1 «Baningani na ba sangi bato, hokamedjani edɛdiyeye eka epalakadea mbi nasambe.» 2 Iyana aokabo abala na monɔkɔ mo Baebele, bapɔpɔnɔ naikina na ngulu mɛnɛ. Iboa Polo abala bo: 3 «Nadii Moyuda nabotama ta Talase e Silisi; endelo nabɔkɔmɔ iya ta ngando enɛnɛ iye, ko molehi o mbi edaka wɛtoko Gamaliɛlɛ* iyona alehani bɛngi nadjebe bopele mɛnɛ mibeko mi bakɔkɔ ba biso. Nasapaka pongono mosusu na Ndjakomba oko mondumba modii ino basusu busa ibubu. 4 Na nɔngedja bato bakimanaka Ndjea* tee ta yogo. Napea baami na bali ko na baisa ta bɔlɔkɔ. 5 Nganga o Ndjakomba o monɛnɛ ko na ikita isusu i basuku babwani bobala tati e mbi. Modjɔ mo bapani mikanda ta tina e denga di Damasi ko naso nakɛɛ iho: apea badhimi, bɛngi nakɛe na bu ta Yelusalɛmɛ bɛngi babapɛ etumbu*.»

6 «Nadaaka na ndjea ko naimeaka mbuti na Damasi, edikaka mweka bɛngi midi miimee, na mbala emɔti bohu bomɔti bonɛnɛ bodonga ta busa bongɛsɛɛni. 7 Nakwa ta kpɔtɔ ko naoka kɔpi emɔti ebalaka na mbi bo: "Saulu, Saulu, tina enɔngedjakadeani na wɛ nda?" 8 Nawadja bo: "Kumu, wɛ nda?" Asɔmbedjani bo: "Nadii Yesu o Nadjalɛtɛ, iyona onɔngedjakadea wɛ." 9 Bato badalaka na mbi baɛnɛ bohu, endelo baioka kɔpi e moto iyona obalaka na mbi. 10 Iboa nawadja bo: "Kumu, ebwani mbi bokɔɔ nde?" Ko Kumu asɔmbedjani bo: "Angɔɔ ko kɛɛ ta Damasi, iho baotɔndeadea eka esusu ebwani na wɛ bokɔɔ." 11 A bonie, miso ma mbi madimeaka na bohu ibua bongɛsɛɛkani, bato badalaka na mbi bapeani ta ebɔ ko bakɛɛ na mbi ta Damasi.

12 «Enakoboa edaka na moto omɔti kombe e nde Ananiasi, moto asapaka na Ndjakomba bobwana na Mobeko iyona osakoaka Bayudha basusu badaaka ena. 13 Adoa mbuti na mbi, ko abala na mbi bo: "Saulu, mwange mba, kina bo osɔmbe boɛnɛ!" Oko ta ehole emina iyena, nasɔmbɔ boɛnɛ naikina. 14 Abakea bo: "Ndjakomba o bakɔkɔ ba biso aohɔɔ odjebe bolulea bo nde, ko oɛnɛ Moto o bodju ko ooke kɔpi e nde. 15 Modjɔ mo otungi bodaa temo o nde bɛngi otɔndee boso bo bato basusu eka eɛni wɛ ko eoki wɛ. 16 Edɛdiyeye eambakadea wɛ naikina nde? Angɔ, otombe batisimo obee kombe e Kumu bɛngi odie ekutubanedji e pekato dji wɛ." »

17 «Nasɔmbɔ ta Yelusalɛmɛ, ehole eangɔnɔkɔ mbi ta tepelo, na so nakwa na Mwembo. 18 Naɛnɛ Kumu abala na mbi bo: "Donga pɛpɛlɛ mɛnɛ ta Yelusalɛmɛ, modjɔ mo bato ibibi batadhimadea mɛko mibaladea wɛ ta tina e mbi." 19 Nasɔmbedja bo: "Kumu, badjebakadea bopele mɛnɛ nakweaka ta ndako dji miɔngɔnɔ dji Bayudha bɛngi na bomedje bato bakaodhimee ko na baisa ta bɔlɔkɔ. 20 Ko ehole esopa bo makiya ma temo, o wɛ Etsiɛni, mbi pongono nadaaka ena. Nadhimea bato ibia bamoowaka ko nabanea bisendja* bi bobo." 21 Iboa abala na mbi bo: "Kɛɛ, modjɔ mo naolomadea bohali ta dii bikomi bi bakɛndɛli!" »

22 Emumu e bato bahokamedja Polo tee mbunoko ta ndelo ebala iyo mibalo mimina; ta tina emina ibo basusu bagama: «Dimodjani moto iyona! Agwɛ! Abwaniti bohelama ta kpɔtɔ idjidji!» 23 Bagamaka, balakaka bisendja bi bobo ko bamaaka iduti o diko. 24 Na tina emina, tilibɛ apa mitindo bakwedje Polo ta bopango bo basodha ko bomoboma mbalake ko bomoloma na ngulu abale, bɛngi badjebe tina ndani emumu e bato bagamakadea iboa tina e nde. 25 Endelo ehole emonanga bo bɛngi bamobome, Polo awadja kapita o basodha mokama odaaka ena bo: «Odii na bokondji boboma moto o Loma iyana odai nongo pɛpɛ bosambedjama*?» 26 Ta ndelo eoka iyo mɛko mimina, kapita o basodha akɛɛ atɔndea tilibɛ bo: «Ebwani wɛ bokɔɔ nde? Moto iyo adii o Loma!» 27 Tilibɛ amowadja bo: «Tɔndeani, odii mɛnɛ moto o Loma?» Polo asɔmbedja bo: «Okoboa». 28 Iboa Tilibɛ abala bo: «Naputa palanga djinɛnɛ bɛngi naimee moto o Loma.» Ko Polo asɔmbedja bo: «Mbi nabotama moto o Loma.» 29 Na mbala emɔti, bato ibia bapalaka bamobome badonga mbuti na nde; tilibɛ iyo mɛnɛ aoka bɔɔ, ehole edjeba iyo bo Polo adaaka moto o Loma modjɔ mo amonanga mbɔti.

30 Aya busa, tilibɛ apalaka adjebe bopele mɛnɛ eka epunda na Bayudha Polo, abala bamolodje mbɔti ko apa mitindo ta dii banganga ba Ndjakomba banɛnɛnɛnɛ ko na Ikita dinɛnɛ disusu baputoane. Ngɔngɔ djimina atomba Polo ko amosambedja ta boso bo bobo.