1 Ta ehole emina iyena, mokondji Elode* abanga bonɔngedja ndambo e badhimi ba Ekelesa. 2 Aowedja Djake, o mwange Yoane na mɔmbi. 3 Ngɔngɔ djimina, ehole eɛnɛ iyo modjɔ mo mina mosepedja Bayudha, apedja pongono Petelo ta ehole e tɛkɛ e mapa ma pɛpɛ levile*. 4 Elode amopedja ko adumbama ta bɔlɔkɔ, ko apa maputo manɛi ma basodha banɛi banɛi ba mosɛndjɛle. Apalaka bomosambedja ta miso ma bato ngɔngɔ dji tɛkɛ e Pasika. 5 Ehole edaka Petelo ta bɔlɔkɔ, bato ba Ekelesa baangɔnɔkɔ Ndjakomba na bhingi tina e nde.

6 Iboa na bulu, Elode apalaka amosambedje ta miso ma bato, Petelo awɛɛkɛ ta ndanda e basodha babae. Anangamaka na mikpulu mi bibende mibae ko basindjili badaa ta esika e bobo ta modipe mo bɔlɔkɔ. 7 Na mbala emɔti, obwɛndi omɔti o Kumu aimana ko bɔlɔkɔ bongɛsɛ na bohu. Andjelu abɛndjɛ Petelo ta itɛbu, amosisodja ko abala na nde bo: «Angɔ pɛpɛlɛ!» Iboa mikpulu mi bibende misusu mitsueana na nde ta mɔmɔ. 8 Ko obwɛndi amotondea: «Lwoa kamba e wɛ ko nanga sapato dji wɛ.» Petelo amosuma ko anjelu abala naikina bo: «Lwoa mokoto e wɛ ko kimanani.» 9 Petelo aimana ta bɔlɔkɔ ko amokimana. Aidjebaka bo eka ekɔkɔ obwɛndi edaka sooti: alɛnɛkɛ bo edii ndjɛnɛ. 10 Banɔɔ sindjili o boso, o babae ko baimea ta modipe mo bibende mo boimana ta ngando enɛnɛ. Modipe momina modipoama imo mɛnɛ boso bo bobo ko baso baimana. Ehole eimea bo na ndjea na mbala emɔti, obwɛndi aso akina Petelo. 11 Iboa ehole ehuleana mayɛlɛ ma Petelo abala bo: «Edɛdiyeye, naɛni bo edii sooti bo: Kumu alomi obwɛndi o nde, ko atingoini ta mɔmɔ ma Elode ko na bobe bosusu bolɛnɛki Bayudha bokɔni.» 12 Ehole esipoa iyo modjɔ momina, akɛɛ ta ndako e Malia, nange Yoane okabee bo Malako. Bato banɛnɛ baputoanaka iyana tina e boangɔnɔ. 13 Petelo aboma ta modipe mo ndako ko mosali mwali, na kombe e Lode, asabatea bɛngi ahokamedje. 14 Adjeba moholi mo Petelo, ta polo e bo adipoe modipe, apota na sepi o tei atɔndea bo Petelo adii sokolu. 15 Babala na nde bo: «Odii na igboma!» Endelo apingedja na bobala bo edii sooti. Iboa baso babala bo: «Edii obwɛndi o nde.» 16 Enakoboa, Petelo adaaka oko aboma modipe. Ehole edipoa bo modipe, bamoɛnɛ ko baso bakamoa mɛnɛ. 17 Abakɔmea embete na ebɔɔ bɛngi bapɔpɔne ko abatubana mondumba momoiwa Kumu ta bɔlɔkɔ. Abala naikina bo: «Djebedjani Djake* modjɔ momina ko na denga dikina.» Ngɔngɔ djimina aimana ko akɛɛ doongɔ dikina. 18 Iyana aya busa, mongangale moso mokwa ta dii basodha: basawadjanaka polo ndani enɔi Petelo. 19 Elode aloma bamohombe, endelo baimobolodja. Asambedja basindjili ko apa simbisi e bobaowa. Ngɔngɔ djimina, ekɛɛ ta Yudhea ta Sedjale ta polo edikamaka iyo masu makina.

20 Elode alemoa na bato ba Tile na Sidona. Bato bamina batomba meko e baloma bato babwani bokɛɛ asɛngɛɛ bogo ta dii iyo. Modjɔ mo ekomi e bobo ehelamaka na mia ma ekomi e nde; baso baokana na Balasitisi iyo odaaka modaledji o misala ta ndako e mokondji. 21 Aimea busa bookanaka ibo, Elode alwa esendja e nde e bokondji, adaa ta kiti e nde ekataka iyo makambo ko abala na bu ta miso ma bato. 22 Bato bagama bo: «Edii kɔpi e Ndjakomba iye ebalakadea ediiti kɔpi e moto*!» 23 Endelo, oko ta ehole emine iyena, obwɛndi o Kumu aboma Elode, modjɔ mo asasisa ta polo e Ndjakomba: ngusu bamonɛlɛkɛkɛ ko aso agwa*.

24 Enakoboa mobalo mo Ndjakomba monanganaka ko mokweanaka mɔɔngɔ masusu. 25 Ehole esidja Balanabasi na Saulu bopa ekamoli ta dii basuku ba Yelusalɛmɛ, badonga iho* ko baso batomba Yoane okombedjake Malako.