1 Awi mɛ̃ ɔ̃mbɛɛl wɛn onge ɔ̃mpaã, bu alieel mɛ̃ ndiri: «Tɛɛn, bvool wal emvɛɛl e mboo a Nziã yi ɔ̃nsensal, li nkiin yi awa Nziã ãkab, bvool tsiɔ ɔ̃bvɛn a b’alweel Nziã onse mboo oyɔ. 2 Kɛn a yɛ k’àwal emvɛɛl e nkwel-a-nzi a mboo yi ɔ̃nsensal yi onse Nzɔ a Nziã wɛ, yɔɔl yɔ, ke ngwel wɛ áwi yɔ bɛn k’ayɛɛ Nziã wɛ. Bɔ akieel anyam bviil li ngel nswii ãku-ãnã ye yuaal (42). 3 Mɛ̃ ekieel ewa amwɛn a mɛ̃ buaal waan li ayɛɛn ãndɔɔ m’ãfa ola Nziã. Bɔ akieel alaal ekɔ e mpiri ãtsoo miil ngɔmɔ̃ y’ɛ̃nkam mviaal y’ãku-ãsɛɛn (1.260).»

4 Amwɛn ange-buaal ali ɛ̃ti mi olibve mviaal y’eluɔ bviaal bvi abendɔɔl ambunda bvi etɛɛn ke nkwel a Mfam a nsie. 5 Ŋɛn mbuul odzii k’asa bɔ obi, mbaa epal onse ɛ̃nywã ɛ̃ bɔ, bvool edziool ataal a bɔ. Ngwanyã, wu odzii k’asa bɔ obi, ebvaan abam ndɛ m’emfa okyɛ. 6 Bɔ ali ye waan li akuru ywel, kwɛn mvel abee ondwɔɔ, me lio li esa bɔ ɔ̃sal a bɔ wu eliaal bɔ ãndɔɔ m’ãfa ola Nziã. Bɔ hɛ̃ ali ye waan li asa kwɛn ãdza ãkɔɔl ãkel, bvool li ayuɔɔl eywiri bvi emfa bvieel me nsie, me lio lueel li edzii bɔ.

7 Ŋ’ekieel eman bɔ k’aliaal ãndɔɔ m’ãfa ola Nziã, nyam a mpuru wu apal onse ywɛn li ela li ke nsɛn a nsie akieel adzɔɔ bɔ eta, abvel bɔ mpɛn, bvool abam bɔ. 8 Ebiĩ e bɔ ekieel ekal ke bal-bal a bviil wu ɔ̃nɛn m’emfa ki bviil li Sodome y’ɔ̃kiri wu Edzipito. Oyɔ mboo yi ábɛɛl Mfam a bɔ m’enkulusu. 9 Baal b’ãsel mbueel, b’ɛ̃nywã mvieel, b’ãyam mbueel, ye b’ɛ̃kiri mvieel, akieel amwɛn ebiĩ e bɔ ãtsoo ãtyel y’etswel, bvool kieel k’awa nkuul yi alɔ ebiĩ e bɔ onse mpiɛɛn wɛ. 10 Baal a nsie akieel asia mpaa me ndɔɔ epfu e bɔ, abɛɛl ãpfuun, ayuɔɔl bakyɛ ebva-kab, me ndɔɔ yɛn aliaal-ɛ̃kiɛɛn a Nziã ange-buaal átueel bɔ fool bibi.

11 Ke mbee ãtsoo ãnge-ãtyel y’etswel, ɔ̃fel ngɔmɔ̃ wu elaã wu ofi ola Nziã osam onse bɔ, bɔ bu atɛɛn tɛ. Ebangɛɛ esiin b’áketal bɔ. 12 Bɔ ayoo nkii ngamɔ̃ yi kokɔ fa ywel eyii eyɛɛn ye bɔ ndiri: «Ewuaal ywel kwɛn!» Bɔ awueel ywel onse epɛn, ataal a bɔ amwɛn bɔ. 13 Me lio olɔ, nsie enziool nzuru yam bibi, etswi e bviil ki kuun ebool. Baal amiil nsiaan (7.000) akwi m’onziool o nsie obɔ. Bakyɛ ongɛɛ obɔɔ, bvool alweel Nziã wa ke ywel.

14 Ndɔɔ yi fool yi mbuaal ebwel, kɛn a yi ãtyel ŋ’esa eya.

15 Ke mbee oŋɔ̃, ãnzwel mã nsiaan ãfel mvel-a-mvel. Ãnkii m’ãnɛn ãbel ke ywel. Mɔ̃ ã́keyɛɛn bubu: «Ompu b’ɔ̃kiri oyii bo Mfam a bia-byɛ ye Mãsia a ndɛ. Ompu ba okieel okal ɔ̃bu!» 16 Akuul-kuul ãku-mbuaal y’anã (24) b’áli me nsɛn nkal ãkiri ã bɔ m’okwɛn abvi ãmbwii me nsie ke nkwel a Nziã, bvool alweel ndɛ. 17 Bɔ ayɛɛn ndiri:

«Bee etuɛɛn yɛ, Mfam Nziã, Nziã-Nga-Waan,

yɛ wu oli bvool áli.

Yɛ suo waan e yɛ li nɛn, bu bveel ompu o yɛ.

18 Ɛ̃kiri ɛ̃bal mpuru,

kɛn a mpuru a yɛ eyi,

lio li etsiil yɛ ãndɔɔ ã b’ákwi-ákwi eyi,

li awa ebva-kab m’asal a yɛ b’aliaal-ɛ̃kiɛɛn a yɛ,

ye baal ba ngel, ye b’abal nkuũ a yɛ,

b’ebewal baal ngwel ye b’ebewa bɔ dzuun,

olɔ hɛ̃ lio li abiil b’abiil nsie!»

19 Nzɔ a Nziã yi eli ke ywel edzweel nzuru, nkab a ondoo o ndɛ bu emɔɔn onse Nzɔ oyɔ. Amvel abɛɛn, ãnkii ãbel, anzyel asiaan, nsie enziool nzuru, mvel a ãkyal wa kokɔ ondwɔɔ.