1 "होरगाआ राज एका कोअधण्योअ होस होये, जो वेगर्‍यूउ तियाआ दाराक्शाआ मोलामेहें मोजर्‍याहां कामे लागाड़ीइलो काजे निठू. 2 तिये मोजर्‍याहां एक सांदीइ रुप्याआ रोजनदारी ठरव्यी, आन तियांहां तियाआ दाराक्शाआ मोलामेहें कामोहों मोकल्ये. 3 फाशुउ नोव वाजता तिये जात कोइत थोड़ाक माअहुंहूं बाजारोमेहें बिगर कामोओं उबे रोत रोल्ये देख्ये, 4 आन तियांहां कोयो, ‘तुमू बी दाराक्शाआ मोलामेहें जावा, आन जे बी बोराबर मोजरी ओय, ते आंय तुमुहूं आपीहीं.’ ताहां तें बी गोये. 5 फाशुउ तो बारा वाजता आन तीन वाजता जात कोइत तेहेंज कोअयो. 6 पास वाजता जेहें जाहां तो बाजारोमेहें गोयू, ताहां वारुज जोओं फाश्याआ उबा रोत रोल्या देख्या आन तियांहां कोयो, ‘तुमू काहा दिही पोइत इंहीं उबा रोया?’ तियां तियाहा कोयो, ‘याआकाजे के कोडे बी आमुहूं कामोपोअ ने लागाड़्या.’ 7 तिये तियांहां कोयो, ‘तुमू बी दाराक्शाआ मोलामेहें जावा.’

8 "हांजेपोअ दाराक्शाआ मोलाआ मालख्ये तियाआ जागल्याहा कोयो, ‘मोजर्‍याहां हादीत सेलवार्‍यां रोत ते पेलठाहा जाआं तियांआं मोजरी आपी दे.’✝20:8 लेवी 19:13; कायदा 24:15 9 जाहां ते आये जे पास वाजता कामोपोअ आयेते, ताहां तियांहां एक-एक सांदीइ रुप्यू आप्यू. 10 जें पेल आवयेते, तियांहां ओं समज्यो के आमुहूं वादार मिले, पोन तियांहां बी एक-एक सांदीइ रुप्यू जोड़्यू. 11 जाहां रुप्यू जोड़्यू, ताहां ते लेत कोइत कोअ धण्योअ बाप्तिमेहें टुटणा वोल्या, 12 ‘यां सेलीसेवाआ एकुज तास काम कोअयो, आन तुमे तियांहां बी आमाआं एतीही मोजरी आप्यी, जियां दिही पोइत काम कोअयो आन तोप सेल्यू, तियांहां बी तेतीहीज मोजरी आप्यी?’ 13 तिये तियांमेहें रोत एकाहा उत्तर आप्यो, ‘ए दोस्ता, आंय तापोअ किज अन्याय नाहां कोअतू. तुमेज माहूं एका दिहोअ मोजरी एक सांदीइ रुप्यू नाहां ठरव्यू के? 14 जो ताआ होय, तों विसीत लेन जातु रो, माआं मोर्जी ए होय के जेतोहो ताहूं तेतोहो सेलवार्‍याहा बी आपो. 15 केहें आंय माआं पोशा माआं गोमताज नाहां वापरीत सेकतु के? आंय हाजू रोत्लू काजे तू आदरात्लू के?’"

16 एहें कोइत ईसु नेवराअयू, "जें सेलवाऱ्येए होय, तें पेलठे बोणे, आन जें पेलठे होय, तें सेलवाऱ्येए बोणे."

