1 ताहां ईसु तियाआ बारा सेलाहां आहने हाद्या, आन तियांहां खाराब आत्मा काडीइलोअ आन आखी जातीइ बिमारी आन कमजोरी हुदारीलोअ आधिकार आप्यू. 2 तियां बारा सेलाआं नावे एं होय: पेहलु, पेत्र कोतेहे तो शिमोन, आन तियाआ पाही आंद्रिया; जब्दीइ पोर्‍यू याकोब आन तियाआ पाही योहान, 3 फिलीप, बार्थलमय, थोमा आन नाकापोअ फालू लेनारु मत्तय, आल्फेयोअ पोर्‍यू याकोब आन तद्दय. 4 शिमोन कनानी, आन ईसुहू तोइत आपनारु यहुदा इस्कार्योत.

5 यां बारा सेलाहां ईसु ओ आदेश आपीत मोकल्‍या: "बिगर यहुदीइ जागे मा जाहा, आन शोमरोनोअ कोड्लाज होयरोमेहें मा जाहा. 6 पोन इस्राएलोअ टाकाअला मेडाआं जागे जाजा. 7 आन जाता जाता ओं परसार कोअताज जाजा के, ‘होरगाआ राज आहने आयोहो!’✝10:7 लुक 10:4-12 8 मांदवाड़्याहां हुदारा, मोल्याहां जिवाड़ा, वोडा दुखोवालाहां सोके कोआ, पुते काडा. तुमुहूं फुकोट जोड़्योहो, फुकोट आपा. 9 तुमाआं सेवड़े होनो, सांदी नेत तांबाअ आनो मा लेहा; 10 ✝10:10 1 करिन्थ 9:14; 1 तिम 5:18वाटेए काजे सोलाल खोत्लू, नेत उगार आंगड़ो, खाहड़े नेते डेंगार मा लेहा. काहाके मोजर्‍याहां तियांआं मोजरी जोड़ुहूं जोवे."

11 "जिया कोड्ला बी होयरोमेहें नेत गांवोंमेहें जाहा, ताहां मुंदू पाड़ीत ल्या, के तिहीं कोडो हाजो कोआड़े, आन जाहां तिहीं रोत निहींत जाहा ताअहूं जाआं तियाअहींज रोवा. 12 कोअमेहें फोहती वेले आशिर्वाद आपा.✝10:12 1 शमु 25:6 13 जर तिया कोअमेर्‍येए माअहें हाजे ओये, ताहां तुमाआं आशिर्वाद तियांहां जोड़े; पोन जर तें हाजे ने ओय, ताहां तुमाआं आशिर्वाद तुमाआं जागेहे वोलीत आवे. 14 ✝10:14 प्रेशित 13:51 आन जर एखो तुमाआं स्विकार ने कोए, नेताहां तुमाआं गोठी ने उनाये, ताहां तियाआ कोअमेहें रोते नेत होयरोम रोत बारथे निहींइली वेले तुमाआं गुडाअ थुड़ीइ तुलो बी फोकड़ीत टाकी द्या. 15 ✝10:15 मत्तय 11:24; उत्प 19:24-28 आंय तुमुहूं नक्की कोहो, के न्याय निवाड़ाआ दिही तिया होयरो रोत देव सदोम आन गोमोराहा जाअखी दया देखाड़े!

16 "उनाआ! आंय तुमुहूं कोलवाआं विसमेहें मेडाहां मोकलीइलाआ होस मोकलोहो; तियाहा काजे तुमू हापोअ होस हुशार आन पेरवाअ होस भोले बोणा✝10:16 मत्तय 11:24; उत्प 19:24-28 . 17 पोन एहेला माहूं रोत जाबालीत रोवा, जें तुमुहूं पोन्साहा तोइत आपी देय, आन तें तियांआं आराधनालयोमेहें सापका वाअहीं देये.✝10:17मार्क 13:9-11; लुक 12:11-12; 21:12-15 18 माआं वाखरी तुमुहूं आधिकाऱ्योओं आन राजहांआं सामने साक्शी देअलो काजे लेत जाय, आन तुमू माआं बातमी बिगर यहुदी माअहुंहूं कोत देखाड़हा. 19 जाहां तें तुमुहूं ओटक कोए, ताहां तुमू ए फिकर मा कोअहा के, आमू की गोगहूं नेते केहें कोइत कोहूं, काहाके जो किबी तुमुहूं कोअलोअ रोय, तो तियीज वेले तुमुहूं कोत देवाय. 20 काहाके गोगनारा तुमू नाहां, पोन तुमाआं आब्हाआ आत्मा तुमामेहें रोहे तो गोगे."

21 "पाही पायहोहो आन आब्हू पोर्‍याहा माईंलोअ काजे तोइत आपे, आन पोर्‍यें आयहीन आब्हाआ विरुद्दामेहें उठे आन तियांहां माआड़ी देये✝10:21 मार्क 13:12; लुक 21:16. 22 हारेक जोओं माआं नावोअ वाखरी तुमाआं विरोध कोए. पोन जो कोडो आखरी जाआं टिकीत रोय तोज वासाय.✝10:22 मत्तय 24:9; मार्क 13:13; लुक 21:17 23 जाहां तें तुमुहूं एका गांवोंमेहें तारास देय, ताहां बिहीरा गांवोंमेहें गुगदे वोलजा. आंय तुमुहूं नक्की कोहो के, माहुंउं बेटुह्हू आवे ताअहूं जाआं इस्राएलोमेहें आखा होयरों फिरीइलाआ तुमाआं ने सेलाय.

