1 Ngɔngɔ dji bolekedja ta Apipolisi ko na Apoloni, baimea ta Tesalonike ta esika edaka ndako e miɔngɔnɔ e Bayudha. 2 Polo ekwea iho oko mondumba momɛsɛnɛkɛ iyo. Ekɔɔ sabata djisato, abatingodjaka Makomi, 3 abatingodjaka na bohu bo, Masiya atungi aɛnɛ saya ko asisoe ta tei e bato bago. Abatɔndeaka bo: «Yesu iyona ootɔndeakadeani mbi, iyo moto odii Masiya.» 4 Ndambo e bato ta tei e bobo badhima ko baputoana na Polo na Silasi. Edae bato banɛnɛ ba Bagɛlɛki ibia bakakumee Ndjakomba, na bali bakina ba ekumu.

5 Endelo Bayudha baluma na swɛ. Baputoanedja bato ba mongangale ibia bakakɛe ayengayenge na ndjea, baisa mongangale ta tei e emumu e bato ko na ta ngando enɛnɛ. Bakɛɛ ta ndako e Yasɔni ahomba Polo na Silasi bɛngi bakɛe na bu ta boso e bato basusu. 6 Endelo baibabolodja, bapea Yasɔni na denga dikina bakɛɛ na bu ta boso bo babanei ba ngando enɛnɛ ko babanga bogama bo: «Bato ibia baisi mongangale ta ngondo mobimba, ko edɛdiyeye baimei iya! 7 Ko Yasɔni abasɔi ta ndako e nde! Ibo basusu batasumakadea mibeko mi Kaisala, na bobala bo edii na mokondji okina, kombe e nde Yesu.» 8 Mibalo mimina mitungea emumu e bato edae na babanei ba ngando enɛnɛ. 9 Iboa baputedja Yasɔni na denga idia dikina palanga dji bapea na bu ngɔngɔ babakina.

10 Ehole edipa busa, denga baloma Polo na Silasi ta Bele. Iyana aimea ibo bakwea ta ndako e miɔngɔnɔ e Bayudha. 11 Bayudha ba Bele badaaka na mida mipele bonɔ ibia ba Tesalonike; basɔɔ mobalo mo Ndjakomba na mongandi mosusu. Masu masusu baikoaka Makomi bɛngi baindje kaoko eka abatɔdeaka ibo edaka sooti. 12 Bato banɛnɛ ta tei e bobo baimea badhimi, ko ta tei Bagɛlɛki, bali na baami banɛnɛ badhima pongono.

13 Endelo ehole eoka Bayudha ba Tesalonike bo Polo atɔndeaka mobalo mo Ndjakomba ta Bele, bakimana pongono iho ko babanga boisa isombana ta bimumu bi bato bangale. 14 Denga banɔdjɔ Polo pɛpɛlɛ ta dua; endelo Silasi na Timote badika ta Bele. 15 Bato ibia badaledjaka Polo bakɛɛ na nde mbunoko ta Atɛne. Ngɔngɔ Polo abaloma basɔmbe ta dii Silasi na Timote bamokimane pɛpɛlɛ.

16 Iyana adaaka Polo aamba Silasi na Timote ta Atɛne, aoka bobe ta molema na boɛnɛ bo ngando enɛnɛ emina eluma na bikeko. 17 Alehaka Bayudha ta ndako e miɔngɔnɔ ko na bato badii pɛpɛ bodaa Bayudha bakumeaka Ndjakomba ko engi busa alehaka ta djaando bato basakaka na nde. 18 Ndambo e bato ba bowɛi ibia bakimanaka malɛno ma Epikile* ko na ma Djenoni badoa aisana na nde kitɛ. Bakina bomowadja bo: «Epalakadea bobala mɛko imi nde?» Ko bakina batɔndeaka bo: «Abwani bodaa molehi o ba ndjakomba ba bakɛndɛli», modjɔ mo Polo atɔndeaka Bwɛndi Bopele bo Yesu ko na bosisoa ta bogwa. 19 Iboa bamotomba ko bakɛɛ na nde boso bo ikita di bobo djikombedjake Aleopadje ko bamowadja bo: «Lobwaniti lodjebe sɔngi e bileho bi yeene ibia bilehakadea wɛ? 20 Obalakadea na su mɛko mi yeene ko lopalakadea lodjebe eka epalakadea imo botingodja.» 21 Modjɔ mo, bato basusu ba Atɛne, na bakɛndɛli badikamaka ta tei e bobo banɔdjɔkɔ ehole e bobo esusu oko ta botubana kaoko bohokamedja mɛko mi yeene.

22 Iboa Polo aema ta ndanda e Aleopadje, ko abala bo: «Bato ba Atɛne, naɛni bo odiini bato bakapale mɛko mi ba ndjakomba bobuke mɛnɛ. 23 Te ngasa, ehole edali mbi ta ngando e bino enɛnɛ ko aindje bikeko bikangɔne ino, naɛni ta etumbelo e mbeka emɔti bakomi bo: "Polo e ndjakomba iyoo okadae pɛpɛ bodjebama." Na tina emina mbi naolwɛini Ndjakomba iyona okakumee ino na pɛpɛ bomodjeba. 24 Ndjakomba okɔɔ ngondo na leka losusu lodii otei, adii Kumu o busa na kpɔtɔ, ta daake ta tepelo djikapike ibo na mɔmɔ ma bato. 25 Tadake na posa e bo bato bamokɔmedjake kaoko bamolwɛe eka emɔti, modjɔ mo edii iyo moto okapɛ bomɔ ta dii bato basusu, mohemano ko na midjɔ misusu*. 26 Na ndjea e moto omɔti, ayoa bikomi bisusu ko baluma ta ngondo esusu. Akabana madidi ko na mei mi bisika bibwani na bato bodikama*. 27 Enakoboa akɔɔ iboa bɛngi bato bamohombake, ko ta tei e bomohomba bomina, ndelo ekina babwani bomobolodja. Ta bosooti Ndjakomba adiiti bohali na moto omɔti omɔti o biso, 28 modjɔ mo: "Lohelakadea na ndjea e nde, na ngulu edalakadea na su ko iyo moto oloyoa." Ko bakomi bakina ta tei e bino baemba bo: "lodii pongono bana ba nde*." 29 Lokadaa bana ba nde, lobwaniti bolɛnɛ bo Ndjakomba abwani bodaa ondingo ekeko e wolo, palanga kaoko ibanga diluama na iboma ko na bowɛi bo bato. 30 Enakoboa Ndjakomba aindjaka mɛko imia elɔkɔ e bo bato baidjebaka bobe bokɔkɔ ibo, endelo edɛdiyeye abeakadea bato basusu bahombedje milema. 31 Modjɔ mo aisa busa bomɔti ibua bosambedjadea iyo ngondo esusu na bodju, na ndjea e moto iyona ohɔɔ iyo. Ainedja moto mosusu embete ebwani na bodhima na bomosisodja ta tei e bato bago!»

32 Iyana aoka ibo Polo abala tina e bosisoa ta bogwa, bato bakina bomosɛkɛ ko bakina babala bo: «Lookadea busa bokina.» 33 Iboa Polo aimana ta tei e bobo. 34 Ndambo e bato bamokimana ko baimea badhimi: ta tei e bato bamina edaka, Denisi omɔti o ibolea di Aleopadje, mwali omɔti na kombe e Damalisi, ko na bakina pongono.