1 Me b’otal b’ekel byɛ mɛ̃, ɔ̃mveel ndɛ bu: Me ndɔɔ a bɔɔl, eli ngesɛ kwɛn ndɛ abee obaal. 2 Kɛn a me ndɔɔ yi abal owɛɛl baal ayesa ãndɔɔ m’esio, yɔɔl kwɛn bɔɔl bwɛn a bɔɔl akal y’ɔ̃kal a ndɛ, ɔ̃kaal bwɛn ɔ̃kaal akal y’ɔ̃lam a ndɛ. 3 Yɔɔl kwɛn bɔɔl asa ɔ̃kal bɛn ebvaan ndɛ asa ndɛ, ɔ̃kaal hɛ̃ asa bubu m’ɔ̃lam a ndɛ. 4 Ɔ̃kal k’ali y’okwɛn nkal a nzuru a ndyam wɛ, ɔ̃lam mbuul wu oli ye bɔ. Emfa kiki hɛ̃, ɔ̃lam k’ali y’okwɛn nkal a nzuru a ndɛ wɛ, ɔ̃kal mbuul wu oli ye bɔ. 5 Ebee bakyɛ nzuru oluo, yɛɛn wɛn okɛɛn byɛ ekuru mfoo wɛn byɛ k’ebvool ntal wɛ me lio etsi-tsiri, me ndɔɔ yi ebuɛɛn. Ke mbee oŋɔ̃, ebvool ntal onge b’eli tsɔɔn. Okɛɛn k’obobɔ wɛ, Satana ol’obɔɔ mpwee yi ambio byɛ, me ndɔɔ yɛn byɛ eywɛn okwɛn nkal ãnzuru ã byam.

6 Ndɔɔ yi ndieel mɛ̃ ke ngel ngwi byɛ wɛ, mɛ̃ kɛn ãtsam ngwi. 7 Mɛ̃ ekeedzii wɛn baal bueel akal onge mɛ̃. Kɛn a mbuul bwɛn a mbuul oli ye kab e ndɛ li ewi Nziã me nyiĩ a ndɛ. Wɛn obɔɔ kab lɛn, wɛn hɛ̃ obɔɔ kab likyɛ.

8 Me b’otal amfi y’akaal b’apfiil, mɛ̃ ngyɛɛn bɔ wɛn abee obaal onge mɛ̃. 9 Kɛn okɛɛn bɔ k’akoo k’akal y’ɔ̃kwɛn nkal ãnzuru ã bɔ wɛ, yɔɔl kwɛn bɔ abaal. Ke ngwel wɛ, ngesɛ mbuul abaal, ye k’akwa m’efua.

10 Me b’otal b’amaabaal, mɛ̃ ntam bubu osa, wu otam ke mɛ̃ wɛ, eli Mfam: Yɔɔl kwɛn ɔ̃kal abee ɔ̃lam obee. 11 Okɛɛn ndɛ obee ɔ̃lam, yɔɔl kwɛn ndɛ akal ɔ̃lam pyɛ, wuo abveel bal y’ɔ̃lam. Yɔɔl kwɛn ɔ̃lam hɛ̃ abee ɔ̃kal obee.

12 Me b’otal bakyɛ, mɛ̃ ngyɛɛn wɛn, ke mfam wɛ, eli mɛ̃: Okɛɛn ndoo oli y’ɔ̃kal wɛn k’ali ɔ̃kiool wɛ, wu okiool k’akal ye ndɛ, yɔɔl kwɛn ndɛ abee ɔ̃kal ondɛ obee. 13 Emfa kiki hɛ̃, okɛɛn ɔ̃kaal oli y’ɔ̃lam wɛn k’ali ɔ̃kiool wɛ, wu okiool k’akal ye ndɛ, yɔɔl kwɛn ɔ̃kaal ondɛ abee ɔ̃lam obee. 14 Ke ngwel wɛ, bɔɔl wɛn k’ali ɔ̃kiool wɛ oli tsotsoo ye Nziã, me ndɔɔ y’ebvɔɔn ndɛ y’ɔ̃kal. Emfa kiki hɛ̃, ɔ̃kaal wɛn k’ali ɔ̃kiool wɛ, oli tsotsoo ye Nziã, me ndɔɔ yi ebvɔɔn ndɛ y’ɔ̃lam. Okɛɛn k’obobɔ wɛ, baan a byɛ k’akaakal tsɛtsɛ wɛ, kwɛn ŋɛn bɔ ali tsɛtsɛ. 15 Kɛn okɛɛn wɛn k’ali ɔ̃kiool wɛ odzii k’abam bal, yɔɔl kwɛn ndɛ abam lɔ. Me ndɔɔ yi obobɔ, ndoo wu bɔɔl wuo wu ɔ̃kaal oli ndii, ke ngwel wɛ Nziã oti byɛ mbel yi ekal onse opi. 16 Ke ngwel wɛ, yɛ wu ɔ̃kal, yɛ yɛɛ okɛɛn yɛ akieel abvuul ɔ̃lam? Yɛ wu ɔ̃lam, yɛ yɛɛ okɛɛn yɛ akieel abvuul ɔ̃kal?

