1 *Ndambo e bato badonga ta Yudhea badoa ta Atiosi ko ba babanga boleha denga bo: «Obwanitini bohelani bamiti olenani epole mondumba molomakadea mobeko mo Mose.» 2 Polo na Balanabasi balona bileho bimina baisana kitɛ na bato bamina. Iyana apinga modjɔ momina, batomba meko bo Polo na Balanabasi na badhimi bakina ba Atiosi baiwee ta Yelusalɛmɛ ta dii bapɔsɔlu ko na basuku bɛngi babɔngedje modjɔ momina. 3 Ekelesa ebakamoa na modjɔ mokambaka na bu tina e mɔɔngɔ momina. Bakatisa Penisi na Samalia, atubane mondumba mohombanaka na bato badii Pɛpɛ bodaa Bayudha ta dii Kumu: gala emina esepedjaka denga dinɛnɛ.

4 Ehole eimea bo ta Yelusalɛmɛ, basɔɔmɔkɔ na Ekelesa, bapɔsɔlu ko na basuku, ko babatubana midjɔ misusu mikɔɔ Ndjakomba na ndjea e bobo. 5 Endelo ndambo e bato ba iputo di Bapalisai, ibia baimeaka badhimi, baema ko babala bo: «Etungi bolena bato badii pɛpɛ bodaa Bayudha bipole ko bobaloma na ngulu basume mobeko mo Mose.»

6 Bapɔsɔlu na basuku baputoana bɛngi baikoe modjɔ momina.

7 Ngɔngɔ dji bobo boisana kitɛ enɛnɛ, Petelo aema ko abala bo: «Baningani, odjebakadeani donga ehele Ndjakomba ahɔɔni ta tei e bino bɛngi natɔndee Bwɛndi Bopele ta dii ibia badii pɛpɛ bodaa Bayudha baboke ko badhime. 8 Ko Ndjakomba, iyo okadjebe milema mi bato, ainedja bo abaasɔkɔ na bobapa Mwembo Mosɛnɔke oko mondumba mopa iyo iso*. 9 Ediiti na etikoanelo ta tei e biso na bu: asɛnodja milema mi bobo modjɔ mo badhima. 10 Edɛdiyeye mɛnɛ, tina emekakadea na nu Ndjakomba na bohomba bolwadja badhimi muna mo bo na bakɔkɔ ba biso na iso bɛnɛ loihɔnɔ bomolwa? 11 Lodhimakadea bo loheli na ngɔlu e Kumu Yesu, mondumba momɔti na bu!» 12 Iboa ibolea isusu iso dipɔpɔnɔ ko bahokamedja Balanabasi na Polo batubana bimbete na bingengo bibakɔmea Ndjakomba ta dii bato ibia badii pɛpɛ bodaa Bayudha. 13 Ehole emadja bo bobala, Djake* atomba kɔpi ko aso abala bo: «Baningani hokamedjanini! 14 Simona* atubani mondumba mokwea Ndjakomba donga mbangi ta dii bato ibia badii pɛpɛ bodaa Bayudha bɛngi ahɔe ta tei e bikomi bato ba nde. 15 Mibalo mi batɛli mibwani na modjɔ momina, modjɔ mo Makomi malakadea bo: 16 "Kumu abala bo, ngɔngɔ djimina nasɔmbɔdea bɛngi natonge naikina ndako e Dhapiti iyena ekwaka, nangɔdjɔdea bikuka bi yu, ko naemedjadea. 17 Iboa bato bakina basusu bahombadea Kumu, sooti, bikomi bisusu bibea mbi bɛngi bidae bi mbi. Indja Kumu atɔndeakadea bo, 18 Iyona odjebedja ko okokedja modjɔ momina tomba ehele mɛnɛ*." 19 Na tina emina, naɛni bo lobwaniti bokɔ bobe ta dii bato ibi badii pɛpɛ bodaa Bayudha, ibibi basadhimea Ndjakomba. 20 Endelo lobakomee bo: Pɛpɛ boyakani muni mo tito mo djɛti imu motumbei ibo ekeko mbeka, pɛpɛ bokɔɔ ndukeli, pɛpɛ boyaka tito oowoi ibo na pɛpɛ bomolena dɔli pɛpɛ bomoyakani ko pɛpɛ bomwakani makiya ma nde*. 21 Modjɔ mo tomba ehole eyou, bato bakalehe mibeko mi Mose engi ngando enɛnɛ ko bakamilange ta ndako dji miɔngɔnɔ e Bayudha engi sabata.»

