1 Ngɔngɔ dji masu matano, Ananiasi, nganga o Ndjakomba o monɛnɛ atita ta Sedjale na ndambo e basuku ko na mbaeli omɔti, kombe e nde Tɛlɛtulusi. Apunda Polo ta dii gupɛlɛnɛlɛ*. 2 Babea Polo ko Tɛlɛtulusi amopunda bo: «Mokondji, lokadaa na bogo edii tina e wɛ, modjɔ mo obɔngedjakadea midjɔ misusu mi ekomi e biso. 3 Mokumi Pelikisi, loopi misakoa minɛnɛ ta tina e midjɔ minɛnɛ misusu mikabolodje iso ndelo esusu pamba na pamba. 4 Endelo nitapalakadea bonɔdjɔ ngonga e wɛ, na tina emina nasɛngɛkɛdea ngɔlu ta dii wɛ olohokamedje moo mweka. 5 Modjɔ mo iso loɛni bo moto iyo anɔi bobe: aisakadea mongangale ta dii Bayudha basusu ta ngondo mobimba, adii mokondji o iputo di bato ba Nadjalɛtɛ*. 6 Ameka bosɛtodja tepelo. Ko loso lomopea. [Lopalaka lomosambedje bobwana na mibeko mi biso, 7 endelo tilibɛ Lisiasi akwea ta modjɔ momina ko amokatoa ta mabɔ ma biso na ngulu. 8 Ko Lisiasi apa mitindo lodoe amopunda ta dii wɛ*.] Okamadea wadja moto iyo, odjebadea tina e midjɔ mimopundakadea na su.» 9 Bayudha baisa mɔmɔ ta pundi emina ko badhimedja bo edaka sooti.

10 Gupɛlɛnɛlɛ akɔɔ Polo embete bɛngi abale ko aso abala bo: «Nadjebakadea bo okɔi bianga binɛnɛ ta mosala mo djudji ta ekomi e biso; nasambakadea ta boso bo wɛ na pɛpɛ bɔɔ. 11 Wɛ mɛnɛ kutu obwani bokɔtɔlɔ, enɔi masu doomi na mabae naiweakabi ta Yelusalɛmɛ akumea Ndjakomba. 12 Pɛpɛ nongo moto omɔti otaneani ta tepelo, ta ndako e miɔngɔnɔ e Bayudha, ko na ta ngando enɛnɛ, naisana kitɛ na moto omɔti kaoko naisa sumedja bakɔe monganga nongo mbala emɔti ta tei e emumu e bato. 13 Bato ibibi babwaniti nongo boinedja embete emɔti ta modjɔ imu mopundakadeani na bu. 14 Ta tina emina, nadhimakadea ta boso bo wɛ bo: nakasalee Ndjakomba o bakɔkɔ ba biso ta Ndjea* iyena ebalakadea bo ebe; ko nakadhime midjɔ misusu mikomama ta Mobeko ko na buku dji Batɛli. 15 Mbi na bu lodii na elɛndɛ ta dii Ndjakomba bo, bato ba bodju na bato babe, basisoabi ta bogwa*. 16 Ta tina emina mbi pongono nakɔkɔdea na ngulu bɛngi na dae na molema mosɛnɔke ta boso bo Ndjakomba ko ta boso bo bato.

17 «Ta ngɔngɔ dji bianga binɛnɛ, nadoa ta ekomi e mbi tina e bokamoa bakwali ko bopa mabondja. 18 Iyana ataneani bo ta tepelo edaka ta ehole e bosasɛnodja bo mbi: bato baidaka banɛnɛ ko mongangale moidaka*. 19 Ebwani bodaa wɛtoko ndambo e Bayudha ba ekenge e mokili mo Adjia badaaka ena ko edii ibo bato babwanaki bopundani ta dii wɛ, iyana adaaka ibo na modjɔ momɔti mobe tina e mbi. 20 Kaoko, bato ibibi, batɔndee modjɔ mobe moɛni bo ehole esambaki mbi ta boso bo Ikita dinɛnɛ. 21 Dongedja oko kɔpi emɔti egamabi mbi ena naemi diko ta ndanda e bobo bo: "Osambedjakadeanini boso bo bino* oko elɔkɔe nakadhime bo bato bagwa basisoabi!" » 22 Pelikisi iyo adjebaka bopele mɛnɛ modjɔ mo Ndjea*, iboa alindaka modjɔ momina ngɔngɔ ko abala na bu bo: «Ehole etitabi tilibɛ Lisiasi, nakatabi modjɔ mo bino.» 23 Apa mitindo ta dii kapita o basodha mokama asɛndjɛle Polo ta bɔlɔkɔ, ko na bokinea moo enɔli ko na bopa ndjea ta dii bato ba nde ibia babwanaka bomokɔmedja.

24 Ngɔngɔ dji masu Pelikisi adoa na mwali o nde Dulisile*, iyona odaaka Moyudha. Aloma bahombe Polo ko amohokamedja abalaka iyo tina etingi na edhimeli ta dii Yesu Kilito. 25 Endelo iyana abalaka Polo ta tina e bohelama ta bodju, na mondumba mo bosagbindea ko na sambi ekɛkɛdea adoe, Pelikisi aluma na bɔɔ ko abala na nde bo: «Edɛdiyeye obwani bopeta kɛɛ naolɛdjedjadea ngɔngɔ nakadiadea ngonga.» 26 Alɛndɛkɛ bo Polo abwani bomopa palanga; Ta tina emina amobeaka mandɛli mandɛli bɛngi basolake. 27 Enɔɔ bianga bibae, Pɔlɔsiusi Pesitusi* atitana Pelikisi. Iyo apalaka bosepedja Bayudha, akina Polo oko ta bɔlɔkɔ.