24 "सेलू तियाआ गुरु रोत वोडू नाहां; आन पावर तियाआ मालख्योप रोत वोडू नाहां रोतू.✝10:24 लुक 6:40; योहान 13:16; 15:20 25 सेलू तियाआ गुराआ एतुहू, आन पावर तियाआ मालख्योअ एतुहू बोणे तेतोज बास होये. जर तियां कोअ धण्योहोंज बालजाबुल कोयो ताहां तियाआ कोर्‍यांहां केतेहे वादार कांय कांय कोये!"✝10:25 मत्तय 9:34; 12:24; मार्क 3:22; लुक 11:15

26 "तियाहा कोत माअहोंहों मा बिहा; काहाके एहलोहो किज टापाअलो कायनाहां जो ने उगड़े, आन एहलोहो किज निकाअलो कायनाहां जो ने जाआंय, आन आखो खुल्लो होय.✝10:26 मार्क 4:22; लुक 8:17; 1 करिन्थ 4:5 27 जों आंय तुमुहूं आंदारामेहें कोहो, तों तुमू उजालामेहें कोवा; आन जों तुमू कानोमेहें उनाअयेहे तों कोओपोअ सोढ़ीत परसार कोआ. 28 जें शरीरोहो माईंत सेकतेहे, पोन आत्माहां माईंत नाहां सेकते तियांहां मा बिहा; पोन जो आत्मा आन शरीर यां बेनुहूं नरकामेहें टाकीत सेकेहे तियाहा बिवा. 29 केहें एका आनामेहें बेन गिनसिड़ी नाहां वेसाअती के? तेबी तुमाआं आब्हाआ इश्शा सिवाय तियांमेहें रोत एक बी पुंयी पोअ ने पोड़ीत सेके. 30 तुमाआं मुन्काआ सिंग्ये बी आखे गणल्ये होये. 31 तियाहा काजे मा बिहा; तुमू तियां सिड़ां रोत केतेहे वादार किमती होये!"

32 "जो कोडो माअहोंअ सामने माआं स्विकार कोए, तियाहा आंय बी माआं होरगाआ आब्हाआ सामने स्विकार कोअहीं. 33 ✝10:33 मार्क 8:38; लुक 9:26; 2 तिम 2:12 पोन जर कोडो माअहोंअ सामने माहूं नाकारे, तियाहा आंय बी माआं होरगामेऱ्याआ आब्हाआ सामने नाकारीहीं."

34 "ओं मा समजाहा के, आंय धरती पोअ होक आपिइलोअ काजे आयुहू. नाहां, आंय होक आपू नाहां, पोन तारवाआ सालाड़ू आयुहू. 35 आंय आंगे कोउ आयुहू, पोर्‍याहा तियाआ आब्हाआ विरुद्ध आन पोऱ्यीही तियीइ आयहीइ विरुद्ध, आन वोवड़ीह्हीही तियीइ हावेह्हेए विरुद्धामेहें फाटाफुट कोइलोअ काजे आयुहू.✝10:35 मिखा 7:6 36 आन तुमाआं कोर्‍येए माहेंज तुमाआं दुस्मोन बोणे."

37 "जो कोडू तियाआ आयहीन आब्हापोअ मापरोत जाअखु मेर कोअहे, तो माआं लायकीइ सेलू नाहां; जो कोडू तियाआ पोऱ्यापोअ नेत पोऱ्यीपोअ मापरोत जाअखु मेर कोअहे, तो माआं लायकीइ सेलू नाहां. 38 आन जो कोडू तियाआ क्रुस लेत माआं फाटी ने साले तो माआं लायकीइ सेलू नाहां.✝10:38 मत्तय 16:24; मार्क 8:34; लुक 9:23 39 जो कोडो तियाआ जिव वासाड़े तो तियाहा जावाड़े; पोन जो कोडो माआं वाखरी तियाआ जिव जावाड़े: तो तियाहा मेलवे.✝10:39 मत्तय 16:25; मार्क 8:35; लुक 9:24; 17:33; योहान 12:25 "

40 "जो कोडो तुमुहूं स्विकार कोअहे, तो माहूं स्विकार कोअहे; आन जो माहूं स्विकार कोअहे, तो माहूं मोकलीइनाराहा स्विकार कोअहे.✝10:40 मार्क 9:37; लुक 9:48; 10:16; योहान 13:20 41 जो कोडो बी भविश्यवक्ताहा*10:41 भविश्यवक्ताआ अर्थ होय देवोअ गोठ माहुंउं जागे पोताड़नारु खबऱ्यु भविश्यवक्तू जाईंत स्विकार कोअहे, तो भविश्यवक्ताआ बक्शीस लेय, आन जो धर्मीहीं धर्मी जाईंत स्विकार कोअहे, तो धर्मीइ बक्शीस लेये. 42 जो कोडो या हानामेहें रोत एकाहा बी माआं सेलू जाईंत निस्तु एकुज गिलास बी पाईं पिवाडे, तेबी आंय तुमुहूं नक्की कोहो के, तियाहा बक्शीस जोड़्या सिवाय ने रोय."