1 Petelo na Yoane babalaka naikina na bato, ehole eimea banganga ba Ndjakomba*, mokondji o basindjili ba tepelo ko na Basadukai. 2 Badaaka mɛnɛ na kɛlɛ modjɔ mo ibo babae badoi na bileho bi bobo ta dii bato ko balehi bo Yesu asioaka ta bogwa, ko na tina emina badhimedja bo bato bago babwani bosisoa. 3 Babapea ko babaisa ta bɔlɔkɔ na bulu, modjɔ mo busa bosiaka. 4 Ekahia, ta tei e bato ibia baokaka bwɛndi bo bapɔsɔlu, banɛnɛ badhima, ko motswuya mo badhimi moiwea bokimana bato koto djitano. 5 Ngɔngɔ dji busa bomɔti, bakondji ba Bayudha, basuku ko na balehi ba mobeko baputoana ta Yelusalɛmɛ. 6 Edaka: Ane, nganga o ndjakomba o monɛnɛ, Kaipa, Yoane, Alɛkɛdjandɛlɛ ko na bato basusu ba libota di nganga o Ndjakomba o monɛnɛ. 7 Baemedja bapɔsɔlu ta boso bo bobo ko babawadja bo: «Ino okɔini modjɔ imia na ngulu e nda kaoko na kombe e nda?» 8 Iboa Petelo aluma na Mwembo Mosɛnɔke ko abala na bu bo: «Babanei ko na basuku: 9 olowadjakadeani busa bu eloketingi na bopele bokɔi iso na moto iyo o mako makatatake, olowadjakadeani mondumba ndani moheli na moto iyo. 10 Bopele, etungi odjebeni ino basusu, ko na bato basusu ba Isalɛlɛ bo: moto iyo akaema boso bo bino na mokuku mopele, edii wɛtoko na bopilo bo kombe e Yesu Kilito o Nadjalɛtɛ, iyona obaka ino ta ekulusu ko Ndjakomba amosisodja ta tei e bato bago. 11 Yesu adii iyona obalakadea Makomi bo: "Ibanga idumba ino batongi ba ndako, imei ikwee di ndonga idia dipeli ndako esusu*." 12 Bato babwani bohela oko na ndjea e nde, modjɔ mo pɛpɛ nongo esika emɔti ta ngondo mobimba, Ndjakomba aipa bato kombe ekina ebuki ebwani boloheledja.» 13 Bato ba Ikita baluma na bokamoa, modjɔ mo baɛnɛkɛ swueya e Petelo na Yoane ko badjebaka bo badaaka bato ngasa bato badaa pɛpɛ bokwea kalasi. Badjebaka naikina bo badaaka bato ibia badalaka na Yesu engbanga emɔti. 14 Endelo baɛnɛkɛ pongono moto iyona ohela aemi mbuti na bu ko baidiaka eka e bosɔmbedja. 15 Babapa motindo baimane sokolu e Ikita dinɛnɛ ko babanga boisana kitɛ ta tei e bobo. 16 Babalaka bo: «Ebwani so bokɔɔ na bato ibibi nde? Modjɔ mo bato basusu ba Yelusalɛmɛ badjebakadea bopele bo edii ibo bato bakɔi midjɔ mi bokamoa imi minɛnɛ ko lobwaniti bomidimbodja. 17 Endelo gala e modjɔ imu ebwaniti bonangana ta dii bato basusu. Lobagamee ko lobasie badae pɛpɛ bobalea nongo moto omɔti kombe e Yesu.» 18 Iboa, basɔmbɔ bobabea ko babasia na ngulu mɛnɛ bobala kaoko boleha na kombe e Yesu. 19 Endelo Petelo na Yoane babasɔmbedja bo: «Ino bɛnɛ pete indjani bopele eka edii epele ta boso bo Ndjakomba, iso loosumeni kaoko losume Ndjaokomba. 20 Oto ta tina e biso lobwaniti bokina bobala modjɔ moɛni iso ko mooki iso.» 21 Bato ba Ikita babagamea na ikina ko babakina. Baidiaka mwɛngi mo bobapa etumbu, modjɔ mo bato basusu bakumedjaka Ndjakomba ta tina e modjɔ imua mokɔɔmɔ. 22 Moomi omina iyona ohela na midjɔ mi bokamoa adaaka na bianga bonɔ tuku inɛi.

23 Ehole ekina bo Petelo na Yoane, basɔmbɔ ta iputo di binabu ko babatubana midjɔ misusu mibalaka bakondji ba banganga ba Ndjakomba ko na basuku. 24 Ngɔngɔ dji booka isolo dimina, badhimi baso baputoana bangɔnɔ Ndjakomba bo: «Kumu, wɛ moto oyoa diko na kpɔtɔ, dua ko na leka losusu lodii ena*. 25 Na ngulu e Mwembo Mosɛnɔke obala na ndjea e kɔkɔ o biso Dhapiti mosali o wɛ bo: "Tina ndani bikomi bisusu bimei boleloa? Bato baimei akɔɔkɔke mikɔ mi ngasa! 26 Bakondji ba ngondo baleloi, babanei baimei bookana bɛngi balone Kumu ko na Kilito ohɔi iyo*." 27 Modjɔ mo sooti mɛnɛ, Elode na Pɔsɔ Pilato baputoani ta ngando iyeye enɛnɛ, na bato ba bikomi djibuki ko na bana ba Isalɛlɛ tina e bolona Yesu, Mosali o wɛ Mosɛnɔke, iyo ohɔɔ wɛ*. 28 Oko boa bakokedji midjɔ misusu mikana wɛ donga ehele na ngulu ko na malɛno ma wɛ. 29 Ko edɛdiyeye, Kumu, oka mondumba mo logameakadea bo ko pa basali ba wɛ swueya e botɔndea mobalo mo wɛ. 30 Inedja ngulu e wɛ bɛngi mohelo*, bimbete ko na bingengo bikɔɔme na kombe e Yesu, Mosali o wɛ Mosɛnɔke.» 31 Ehole e sidja bo boangɔnɔ, esika edaka bo baboli ekumana. Ibo basusu baluma na Mwembo Mosɛnɔke ko babanga botɔndea mobalo mo Ndjakomba na swueya.

32 Badhimi basusu badaaka mɛnɛ omɔti, na molema ko na malɛno mamɔti. Pɛpɛ nongo moto omɔti osalongeaka na eka ende iyo mɛnɛ, endelo ta tei e bobo, leka losusu lodaaka na bu loda polo emɔti*. 33 Bapɔsɔlu babalaka tati e bosisoa ta bogwa bo Kumu Yesu na ngulu enɛnɛ ko ngɔlu enɛnɛ edaka ta tei e bobo basusu. 34 Pɛpɛ nongo moto omɔti ta tei e bobo otakaka eka emɔti. Modjɔ mo moto mosusu odaaka na gbie kaoko ndako badjitɛkɛkɛ, badoaka na palanga djimina 35 ko badjisambeaka ta mako ma bapɔsɔlu; ko bakabanaka palanga bobwana na ikamba di moto na moto. 36 Embete na Yosepu, moto o libota di molewi o botama ta Sipele, iyona obeaka bapɔsɔlu Balanabasi, epali bobala bo «Moto okapingedje», 37 atɛkɛ gbie edaka na nde, adoa na palanga ko aisambea ta mako ma bapɔsɔlu.