22 Iboa bapɔsɔlu na basuku ko na Ekelesa esusu batomba meko e bohɔɔ ndambo e bato ta tei e bobo ko babalome ta Atiosi na Polo ko na Balanabasi. Bahɔɔ Yudhasi obeaka ibo pongono Balasabasi, na Silasi bato babae badaaka na gala ta tei e denga. 23 Babapa mokanda ta tei bakoma bo: «Denga didii pɛpɛ bodaa Bayudha, ko badikamakadea ta Atiosi, ta Sili ko na ta Silisi asɔni ndese edongi ta dii iso denga di bino bapɔsɔlu ko na basuku. 24 Lookakabi ibo bato ibia badongaki ta dii iso baoyekeini ko babali na nu midjɔ mimina miotungei malɛno ma bino enakoboa iso lobalomakiti. 25 Na tina emina, iso basusu lookanaki bohɔɔ bato ko lobalome ta dii ino. Badoadea engbanga emɔti na bangi i biso ba epaeli Balanabasi na Polo. 26 Ibo baipabi yogo ta kombe e Kumu o biso Yesu Kilito. 27 Loolomeini Yudhasi na Silasi ibo bɛnɛ baotɔndeadeani eka ekomi iso iya ta mokanda. 28 Modjɔ mo iso na Mwembo Mosɛnɔke ko na iso bɛnɛ lotapalakadea boopani muna mokina oko midjɔ imimi tɛtɛ: 29 pɛpɛ boyakani muni mo tito imua motumbei ibo bkeko mbeka; Pɛpɛ boyaka makiya na munu mi tito mopɔlu; pɛpɛ konkɔni ndukeli. Okamakinani mɛko imia okɔini bopele!» 30 Bakina bato ibia bahɔɔ ibo ko baso bakɛɛ ta Atiosi. Iho baputoanedja badhimi ko babapa mokanda. 31 Bamolanga ko ibo basusu basepa ko mokanda momina moso mobapingedja. 32 Yudhasi na Silasi ibo bɛnɛ badaaka batɛli, basola na denga ehole eyai ko babapingedjaka ko bobambimbimedja ta edhimeli. 33 Ngɔngɔ dji moo ehole mokɛkɛ, denga baso babakina basɔmbe na bogo ta dii bato ibia babalomaka. [34 Endelo Silasi atomba meko e bodikama ena.] 35 Polo na Balanabasi badika ta Atiosi. Na bato bakina banɛnɛ, balehaka ko batɔndeaka Bwɛndi Bopele bo Kumu.

36 Ngɔngɔ i moo ehole mokɛkɛ, Polo abala na Balanabasi bo: «Losɔmbe aindje denga ta ngando djinɛnɛnɛnɛ djisusu dji tɔndea iso mobalo mo Kumu, bɛngi lopete ɛnɛ mondumba modalakadea ibo.» 37 Balanabasi ahombaka atombe Yoane okabee ibo Malako 38 Endelo Polo aso alona, modjɔ mo abakinaka ta Papili ko aidaka na bu engbanga emɔti ta mosala mo bobo*. 39 Baanoana bobuke mɛnɛ ko baso babɔtɔɔ. Balanabasi atomba Malako bakwea ta masuwa bakɛɛ ta Sipele, 40 Polo ahɔɔ Silasi ko akɛɛ, ko alomama na denga na ngɔlu e Kumu.

41 Balekedja ta Sili ko na Silisi*, ambimbimedje Bikelesa.