1 Ŋɛn mbuul ngɔmɔ̃ onse byɛ oli y’eka ye wumɔ̃, m’emã ndɛ ayi ndɛ ofɛn ke mbal a baal bɛn k’akiool wɛ, ke mboo yi ekeebiri ndɛ ndɛ ke nkwel a ba ngel? 2 Byɛ k’eyɛɛ wɛ wɛn ba ngel akieel atsiil ãndɔɔ m’ɔ̃kiri wu? Okɛɛn b’akieel atsiil ãndɔɔ m’ɔ̃kiri wu byɛ, obobɔ byɛ ol’ekwɛɛn k’etsiil endo-ndɔɔ? 3 Byɛ k’eyɛɛ wɛn bia-byɛ ekieel etsiil ãndɔɔ m’ãnzwel wɛ? Obobɔ, byɛ ol’ekwɛɛn k’esoo ãndɔɔ m’omwiĩ ba? 4 Okɛɛn byɛ eli y’eka ye bakyɛ m’ãndɔɔ m’omwiĩ ba, bɛn b’ewal byɛ onge antwel baal bɛn Ebvɔɔn k’ekaal bɔ dzii wɛ! 5 Mɛ̃ ngyɛɛn obobɔ kwɛn byɛ ebɔɔ opfuru. Onse byɛ, k’eli ye mbuul wu oli y’ontwel, wɛn okoo k’asoo ãndɔɔ mpɛ̃-a-mpɛ̃ andoo wɛ? 6 Bɛn ɔ̃kiool afɛn wumɔ̃, ofɛn bvool ke nkwel a baal bɛn k’ali akiool wɛ!

7 Me b’otal byɛ, ŋ’eyii etɔ byɛ ke bakyɛ ofɛn, eyɛɛ wɛn obɔ obva o byɛ bam. M’emã byɛ k’ekuru ɔ̃kwal ŋ’asa byɛ ndɔɔ yi mbi wɛ? M’emã byɛ k’ekiool wɛn awɛɛl byɛ eluɔ wɛ? 8 B’asa ãndɔɔ m’ãbi byɛ, b’awɛɛl bakyɛ eluɔ byɛ! B’esa byɛ ãndɔɔ omɔ̃ okal bvool andoo a byɛ! 9 Byɛ k’eyɛɛ wɛ wɛn b’asa ãndɔɔ m’ãbi kieel k’asam Okwɛn o Nziã wɛ? Ekal y’onkyab, eyɛɛ bam bubu: anga-esio, b’abuɛɛn etiɔ, b’adzuu y’anga-akal wuo y’anga-alam, b’adzuu y’angaburu-abɔɔl, 10 baal a pfuul, ba ye nzal a obɔɔ, b’ebɔɔ mbal, b’atoo bakyɛ ɛ̃tswɛ, b’awɛɛl eluɔ e baal, bɔ kieel k’asam Okwɛn o Nziã wɛ. 11 Okyɛ emfa ki éli baal ke kwɛ onse byɛ tsɔɔn. Kɛn a Nziã osuɔɔl byɛ, osueel byɛ, osuul byɛ dzu me nkuũ a Mfam Yeso Mãsia, me nkuul Ɔ̃fel a Nziã a bia-byɛ.

12 Baal bakyɛ abeyɛɛn ndiri: «Awi mɛ̃ nkuul yi esa mbueel». Ngwanyã, kɛn a mbueel k’ãli ngesɛ wɛ. «Awi mɛ̃ nkuul yi esa mbueel», kɛn a mɛ̃ ke nzii k’ekal ɔ̃nkyal a ndɔɔ si mɔ̃ wɛ. 13 Baal bakyɛ bvool abeyɛɛn ndiri: «Bvi-odza eli me ndɔɔ ɔ̃la, ɔ̃la hɛ̃ oli me ndɔɔ a bvi-odza.» Ngwanya, kɛn a Nziã akieel abiil bvi-odza y’ɔ̃la. Kɛn a nzuru k’eli me ndɔɔ ãndɔɔ m’esio wɛ, nzuru eli me ndɔɔ a Mfam, Mfam hɛ̃ oli me ndɔɔ a nzuru. 14 Nziã wu áseel Mfam, akieel aseel bia-byɛ hɛ̃ me waan e ndɛ. 15 Byɛ k’eyɛɛ wɛ wɛn nzuru a byɛ eli elyam a nzuru a Mãsia? Obobɔ, mɛ̃ èwal elyam e nzuru a Mãsia, me ndɔɔ yi esuul kyɛ ekal elyam e nzuru a ɔ̃kaal nga-esio? K’obobɔ bam wɛ! 16 Byɛ k’eyɛɛ wɛ wɛn mbuul wu obvool nzuru y’ɔ̃kaal nga-esio, oli mbuul ngɔmɔ̃ ye ndɛ? Ngwanyã, Ɔ̃nkaan a Nziã oyɛɛn ndiri: «Bɔ ange-buaal àkal nzuru ngamɔ̃✝6.16 Obɛ 2.24; Mat 19.5.» 17 Kɛn a mbuul wu oyii bvoo ye Mfam oli Ɔ̃fel ngɔmɔ̃ ye ndɛ.

18 Ebal ãndɔɔ m’esio. Obi okyam bueel b’esa mbuul k’oli onse nzuru a ndɛ wɛ. Kɛn a ŋɛn mbuul owi nzuru m’ãndɔɔ m’esio, ndɛ ŋ’asi nzuru a ndyam obi. 19 Byɛ eyɛɛ yɔ: Nzuru a byɛ eli mboo yi ɔ̃nsensal yi ekal Ɔ̃fel wu Ɔ̃nsensal, wu oli onse byɛ, wu ewi Nziã byɛ. Byɛ k’ebekal ba byam wɛ. 20 Ke ngwel wɛ, Nziã ásuun byɛ m’ɔ̃bvɛn wa bibi. Obobɔ, elweel Nziã m’ãnzuru ã byɛ.