» 24 Iboa Simona asɔmbedja bo: «Ino bɛnɛ angɔnɔni Kumu tina e mbi, bɛngi bo eka emɔti edae pɛpɛ bokɔɔmɔ na mbi.» 25 Ngɔngɔ dji bobala tati ko na boleha mobalo mo Kumu, bapɔsɔlu bamina babae baso basɔmbɔ ta Yelusalɛmɛ. Ndjea ndjea, baleha Bwɛndi Bopele ta ngando djinɛnɛ dji Samalia.

26 Obwɛndi o Kumu abala na Pilipo: «Okɛdea ta pamba e satina, ta ndjea iyena etitakadea ta pamba e Yelusalɛmɛ ta Gadja. Ndjea emina iyena edii edhu.» 27 Na mbala emɔti aso akɛɛ. Na ndjea moto omɔti amoimanea: adaaka moto o Etsiopia, mobanei o palanga ko na leka losusu lo Kandase*, mokondji mwali o Etsiopia; akɛkɛ ta Yelusalɛmɛ akumea Ndjakomba ko moto omina bamoowa esendja 28 ko ayanaka ta ndako e nde. Adaka na mobondo ta diko di ikalo inde, alangaka buku e motɛli Isaya. 29 Mwembo motɔndea Pilipo bo: «Salinda osongane na ikalo idi.» 30 Pilipo asalindi na ebango ko aoka moto Etsiopia alangaka buku e motɛli Isaya. Amowadja bo: «Osipoakadea mɛko imia milangakadea wɛ?» 31 Moto omina a amosɔmbedja bo: «Nabwani bosipoa midjɔ mimina ndenge nda moto amiti mitɔndeani?» Ko abea Pilipo aiwee ta ikalo bɛngi adae mbuti na nde. 32 Ikomi idia dilangaka iyo ibalaka bo:

«Adaka ondingo bhata opalakadea bo balene dɔli,

ondingo mwana o bhata akadae pɛpɛ boyea boso bo moto iyona omohakadea ngungi.

Aidipoa nongo monɔkɔ.

33 Bamosambodjaka ko aidia molonga.

Omina obwani bobala tina e batitani ba nde nda?

Modjɔ mo ta kpɔtɔ baimedja bomɔ bo nde ta suka*.»

34 Moto o Etsiopia awadja Pilipo bo: «Naɔngɔnɔkɔdea, tondeani motɛli abalakadea iya tina e nda? Edii tina e nde iyo mɛnɛ kaoko tina e moto okina?» 35 Iboa Pilipo atomba kɔpi oko ta Ikomi dimina amotɔndea Bwɛndi Bopele bo Yesu. 36 Iyana amaka bo kɛɛ baimea ta polo emɔti edaka na madiba. moto oyona oowa bo esendja abala bo: «Indja madiba, eka ndani edii bosia bo nadae pɛpɛ botomba batisimo?» 37 [Pilipo amotɔndea bo: «Okadhima na molema momɔti, obwani botomba batisimo.» Iyo asɔmbedja: «Nadhimi bo Yesu Kilito adii Mwana o Ndjakomba*.»] 38 Ko aemea ikalo. Ibo basusu babae batitea ta madiba, Pilipo na moto oowa bo esendja, ko amobatisa. 39 Ndelo eduboa bo ta madiba Mwembo mo Kumu motomba Pilipo moto iyona aiɛnɛ Pilipo naikina akɛɛ mɔɔngɔ mo nde na mosepi mɛnɛ. 40 Ta tina e Pilipo aɛnɛmɛ ta Adjote*, ko anɔɔ ta ngando djinɛnɛ alehe mɔɔngɔ masusu Bwɛndi Bopele mbunoko ehole eimea iyo ta Sedjale.