Atos 16

10 तियाआ ओं दर्शन हेएताज वाआ आमू ताअहांज मकिदुनिया जाअलो तियारी कोअयी, ओं समजीत कोइत के देव आमुहूं तियांहां हाजी बातमी कोतापीइलाअ काजे हाद्याहा.

फिलीप्पीमेहें लुदियाअ परिवर्तन

11 तियाहा काजे त्रोआसोम रोत जाहाज तोइत आमू पादराज सुमात्राकेमेहें आन बिहीरे दिही नियापुलिसोमेहें आया. 12 तिहीं रोत आमू फिलीप्पी पोत्या, जो मकिदुनिया इलाखाअ मुख्य सेहर आन रोमवालाअ वोहती होये; आन आमू तिया सेहरोमेहें थोड़ाक दिही जाआं रोया. 13 आरामोअ दिही आमू सेहरोअ बारथे नोयीइ तोड़े ओं समजीत कोइत गोया के तिहीं प्रार्थना कोइलाअ जागू ओये, आन बोहीत कोइत तिहीं टिग वोलीत रोल्यी बोईंइरी गोठी कोआ वोल्या. 14 लुदिया नावोअ थुवतीरा होयरोअ जामण्ये साअके वेसनारी एक भक्तण बाय उनाअया कोअतीते. प्रभु तियीइ मोन उगाड़्यो के ते पौलुसोअ गोठीपोअ मोन लागाडे. 15 जेहेलाम लुदिया तियीइ कुटूंबाअरी बाप्तिस्मा लेदो, ताहां तियी आमुहूं रावणी कोअयी के, "तुमू जर माहूं प्रभुउ खरी विश्वासी समजीइतेय, ताहां साला आन माआं कोअमेहें रोवा," आन ते बाय आमुहूं मानाड़ीत कोइत लेत गोयी.

फिलिप्पीइ जेलेमेहें

16 एक दिही आमू जेहेलाम प्रार्थना कोइलाअ जागे जाताते, तेहेलाम एक पुतवाअली बोयोंअ मिल्यी, जियीमेहें भविश्य कोनारी पुतोअ आत्मा ओती. ते भविश्य कोत कोइत तियीइ मालख्योहो जाअखीलाहा पोशा कामावित आपतीते. 17 ते पौलुसोअ आन आमाआं फासाड़ी आवित कोइत आअड़ी वोल्यी, "एं माअहें आखाम रोत वोडा देवोअ सेवक होये, जें तुमुहूं सुटकाअ वाटेए काईं कोतापतेहे."