17 ईसु येरुसालेमोमेहें जात्लू तेहेलामेहें बारा सेलाहां नेवरुज लेत गोयू, आन वाटेज तियांहां कोनु वोल्यू, 18 "पाला, आपू येरुसालेमोमेहें जाताहा, आन माहुंउं बेटुह्हू डाया पुंजारा आन कायदाअ मास्तरोंअ आथे तोआत जाये, आन ते तियाहा माइत टाके. 19 आन तियाहा बिगर यहुदी माअहोंअ आथोमेहें होपी देये, के ते तियाआ टिंगल कोए, आन सापका देये, आन क्रुस खांबोपोअ टांगे, आन तो तिसरे दिही जिवीत उठे."

20 ताहां जब्दीइ लाडी, तियीइ पोर्‍यांअरी ईसु जागे आवित पागे पोड़्यी, आन तियापोअ कितेबी मागी वोल्यी.

21 ईसु तियीही फुशो, "ताहूं कि जोवे?" तियी तियाहा कोयो, "माआं बेनू पोर्‍या तुमाआं राजोमेहें एकाहा तुमाआं हाजाड़ीइ वोगेहे आन एकाहा तुमाआं बांगड़्यीइ वोगेहे बोहे एहेलोह आथवसन आपा."

22 ईसु उत्तर आप्यो, "तुमू नाहां जांअते के तुमू कि मागतेहे. जो कोटीवरु आंय पिअहूं कोअहो, केहें तुमू पित सेकतेहे के?"

तियां तियाहा कोयो, "पित सेकताहा."

23 ईसु तियांहां कोयो, "तुमू माआं कोटीवरु ते पित सेकतेहे. पोन माआ हाजली वोगे नेताहां बांगाड़्यीइ वोग बोहाड़ीलोअ माआं काम कायने, पोन जियाआ काजे माआं आब्हे तियार कोअयोहो, तियांआंज काजे होय."

24 ओं उनाइत बेनू पायहों पोअ दोहू सेलाहां खोत लागी. 25 ईसु तियांहां जागे हादीत कोयो, "तुमू जांअताहा के बिगर यहुदीइ राजाहां तियांआं माहूंपोअ राज देखाड़ीइलो गोमेहें, आन तियांआं पुढाऱ्योहों तियांहां पोटे तेहेली पद्दतीवाअहीं आधिकार वापरीइताहा. 26 पोन तुमामेहें एहलोहो ने ओवे; पोन जो कोडो तुमामेहें वोडो बोणुहूं होदतोये, तो तुमाआं सेवक बोणे; 27 आन जो तुमामेहें पेलठू ओवहूं कोअतू ओय, तो तुमाआं पावर बोणे; 28 जेहलोहो के माहुंउं बेटुह्हू; तो याआकाजे नाहां आवयू के तियाआ सेवा कोए, पोन याआकाजे आयुहू के तुमाआं सेवा कोए, आन खुब जोओंअ काजे जिव आपे."

29 जाहां ईसु आन तियाआ सेलां यरीहो रोत निहींताते, ताहां एक वोडी गर्दी तियाआ फाटी आयी. 30 आन बेन आंदले जे सडकेए मेरे बोठे ते, ओं उनाइत के ईसु जाहे, हाद कोइत कोना वोल्या, "प्रभु*20:30 प्रभु थोड़हा लेख्यामेहें प्रभु शब्द नाहां जोड़तो, दाविदोअ पोर्‍या, आमापोअ दया कोअ!"

31 ते ठावकाज रोय तेहें काजे माहें तियांहां गाई देने वोल्ये; पोन ते फाश्याआ बी आअड़ीत कोयो, "प्रभु, दाविदोअ पोर्‍या आमापोअ दया कोअ!"

32 आन ईसु ऊबू रोत कोइत, तियांहां हाद्या आन कोयो, "तुमुहूं कि जोवे के आंय तुमाआं काजे कोए?"

33 तियां तियाहा कोयो, "प्रभु, आमांआं डोआ उगड़ीत जाय एहेलोहो कोइ दे."

34 ईसु किइमाय कोइत तियांआं डोआहां आथ लागाड़्या, आन ते तुरतुज पाला वोल्या; आन तियाआ फाटी गोया.