17 Ndɔɔ nkyam yɛn ebvaan kwɛn mbuul bwɛn a mbuul akal m’emfa ki éyɛɛl Mfam ndɛ, onge b’éli ndɛ ŋ’éti Nziã ndɛ mbel. Oyɔ ndɔɔ yi ebeyɛɛn mɛ̃ wɛn ebvaan baal asa yɔ onse ãbvɔɔn mbueel. 18 Ŋ’éti Nziã yɛ mbel, yɛ ál’amaatsiil yɛ? Yɔɔl kwɛn yɛ bee obii k’akal onge mbuul wɛn k’átsiil wɛ. K’átsiil yɛ wɛ? Yɔɔl kwɛn yɛ bee obii k’akal onge mbuul wu átsiil. 19 Ŋɛn átsiil yɛ k’eli y’otsɛn wɛ, ŋɛn k’átsiil yɛ wɛ, k’eli hɛ̃ y’otsɛn wɛ. Ndɔɔ yi nkiin, osa b’ãndɔɔ m’étam Nziã osa. 20 Yɔɔl kwɛn mbuul bwɛn a mbuul akal m’emfa ki éli ndɛ ŋ’éti Nziã ndɛ mbel. 21 Ŋ’éti Nziã yɛ mbel, yɛ áli ɔ̃nkyal? Bee nguo okɛɛ me ndɔɔ oyɔ! Okɛɛn yɛ bɔɔ mpwee yi akal mbuul wa ndii, oŋɔ̃ kal m’emfa okyɛ. 22 Ke ngwel wɛ, ɔ̃nkyal wu éti Mfam mbel oyii mbuul wa ndii wa Mfam. Emfa kiki hɛ̃, mbuul wa ndii wu éti Mfam mbel oyii ɔ̃nkyal a Mãsia. 23 Ásuun byɛ m’ɔ̃bvɛn wa bibi. Obobɔ, ebee ankyal a baal okɔɔl. 24 Andoo, yɔɔl kwɛn mbuul bwɛn a mbuul akal ke nkwel a Nziã m’emfa ki éti ndɛ ndɛ mbel.

25 Me b’otal amfi, Mfam k’atam mɛ̃ ndɔɔ oliaal wɛ, mɛ̃ ewa ãtsam mã mɛ̃. Mɛ̃ ndi mbuul wɛn akoo k’ata kaã me ndɛ, ke ngwel wɛ Nziã áti mɛ̃ mbel me nyiĩ a ndɛ. 26 Oŋɔ̃ etal b’emwɛn mɛ̃ wɛn eli ngesɛ: Me ndɔɔ ãmpal mã lio li, ebvaan kwɛn mbuul bwɛn a mbuul akal m’emfa ki eli ndɛ. 27 Yɛ li me bal y’ɔ̃kaal, oŋɔ̃ bee bal olɔ otsal. Yɛ ke li me bal y’ɔ̃kaal wɛ, oŋɔ̃ bee akaal abii. 28 Kɛn okɛɛn yɛ baal, yɛ k’obi si wɛ. Okɛɛn ɔ̃kaal wa mfi obaal, ndɛ k’asi obi hɛ̃ wɛ. Kɛn a abaal akieel amwɛn ãmpal, mɛ̃ nzii k’esa kwɛn byɛ ebee mɔ̃ omwɛn.

29 Andoo, etal m’eyɛɛn mɛ̃: Lio eli li epfi, bɛɛn nonɔ̃, yɔɔl kwɛn wu oli y’ɔ̃kal akal onge mbuul wɛn k’ali ye ndɛ wɛ. 30 B’alel akal onge bɛn k’alel wɛ. B’asia mpaa akal onge bɛn k’asia mpal wɛ. B’asuun akal onge bɛn bɔ k’ali y’eluɔ wɛ. 31 B’atwal bvel m’ɔ̃kiri wu, akal onge bɛn bɔ k’atwal lɔ lam wɛ. Ke ngwel wɛ, ɔ̃kiri wu, m’emfa ki eli ndɛ, abwel. 32 Mɛ̃ nzii kwɛn byɛ ebee y’ãtsam okal. Mbuul wa mfi akɛɛ nguo me ndɔɔ ãndɔɔ a Mfam: Ndɛ abii emfa ki asa Mfam esɛ. 33 Kɛn a wu oli y’ɔ̃kal akɛɛ nguo me ndɔɔ ãndɔɔ m’ɔ̃kiri wu, m’emfa okyɛ ndɛ abebii emfa ki asa ɔ̃kal esɛ. 34 Obobɔ, ndɛ abekɛɛ nguo me ndɔɔ ãndɔɔ mbuaal. Emfa kiki hɛ̃, ɔ̃kaal wa mfi wuo wɛn k’ayɛɛ abɔɔl wɛ, abekɛɛ nguo me ndɔɔ ãndɔɔ ã Mfam. M’emfa okyɛ, ndɛ abebii k’asa kwɛn nzuru a ndɛ y’ɔ̃fel a ndɛ ekal bvi Mfam. Kɛn ɔ̃kaal a bal abekɛɛ nguo me ndɔɔ ãndɔɔ m’ɔ̃kiri wu, m’emfa okyɛ ndɛ abebii emfa ki asa ɔ̃lam esɛ.

35 Mɛ̃ eyɛɛn obobɔ, me ndɔɔ obvɛ o byɛ, ke me ndɔɔ yi eywiin byɛ bɛɛ wɛ. Mɛ̃ ngyɛɛn yɔ kwɛn byɛ esa ãndɔɔ m’ãbvɛ-ãbvɛ, bvool kwɛn byɛ ewa nzuru yueel m’ɔ̃sal a Mfam.

36 Kɛn okɛɛn nsam a bɔɔl atsam ndiri ndɛ abee nsam a ɔ̃kaal wu esɔɔn ndɛ obaal, ndɛ ŋ’asi obi, bvool akwa m’efua, bvool atsam ndiri ebvaan bɔ abaal bakyɛ, oŋɔ̃ yɔɔl kwɛn bɔ abaal bakyɛ, onge b’edzii ndɛ. Ndɛ osi ngesɛ. 37 Kɛn a nsam a bɔɔl yi ewɛɛ onse ɔ̃kwal, k’aywɛɛn ndɛ wɛ, ndiri ndɛ k’abaal wɛ, bvool oli y’okwɛn nkal efua e ndɛ, bvool okuru kwɛn ndɛ k’abvool ntal ye nsam a ɔ̃kaal wu esɔɔn ndɛ wɛ, ndɛ osi ngesɛ. 38 Obobɔ, wu obaal nsam a ɔ̃kaal wu esɔɔn ndɛ, osi ngesɛ, wu obee k’abaal ndɛ, osi ndɔɔ yi enduru obvie.

39 Ɔ̃kaal oli me bal y’ɔ̃lam me lio lueel li eli bɔɔl kɛn mwiĩ. Kɛn okɛɛn ɔ̃lam okwi, ndɛ okoo m’obaal wu edzii ndɛ. Kɛn a yɔɔl kwɛn bɔɔl olɔ akal ɔ̃kiool. 40 Kɛn a m’ãtsam ã mɛ̃, ndɛ àkal y’esɛ ki enduru, okɛɛn ndɛ okal bubu. Mɛ̃ etsam mpii mɛ̃ hɛ̃ ndi y’Ɔ̃fel a Nziã.